මිහින්තලේ චෛත්‍යයේ කොත් පැළඳවීමේ උත්සවයට ආරාධනා ලැබුණු පසු රනිල් කිසිදු මස් මාංශයක් අනුභව නොකර ඒ සඳහා පේ විය.
අනුරාධපුරයට ගිය රනිල් ප්‍රථමයෙන්ම වැඩ බලන අටමස්ථානාධිපති ඊතලවැටුනවැවේ ඥානතිලක නාහිමියන් බැහැදැක විශේෂ සාකච්ඡාවක් පැවැත්වීය. වැඩබලන අටමස්ථානාධිපති හිමියන්ට පූජා කරන පළතුරු පවා කොළඹ සිට රැගෙන යාමට රනිල් වික්‍රමසිංහ මහතා පියවර ගෙන තිබිණි.
මිහින්තලා රජමහා විහාරයේ උත්සවයට රනිල් සහභාගී වූයේ එහි විහාරාධිපති වලවාහැඟුණවැවේ ධම්මරතන නාහිමියන්ගේ ආරාධනාවක් අනුවය.
එම උත්සවයේදී රනිල් ථෙරවාදී බුදුදහමේ අතීතය, ව්‍යාප්තිය මෙන්ම තායිලන්තය සමඟ ඇති සම්බන්ධය ගැන ගැඹුරු දෙසුමක් කළේය. ඒ කතාව ඉතාමත්ම සාවධානයෙන් අසා සිටි උත්සවයේ ප්‍රධාන ආරාධිත තායිලන්තයේ නියෝජ්‍ය අගමැතිනිය ඉංග්‍රීසි බසින් රනිල් අමතමින් පැවසූයේ,
"බුදුදහම සම්බන්ධයෙන් ඔබට තියෙන දැනුම පිළිබඳවත්, ඔබ සතු මතකය සම්බන්ධයෙනුත් මම පුදුමයට පත් වුණා" යනුවෙනි.
ඊට පිළිතුරු දෙමින් රනිල්, "හැමදාමත් තායිලන්තය අපිට අමාරු අවස්ථාවලදී උදව් කරලා තියෙනවා. ඒක කවදාවත් අමතක කරන්නේ නැහැ. ඔබතුමිය මේ අවස්ථාවට සහභාගි වීම මම විශේෂයෙන්ම අගය කරනවා" යැයි පැවසීය.
රනිල් එම උත්සවයේ කළ කතාව සම්බන්ධයෙන් සමාජ මාධ්‍යයෙන් මෙන්ම විද්‍යුත් මුද්‍රිත මාධ්‍යවලින් ඉමහත් ප්‍රසිද්ධියක් ලබා දී තිබිණි. හිටපු ජනාධිපති මාධ්‍ය අධ්‍යක්ෂ ශානුක කරුණාරත්න නාලිකාව හරහා රනිල්ගේ කතාව ලබාගත් අතර, අටවැනි විධායක ජනාධිපතිවරයාගේ මාධ්‍ය අංශය මගින් එය පැය එකහමාරක පමණ කාලයක් ඇතුළත සමාජ මාධ්‍යයටත්, පුවත්පත්වලටත් සිංහල භාෂාවෙන් නිකුත් කිරීමට පියවර ගත්තේය. පැය කිහිපයක් ඇතුළත රනිල්ගේ කතාව මුළු ලෝකයටම ගියේය.
රාජ්‍ය තාන්ත්‍රික නොසැලකිල්ල සහ ඩේවිඩ් කැමරන්ගේ මතකය
මේ උත්සවයේදී රනිල්ට තවත් විශේෂ කාරණාවක් ගැන දැනගන්නට ලැබිණි. ඒ, මිහින්තලේ පින්කමට ආ තායිලන්ත නියෝජ්‍ය අගමැතිනියට කිසිදු ආරක්ෂාවක් හෝ රාජ්‍ය තාන්ත්‍රික පිළිගැනීමක් රජය ලබා දී නැති බවයි.
මේ පිළිබඳව දැඩි නොසතුට පළ කළ රනිල්, "මේ ආණ්ඩුවට මොනවා වෙලාද මම දන්නේ නැහැ. මෙහෙම පුළුවන්ද විදේශ ප්‍රතිපත්තිය හසුරුවන්න? තායිලන්තය අපට හැම අමාරු අවස්ථාවකදීම උදව් කරලා තියෙනවා. මම තායිලන්තයත් එක්ක නිදහස් වෙළෙඳ ගිවිසුමකට පවා අවතීර්ණ වෙන්න කටයුතු කළා. ආණ්ඩුවට මොලේ නරක් වෙලාද මන්දා," යනුවෙන් පැවසීය.
අනතුරුව මේ සම්බන්ධයෙන් අප්‍රසාදය පළ කරමින් එක්සත් ජාතික පක්ෂය නිවේදනයක් ද නිකුත් කළේය. ඒ නිවේදනයට තායිලන්ත මාධ්‍යවලත් විශාල ප්‍රචාරයක් ලබා දී තිබිණි.
කොළඹ පැමිණි රනිල් ඒකාබද්ධ විපක්ෂයේ නායකයන් සමඟ හමුවකට සහභාගී විය. එහිදී රනිල් පළමුවෙන්ම තමා ජනපති සමයේ විදේශ නායකයන්ට ආරක්ෂාව දුන් අවස්ථාවක් ගැන කරුණක් පැහැදිලි කළේය.
"බ්‍රිතාන්‍ය හිටපු අගමැති ඩේවිඩ් කැමරන් මා ජනාධිපති ධුරය දරන අවස්ථාවේදී ලංකාවේ දකුණු වෙරළ තීරයට පෞද්ගලික සංචාරයකට පැමිණෙන බව දැනගන්න ලැබුණා. ඔහු කිසිම ආරක්ෂාවක් ඉල්ලා නොතිබුණත් මම ඔහුට නොදැනෙන්න සිවිල් ඇඳුමින් ආරක්ෂකයන් යොදවන ලෙස උපදෙස් දුන්නා. රටින් පිටවෙන්න කලින් කැමරන් මට ස්තුති කළා. 'ඔබතුමා මටත් නොදැනෙන්න ආරක්ෂාව දෙන්න උත්සාහ ගෙන තිබුණා, නමුත් මට ඒ බව දැනගන්න ලැබුණා. ඒක මම ඉතාමත්ම ඉහළින් අගය කරනවා' කියලා කැමරන් මට පැවසුවා. රාජ්‍ය නායකයන් ලංකාවට එන විට සම්ප්‍රදායක් විදියට එදා සිටම ඔවුන්ට ආරක්ෂාවක් දුන්නා," රනිල් පැවසීය.
ඒකාබද්ධ විපක්ෂයේ සාකච්ඡාව සහ පන්සල් කේන්ද්‍රීය වැඩපිළිවෙළ
මෙහිදී අදහස් දක්වමින් ජී.එල්. පැවසූයේ Online Safety Bill භයානක එකක් බවයි. මාධ්‍ය ආයතනවලට එයින් මරු පහරක් එල්ල වන බව ද ජී.එල්. කීය. හිටපු ඇමැති මහින්ද අමරවීර සඳහන් කළේ රටේ හැම ප්‍රදේශයකම වගේ ඒකාබද්ධ විපක්ෂයේ දේශපාලන ගමන ගැන උනන්දුවක් ඇති වී තිබෙන බවයි. ආණ්ඩුවේ ගමන ගැන ජනතාවගේ යම් බිය මුසු චකිතයක් තිබෙන බව ද අමරවීර කීය.
"වරාය නගරයෙන් චයිනා මර්චන්ට් චීන සමාගම ඉවත් වෙමින් යනවා. ඇමරිකාව නම් ඒකට කැමති වෙයි. මේක ඉස්සරහට යනකොට චීනුන් සම්පූර්ණයෙන්ම වරාය නගරයෙන් ඉවත් වෙයි. මේ යන විදිහට පිටින් ඇවිල්ලා කවුරුත් අපිට උදව් කරයි කියලා හිතන්න එපා. අපි ගම් මට්ටමින් ආගමික කමිටු හදලා පන්සල් කේන්ද්‍රස්ථාන කරලා අපේ වැඩපිළිවෙළ සකස් කරමු," රනිල් පැවසීය.
අදාළ පාගමන සඳහා කෑගල්ලේදී මෙන්ම ගම්පහදී සමගි ජන බලවේගයෙන් ලොකු සහයක් දී තිබුණත් කොළඹින් සජබෙන් කිසිම සහයක් නොලැබුණු බව මෙහිදී සාකච්ඡා විය. භික්ෂූන් වහන්සේලාගේ පාගමනින් පසු ඇති වූ තත්ත්වය නිසා ආණ්ඩුව කැළඹීමට පත්ව සිටින බවත් දේශපාලනඥයන්ටවත් එය කරගන්නට නොහැකි වූ බවත් මෙහිදී කථිකාවට ලක් විය.
මහා නාහිමිවරුන් හමුවීම සහ ථෙරවාද දේශනය
මේ අතර සති අන්තයේදී රනිල් සහ කෝට්ටේ ශ්‍රී කල්‍යාණි සාමග්‍රී ධර්ම මහා සංඝ සභාවේ මහානායක හිමියන් සහ අනුනායක හිමියන් අතර හමුවක් ද පැවැත්විණි.
කෝට්ටේ පාර්ශ්වයේ මහානායක හිමියන් සහ අනුනායක හිමියන් සමඟ පැවැත්වෙන හමු සම්බන්ධයෙන් අදහස් දක්වමින් රනිල්, හිටපු ප්‍රවෘත්ති අධ්‍යක්ෂ ජනරාල් දිනිත් චින්තක කරුණාරත්නට කීවේ, "මා සිතා සිටින්නේ කිසිම මාධ්‍යයකට මේ අවස්ථා විවෘත නොකරන්නයි. බලය තිබෙනකොටත් ආගමික නායකයින් සමග කරන සාකච්ඡාවලට මා මාධ්‍ය කැඳෙව්වේ නැහැ. මහානායක හිමිවරුන් තමන්ගේ ආගමික වැඩකටයුතු අවශ්‍ය ආකාරයට කරාවි. දේශපාලනඥයන් විදිහට අප අපේ වැඩේ කරමු," යනුවෙනි.
"සර්, මිහින්තලේ කරපු කතාව ගැන සමාජයේ ලොකු ප්‍රසාදයක් තියෙන්නේ. ඇත්තෙන්ම අපටත් ඒ ගැන අවබෝධයක් ගන්න උවමනයි," පක්ෂ නායකයෝ කීහ.
"ථෙරවාද බුදුදහමේ ආරම්භය සිදුවන්නේ තුන්වැනි ධර්ම සංඝායනාවෙන් පසුව. මහා විහාරය ඇති කළ පසු මහා විහාරවාසී සංඝරත්නය ත්‍රිපිටකය ග්‍රන්ථාරූඪ කළා. විනය පිටකයේ අයිතිය ඇත්තේ මහා විහාරයට. විනය පිටකයේ තිබෙන ආකාරයට වර්තමානයේ භික්ෂූන් වහන්සේ ක්‍රියා කළ යුතුයි.
බාගන් (Bagan) රාජධානියට විනය පිටකය හඳුන්වා දෙනු ලබන්නේ විජයබාහු රජතුමා. මියන්මාරයේ පැතිර තිබෙන රාමඤ්ඤ සහ අමරපුර නිකායවලටත් පැතිර ගියේ මේ විනය පිටකයමයි. තවද ත්‍රිපිටකය තායිලන්ත සුඛෝතායි රාජධානියටත්, එතැනින් තායිලන්තයේ අගනුවර වූ අයුත්ථයාවටත් පැමිණියා. ශ්‍රී ලාංකේය ස්වාමීන් වහන්සේලා නැවත උපසම්පදාව ලබාගන්නෙත් අයුත්ථයාවෙන්. මේ හරහා නිකාය ගණනාවක් ඇති වුණා. ඒ සමගම නිකාය පාර්ශ්ව බිහි වුණා. ඒ කාලයේ සිටියේ ස්වාමීන් වහන්සේලා ස්වල්පයයි," රනිල් පැහැදිලි කළේය.
සෞදියේ අනෝජන් බේරාගැනීම සහ මල්පාරේ හෙළිදරව්ව
සතියේ දිනක මල්පාර දේශපාලන කාර්යාලයට පැමිණි, පැවැති රජයන්වල ඉහළම පරිපාලන තනතුරු හෙඹවූ නිලධාරීන් අපූරු තොරතුරක් රනිල් හමුවේ අනාවරණය කර සිටියේය.
"සර්, සෞදියේදී මරණයට නියම වෙලා සිටි අනෝජන් බේරා ගැනීමට මේ රජයේ කිසිඳු මැදිහත්වීමක් බලපෑවේ නැහැ. මේ වැඩේ කළේ මාලදිවයිනේ හිටපු ජනාධිපති මොහොමඩ් නෂීඩ්. ඔහු සෞදි රජතුමාගේ හොඳ මිත්‍රයෙක්. නෂීඩ්ගේ ඉල්ලීමට අනුව සෞදි රජතුමා අනෝජන්ට සමාව දෙන්න එරට අභියාචනාධිකරණයට දැනුම් දෙනකොට අපේ රටෙන් ගිය නියෝජිතයන් සිටියේ ගුවන් යානයේ. ඒ තුන්දෙනා සෞදියට ගොඩබහිනකොට සියලු වැඩ කෙරිලා අවසානයි."
ජනාධිපති සමාව ගැන ජී.එල්.ගේ මතය සහ අල්ලස් කොමිසම
ඒකාබද්ධ විපක්ෂයේ නායක හමුවකදී අදහස් දක්වමින් මහාචාර්ය ජී.එල්. පීරිස් පැවසූයේ ඥානසාර හිමියන්ට සමාව දීම ජනවරමට පටහැනි බවට ආණ්ඩුව ඉදිරිපත් කරන තර්කය පිළිගත හැකි එකක් නොවන බවයි.
"නඩු විභාගයකින් අනතුරුව දඬුවමක් දීම සඳහා උසාවිය අනුගමනය කරන කරුණු තියෙනවා. ජනපති සමාව දීම සඳහා අනුගමනය කරන කරුණු ඊට හාත්පසින් වෙනස්. සමාව දීමේ බලය ආණ්ඩුක්‍රම ව්‍යවස්ථාවේම තිබෙනවා. ජනාධිපතිවරයාගේ තර්කය අනුව කිසි විටෙක සමාව දෙන්න බැරිද? ව්‍යවස්ථාවේ එවැනි බලයක් තිබෙන්නේ එයින් යම් ප්‍රයෝජනවත් අරමුණක් ඉටුවන නිසයි. ඒ වගේම මුල ඉඳන්ම ඥානසාර හිමියන්ට සමාව දීම සම්බන්ධයෙන් ආණ්ඩුව අනුගමනය කළ ක්‍රියාපිළිවෙත බෞද්ධ සමාජයට හිත රිදෙන එකක්. බුදුදහම සහ සංස්කෘතිය එකට ගැටගැසී තිබෙන දෙයක්. රාජ්‍යය බුද්ධ ශාසනයෙන් ඈත් කිරීම කිසිසේත් අපේ ජනතාව පිළිගන්නේ නැහැ. ඒ තුළින් බෞද්ධ සමාජයේ ලොකු කලකිරීමක් ඇතිවෙලා."
ඉකුත් සතියේ ජී.එල්. අල්ලස් හෝ දූෂණ විමර්ශන කොමිෂන් සභාවට ගියේය. ඒ කොමිසමේ කැඳවීමකට අනුවයි. එහිදී කොමිසම සඳහන් කර ඇත්තේ ඔහුට කිසිදු චෝදනාවක් නැති බවයි.
"මගේ කාර්යභාරය වුණේ විදේශ ඇමැතිවරයා හැටියට. විදේශ ඇමැතිවරයාට අයත් එක කාර්යයක් වන්නේ සංචාරක කර්මාන්තය ප්‍රවර්ධනය කිරීමයි. 2010 වන විට ආයෝජන පිළිබඳ තත්ත්වය ඉතා දුර්වලයි. යුද්ධය අවසන් වෙලා මාස කීපයයි. රජයේ සුබදායී ප්‍රතිචාරය තිබෙනවා නම් රටට එන්න කැමති බව ෂැංග්‍රිලා හෝටලය පැවසූයේ ඒ වකවානුවේදීයි. මෙය රටට අවශ්‍ය බව මහින්ද රාජපක්ෂ ජනාධිපතිවරයා එහිදී පැවසුවා.
මහා බ්‍රිතාන්‍යයේ, පළමු පෙළේ විශ්වවිද්‍යාලයක ඉතාමත් ඉහළ තනතුරක් දැරීමට මට අවස්ථා තිබුණා. මම ඒක කළේ නැහැ. මට ඕනේ වුණේ අපේ රටේ විශ්වවිද්‍යාල පද්ධතිය තුළ අපේම ශිෂ්‍ය ශිෂ්‍යාවන්ට නීති අධ්‍යාපනය ලබාදෙන්න. එතකොට පරම්පරා දෙකකට මම ඒ නීති අධ්‍යාපනය සපයා දුන්නා. විදේශ විනිමය ඕනෑ තරම් මට හොයන්න තිබුණා. ඒත් ඒ ගැන මම කිසිම උනන්දුවක් දැක්වුවේ නැහැ.
ඒ හින්දා සල්ලි පස්සේ මම කවදාවත් ගියේ නැහැ. අපේ පවුල පරම්පරා ගණනක් මේ රටට විවිධ දේවල් පරිත්‍යාග කරලා තියෙනවා. විශාඛා විද්‍යාලය හැදුවේ කවුද? ශ්‍රීපාලි විද්‍යාලය හැදුවේ කවුද? ඒවා අපේ පරම්පරාවේ මුතුන්මිත්තන් කරපු දේවල්. අපි මේ රටට දේවල් දුන්නා මිසක් සත පහක් මේ රටෙන් අරන් නැහැ," යනුවෙන් ජී.එල්. කොමිසම හමුවේ ප්‍රකාශය සටහන් කිරීමෙන් අනතුරුව මාධ්‍ය හමුවේ කීය.
(සටහන | මල් පාරේ ලියුම්කරු)