මැණික් ගලක් ඇති බවට සැක කෙරෙන පාෂාණයක් හමුවීමේ සිද්ධියක් මෑතකදී මාධ්‍ය වාර්තා වලින් දැකගත හැකි වුණා.
පින්තූර සහ වීඩියෝ නිරීක්ෂණයෙන් බැලූ විට, මේ පාෂාණය මිලෙන් වැඩි blue sapphire මැණික් ගලක් නොව, Feldspar කුලකයට අයත් Labradorite නම් ඛනිජයක් වීමට වැඩි ඉඩක් පවතිනවා. Feldspar කියන්නේ පෘථිවියේ වැඩිම ප්‍රමාණයෙන් හමුවෙන ඛනිජ කුලක වලින් එකක්. ලංකාවේ බහුතර පාෂාණ වර්ග තුළත් Feldspar ඛනිජ අඩංගු වෙනවා.
Labradorite විශේෂයෙන් හඳුනාගන්න පුළුවන් එහි දිලිසෙන වර්ණ විලාසය නිසා. නිල්, කොළ, කහ හෝ දම් පැහැති ආලෝක දිලිසීමක් පෘෂ්ඨයේ දිස්වීම මේ ඛනිජයට විශේෂ ලක්ෂණයක්. මේ හේතුව නිසා සාමාන්‍ය ජනතාවට මෙවැනි mineral මැණික් ගල් ලෙස වැරදි ලෙස හඳුනාගැනීම සාමාන්‍ය දෙයක්.
වැදගත් කරුණක් නම්, Feldspar කුලකයට අයත් ඛනිජවලට මැණික් වටිනාකමක් සාමාන්‍යයෙන් නොතිබීම. ඒවා සමහර අවස්ථාවල අලංකාර පාෂාණ ලෙස හෝ අධ්‍යයන අරමුණු සඳහා භාවිත වුවත්, රත්න විද්‍යාත්මක වශයෙන් උසස් මැණික් ලෙස වර්ගීකරණය කරන්නේ නැහැ.
තවත් රසවත් කරුණක් නම්, අපි හොඳින් දන්න “චන්ද්‍ර පාෂාණ” ලෙස හඳුන්වන Moonstone ඛනිජයත් Feldspar කුලකයටම අයත් වීම. ඒ නිසා Feldspar කුලකය කියන්නේ අපට දිනපතා හමුවෙන සාමාන්‍ය පාෂාණ වල සිට, මැණික් ලෙස හඳුනාගන්නා විශේෂ ඛනිජ දක්වා විශාල පරාසයක් ආවරණය කරන ඛනිජ කණ්ඩායමක්.
සුළි කුණාටු, නායයෑම් සහ දැඩි වර්ෂාපතනය වැනි ස්වභාවික විපත් නිසා බිම් මතුපිටින් නොපෙනුණු පාෂාණ සහ ඛනිජ මතුපිටට එළියට එන අවස්ථා බොහෝ වෙලාවට සිදු වෙනවා. ඒවා දැක මැණික් හමුවුණා කියලා සිතීම ස්වභාවිකයි. නමුත් අවසන් තීරණයක් ගැනීමට පෙර, එවැනි පාෂාණ නිවැරදිව පරීක්ෂා කර විද්‍යාත්මකව හඳුනාගැනීම අත්‍යවශ්‍යයි.
මේ වගේ සිද්ධීන් අපට මතක් කරන්නේ, රත්න විද්‍යාව කියන්නේ පෙනුමට වඩා විද්‍යාත්මක දැනුම මත පදනම් වූ විෂයයක් කියන එකයි. නිවැරදි දැනුමත්, නිවැරදි පරීක්ෂණත් තිබුණොත්ම සැබෑ මැණික් සහ සාමාන්‍ය පාෂාණ අතර වෙනස හඳුනාගන්න පුළුවන්.
(සටහන | R.G.C ජාලිය)
මැණික් විද්‍යාව සම්බන්ධ ජේෂ්ඨ කථිකාචාර්ය
Senior Lecturer in Gemology
Consultant Gemologist
Mining Engineer
(MPhil (Gemology), BSc.Eng(Hons)(Mining), GIA GG, GIA AJP, GIA Pearls Graduate, DGem(SL), AMIE(SL), MGA(SL), MEC(SL))
jaliya.chamal@gamil.com
උපුටා ගැනීම - Chamal Jaliya - Consultant Gemologist ගේ ෆේස්බුක් පිටුවෙන්..
නායගිය කෝවිල ළඟවිචිත්‍රවත් පාෂාණයක් – මැණික් ගලක් ද?
