වෘත්තීය නිදහස, මාධ්‍යවේදීන්ගේ ආරක්ෂාව සහ 'ගම්මැද්ද' හරහා ජනතා සේවයට කැපවූ පූර්වාදර්ශය
ශ්‍රී ලංකාවේ ව්‍යාපාරික, මාධ්‍ය සහ සමාජයීය ක්ෂේත්‍රයන්හි සුවිශේෂී සලකුණක් තැබූ මහරාජා සමූහ ව්‍යාපාරයේ (Capital Maharaja Group - CMG) හිටපු සභාපති රාජේන්ද්‍රන් රාජාමහේන්ද්‍රන් මහතා, හෙවත් 'කිලි මහරාජා' අභාවප්‍රාප්ත වී 2026 ජූලි 25 දිනට වසර පහක් සම්පූර්ණ විය.
1943 මැයි 19 වනදා උපත ලබා කොළඹ රාජකීය විද්‍යාලයෙන් අධ්‍යාපනය හැදෑරූ ඒ මහතා, සිය පියා වූ සුබ්‍රබනියම් මහරාජා සහ සිංගම් වීරසිංගම් යන මහත්වරුන් විසින් 1930 ගණන්වලදී ආරම්භ කරන ලද ව්‍යාපාරය, මෙරට ප්‍රමුඛතම බහුජාතික සමාගම් සමූහයක් බවට පරිවර්තනය කිරීමට නායකත්වය දුන්නේය. S-lon නල සහ සවි කිරීම්, තේ අපනයනය, රසායනික ද්‍රව්‍ය, පුද්ගලික සත්කාරක නිෂ්පාදන, තොරතුරු තාක්ෂණය සහ ඇසුරුම්කරණය ඇතුළු ක්ෂේත්‍ර ගණනාවකට උපායමාර්ගිකව ව්‍යාපාරික කටයුතු විවිධාංගීකරණය කිරීමට ඔහු පියවර ගත්තේය.
විද්‍යුත් මාධ්‍ය කලාවේ සන්ධිස්ථානය
1990 දශකයේ මුල් භාගයේදී MTV Channel සහ MBC Networks ආරම්භ කරමින් මෙරට රාජ්‍ය මාධ්‍ය ඒකාධිකාරය පැවති යුගයක පෞද්ගලික විද්‍යුත් මාධ්‍ය ජාලයක් බිහිකිරීමට කිලි මහරාජා මහතා පුරෝගාමී විය. Sirasa FM, Shakthi FM, Yes FM, Sirasa TV, Shakthi TV සහ TV 1 වැනි නාලිකා ඔස්සේ එතෙක් පැවති සම්ප්‍රදායික රාජ්‍ය මාධ්‍ය ආකෘතියෙන් බැහැරව ජනතාවට සමීප මාධ්‍ය භාවිතයක් හඳුන්වා දීමට ඔහු කටයුතු කළේය.
News 1st පුවත් සේවය හරහා ගවේෂණාත්මක මාධ්‍ය සංස්කෘතියක් ගොඩනැගීමට මුලපිරූ ඔහු, නොයෙකුත් දේශපාලන හා සමාජීය බලපෑම් හමුවේ වුවද තම ආයතනයේ මාධ්‍යවේදීන්ගේ වෘත්තීය ස්වාධීනත්වය සහ ආරක්ෂාව වෙනුවෙන් පෙනී සිටියේය. 2009 වසරේදී පන්නිපිටිය පිහිටි මාධ්‍ය මධ්‍යස්ථානයට එල්ල වූ ප්‍රහාරය ඇතුළු විවිධ නීතිමය හා දේශපාලනික පීඩනයන් හමුවේ වුවද සිය මාධ්‍ය ප්‍රතිපත්තිය වෙනස් නොකිරීම ක්ෂේත්‍රයේ විශේෂ අවධානයට ලක්වූ කරුණකි.
මානව සේවා සහ ක්‍රීඩා දායකත්වය
ශ්‍රී ලංකා ක්‍රිකට් කණ්ඩායම ටෙස්ට් වරම් ලබාගත් මුල් අවධියේදී දුලීප් මෙන්ඩිස්, රෝයි ඩයස් සහ අර්ජුන රණතුංග වැනි ප්‍රමුඛ ක්‍රීඩකයන්ට තම ආයතනය හරහා රැකියා සහ මූල්‍යමය අනුග්‍රහය ලබාදීමට ඔහු කටයුතු කළේය. එමෙන්ම පාලකයන්ගේ අවධානයට ලක්නොවන දුෂ්කර ගම්මානවල පානීය ජලය, මාර්ග, පාලම් සහ පාසල් පහසුකම් සංවර්ධනය කිරීම උදෙසා 'ගම්මැද්ද' (Gammadda) මහජන සේවා වැඩසටහන ආරම්භ කිරීමට ද පියවර ගන්නා ලදී.
තමන්ගේම නාලිකාවල පෞද්ගලික ප්‍රසිද්ධිය උදෙසා පෙනී සිටීමෙන් වැළකී සිටි ඔහු, සේවක මණ්ඩලය පවුලේ සාමාජිකයන් ලෙස සලකමින් කටයුතු කළ බවත් , ජාති හෝ ආගම් භේදයකින් තොරව ශ්‍රී ලාංකිකත්වය මුල්කර ගනිමින් තීරණ ගත් බවත් මාධ්‍ය හා ව්‍යාපාරික ක්ෂේත්‍රයේ විචාරකයෝ පෙන්වා දෙති.
2021 ජූලි 25 වනදා කොවිඩ් අසාදනයෙන් අභාවප්‍රාප්ත වූ කිලි මහරාජා මහතාගේ නික්ම යාමෙන් වසර පහක් ගතවුවද, මෙරට මාධ්‍ය සහ ව්‍යාපාරික ක්ෂේත්‍රය තුළ ඇති වූ හිඩැස තවමත් පවති.
සබැඳි පුවත් :
Killi keeps growing after all these years
