ඒ අනුව, විචක්ෂණශීලී ණය දීමේ පිළිවෙත් ප්‍රවර්ධනය කිරීම සහ මූල්‍ය පද්ධතියේ ස්ථාවරත්වය සුරක්ෂිත කිරීම අරමුණු කරගනිමින්, රන් භාණ්ඩ ඇපයට තබා ලබාදෙන ණය (Gold Loans) සඳහා උපරිම ණය අනුපාතයක් (Maximum Loan-to-Value Ratio) හඳුන්වා දීමට ශ්‍රී ලංකා මහ බැංකුව පියවර ගෙන ඇත.
මහ බැංකුවේ සාර්ව විචක්ෂණ අධිකාරියට අනුකූලව ගනු ලැබූ මෙම තීරණයට අනුව, අද (25) සිට ක්‍රියාත්මක වන පරිදි සියලුම බලපත්‍රලාභී වාණිජ බැංකු, විශේෂිත බැංකු සහ බලපත්‍රලාභී මුදල් සමාගම් මගින් ලබාදෙන රන් ණය පහසුකම්, අදාළ රන් භාණ්ඩවල වටිනාකමින් උපරිම 70%ක සීමාවකට යටත් විය යුතුය.
මෑතකාලීනව රන් ඇපකර මත පදනම් වූ ණය පහසුකම් ශීඝ්‍රයෙන් වර්ධනය වීම සහ එමගින් මූල්‍ය ක්ෂේත්‍රය වෙත ඇති විය හැකි පද්ධතිමය අවදානම් (Systemic Risks) අවම කිරීම වෙනුවෙන් මෙම පියවර ගත් බව මහ බැංකුව පවසයි. විශේෂයෙන්ම ලෝක වෙළෙඳපොළේ රන් මිලෙහි සිදුවන උච්චාවචනයන් හමුවේ මූල්‍ය ආයතනවල ඔරොත්තු දීමේ හැකියාව ශක්තිමත් කිරීමට මින් අපේක්ෂා කෙරේ.
මීට පෙර ඇතැම් මූල්‍ය ආයතන රන් වටිනාකමෙන් 80% සිට 85% දක්වා ඉහළ ප්‍රතිශතයකින් ණය මුදල් නිකුත් කර තිබූ අතර, නව 70%ක සීමාව නිසා පාරිභෝගිකයන්ට රන් බඩු උකස් කිරීමේදී ලැබෙන උපරිම ණය මුදල යම්තාක් දුරට සීමා වනු ඇත.
මෙමගින් මූල්‍ය ක්ෂේත්‍රයේ සුරක්ෂිතතාව සහ ගනුදෙනුකරුවන්ගේ දිගුකාලීන ස්ථාවරත්වය තහවුරු වන බව මහ බැංකුවේ අදහසයි.
ශ්‍රී ලංකා මහ බැංකුව නිකුත්කළ නිවේදනය මතු පළවේ.
LOAN TO VALUE RATIOS FOR CREDIT FACILITIES GRANTED IN RESPECT OF MOTOR VEHICLES
LOAN TO VALUE RATIO FOR CREDIT FACILITIES SECURED BY GOLD COLLATERAL
