යුද වාතාවරණය හමුවේ දරුවන්ට ඉතිරිව ඇති එකම විනෝදාස්වාදය
ගාසා තීරයේ පවතින උණුසුම් වාතාවරණය සහ යුද ගැටුම් හේතුවෙන් සාමාන්‍ය ජන ජීවිතයට පමණක් නොව, සත්වෝද්‍යානවල වෙසෙන සතුන්ට ද දැඩි බලපෑමක් එල්ල වී ඇති බව වාර්තා වේ. මාධ්‍ය වාර්තා පෙන්වා දෙන්නේ ආහාර, ඖෂධ සහ එන්නත් හිඟය හේතුවෙන් සතුන් පෝෂණ ඌනතාවලින් සහ මානසික පීඩනයකින් පෙළෙන බවයි.
ගාසා තීරයේ නුසෙයිරාත් සරණාගත කඳවුර ආසන්නයේ පිහිටි කුඩා සත්වෝද්‍යානයක් වටා මේ වන විට මෙවැනි අසීරු තත්ත්වයක් නිර්මාණය වී ඇත. මෙම සත්වෝද්‍යානයේ හිමිකරු වන මහමුද් ගෝමා (Mahmoud Gomaa), මීට පෙර රෆාහ් නගරයේ පවත්වාගෙන ගිය සිය සත්වෝද්‍යානය, යුද ගැටුම් උත්සන්න වීමත් සමඟ ආරක්ෂිත ස්ථාන වෙත රැගෙන යාමට උත්සාහ කර තිබුණි.
සතුන්ගේ යහපැවැත්ම හා පවතින අභියෝග
යුද කලාපයක් තුළ සතුන් නඩත්තු කිරීමේ අභියෝගය අතිමහත්ය. පශු වෛද්‍ය නිදල් ෆාදෙල් පෙන්වා දෙන්නේ, සතුන්ට අවශ්‍ය නැවුම් ආහාර වෙනුවට ශීත කළ මස් ලබා දීමට සිදුවීම පෝෂණීය වශයෙන් බරපතළ ගැටලුවක් බවයි. සතුන්ට ස්වභාවික පරිසරයේදී ලැබිය යුතු පෝෂණය වෙනුවට මෙවැනි ආහාර ලබා දීම ඔවුන්ගේ සෞඛ්‍ය තත්ත්වයට අහිතකර ලෙස බලපාන බව විශේෂඥ මතයයි.
ගැටුම් නිසා සතුන් පමණක් නොව සත්වෝද්‍යානවල යටිතල පහසුකම් ද බරපතළ හානියට ලක්ව ඇති බව සනාථ වේ. මීට පෙර රෆාහ් නගරයේ පැවති සත්වෝද්‍යානයෙන් ඉවත් වීමේදී සතුන් කිහිප දෙනෙකු අහිමි වූ බවත්, පසුව එම ස්ථානය පරීක්ෂා කිරීමේදී සතුන්ගේ ඇටසැකිලි පමණක් දැකගත හැකි වූ බවත් ගෝමා ප්‍රකාශ කළේය.
"යුද්ධයේ ආරම්භයේ සිටම ජනතාව තම දිවි ගලවා ගැනීමට උත්සාහ කරන විට, මම උත්සාහ කළේ මගේ දිවියට වඩා සතුන්ගේ දිවි රැක ගැනීමටයි," යනුවෙන් ඔහු විදෙස් මාධ්‍ය වෙත අදහස් දක්වමින් සඳහන් කර තිබුණි.
දෙමාපියන් සහ දරුවන්ගේ ආකල්ප
යුද ගැටුම්වලින් විනාශ වූ නගර මැද දරුවන්ට සෙල්ලම් කිරීමට හෝ විවේක ගැනීමට ඉඩකඩක් නොමැති පසුබිමක, මෙම සත්වෝද්‍යානය ඇතැම් දරුවන්ට කෙටි සහනයක් ගෙන දෙයි. නුසෙයිරාත් සත්වෝද්‍යානයට පැමිණි කරම් අල්-මාෂින් නම් පුද්ගලයෙකු පවසන්නේ, අවට ප්‍රදේශය ගල් සහ සුන්බුන්වලින් පිරී පවතින බවත්, දරුවන්ට විනෝද වීමට වෙනත් ස්ථානයක් නොමැති බවත්ය.
සත්ව සුභසාධන සංවිධාන නිරීක්ෂණය කරන පරිදි, පවතින බෝම්බ හඬ සහ යුද කලහකාරී වාතාවරණය හේතුවෙන් සතුන් ද දැඩි මානසික පීඩනයකට ලක්ව සිටිති. කෙසේ වෙතත්, පවතින සීමිත සම්පත් මැද වුවද, සතුන් රැකගැනීම සඳහා සත්වෝද්‍යාන හිමිකරුවන් සහ සත්ව සුභසාධක ක්‍රියාකාරීන් දරන උත්සාහය අගය කළ යුතුය.
මෙම සිදුවීම මගින් යුද්ධයකදී සිවිල් වැසියන්ගේ ජීවිතවලට අමතරව, සතුන් ද නොදැනුවත්වම ගැටුම්වල ගොදුරු බවට පත්වන ආකාරය පිළිබඳ තවත් එක් පැතිකඩක් මතු කර දක්වයි.
මුලාශ්‍රය :
At a Gaza zoo, war takes its toll on the animals
