නොරට සිට ආ මුතුන් මිත්තෝ (21) : රජුන් තනන්නෝ - (ඉන්දු පෙරේරා)

වර්තමාන පරම්පරාව මෙලෙස අධ්‍යාපනය ලබා උසස් රැකියාවල නියුතු වීම ඇතුළු වෙනත් රැකියාවලට වත්තෙන් පිටයාම හේතුවෙන් තවමත් වතුවල රැඳී කම්කරු රැකියාවල නිරත වන්නේ වැඩිහිටි පිරිස පමණි. මේ අනුව අනාගතයේදී දළු නෙළීම මැෂින්වලට පැවරෙන විට දැන් මෙන් සතියකට වරක් එක් තේ ගසකින් දළු නෙළීම සිදු කළ නොහැකි වනු ඇත. අතින් දළු නෙළීමේදී තෝරා බේරා ගෙන අවශ්‍ය දල්ල පමණක් නෙළා ගත හැකිය. නමුත් යන්ත්‍රයකින් එම කාර්ය එලෙස කළ හැකි නොවේ. මේ නිසා යන්ත්‍රයකින් තේ දළු නෙළීමේදී එක් තේ ගසකින් දළු නෙළීමට හැකි වන්නේ මාසයකට දෙවතාවක් පමණක් යැයි කියනු ලැබේ.

 

2014 වර්ෂයේ සමීක්ෂණ වාර්තාවකට අනුව කඳුකර වතු ආශ්‍රිතව ජීවත් වන මුළු පවුල් සංඛ්‍යාවෙන් 17% කට විදුලි බලය නොමැත. සනීපාරක්ෂක පහසුකම් නොමැතිකම නිසා ශරීර කෘත්‍යය සිදු කිරීමට කැලෑවට යන පවුල් සංඛ්‍යාව පනස් දහසකට ආසන්න ය. එම සමීක්ෂණයට අනුව ඒ වනවිට සනීපාරක්ෂක පහසුකම් ලැබී තිබුණේ මුළු පවුල් සංඛ්‍යාවෙන් 73% කට පමණි.

වතු ආරෝග්‍ය ශාලා, මාතෘ නිවාස, බෙහෙත් ශාලා ආදිය මේවායෙහි ක්‍රියාත්මක වන අතර ඒවායේ කාර්ය මණ්ඩලයක්ද සිටිති. ඒ හැරුණු විට පුහුණු පවුල් සෞඛ්‍ය සේවිකාවන්, වතු සෞඛ්‍ය නිලධාරීන්, පවුල් සහ සුබ සාධන නිලධාරීන් පහත රට වතුකරයේ මෙන් මෙහිද අඩුවක් නැත. නමුත් මෙම කම්කරුවන් ගේ, විශේෂයෙන් කඳුකර දෙමළ ජනතාවගේ ජීවිතවලට තවමත් සැලකිය යුතු ආලෝකයක් ලැබී නොමැත. ඔවුන්ගේ ලැයිම් කාමර ද ඒ කාලයේ සුද්දන් සැකසූ ඒවාය. "සිලොන් ටී" නාමය ලොවට ගෙනයන්නට දහඩිය කඳුළු හෙලන්නේ ඔවුන් ය. නමුත් කිසිදු සමාජ පිළිගැනීමක් ඔවුන්ට නැත. එවැනි පිළිගැනීමක් ලබාදීම වත්තේ ආර්ථිකයට බාධාවක් විය හැකියැයි සිතන වතු හාම්පුත්තු ද සිටිති. වතු දෙමළ ජනතාවගේ අයිතිවාසිකම් මැතිවරණ වේදිකාවලට හොඳ මාතෘකාවකි. ඒවායේ මොනතරම් කයිවාරු ගැසුවත් ඔවුනට සිදුවූ සේවයක් නැත. ඔවුහු රජුන් තනන්නෝය. ඒ රජුන්ට නැවත ඔවුන් සිහිපත් වන්නේ යළිත් වරක් ඔවුන්ගේ උරෙන් නැගී සිටින්නට මැතිවරණයක් ආසන්න වන විට ය.