මෙය 2019 වසරේ නිර්මාණය කරන ලද Ne Zha හි දෙවැනි කොටස වන අතර 16 වැනි සියවසට අයත් චීන පුරාණෝක්ති සහිත නවකතාවක් වූ Investiture of the Gods ඇසුරින් ගොඩ නගා තිබේ.
Investiture of the Gods නවකතාවේ මුල් පිටපත
මෙහි පළමු චිත්‍රපටය වූ Ne Zha, 2019 වසරේ දී ලොව පුරා ප්‍රදර්ශනය වෙමින් ඇමරිකානු ඩොලර් මිලියන 700 (රු. මිලියන 207,000 ක් පමණ) ආදායමක් උපයා ගත්තේය. එහි දෙවැනි කොටසක් ද නිර්මාණය විය යුතුය යන අදහස එහි නිෂ්පාදකවරුන්ට ඇති වූයේ එම ආදායම් මට්ටම පිළිබඳ සලකා බැලීමෙන් අනතුරුවය.
මෙහි අධ්‍යක්ෂ ඩව් ස සහ නිෂ්පාදන කණ්ඩායම න ජාගේ කතාව තවදුරටත් ගවේෂණය කරමින් මිත්‍යා විශ්වයක් මත මේ චරිත වඩාත් ගැඹුරින් ඉස්මතු කිරීම තුළින් සාර්ථකත්වයක් ලැබිය හැකි බව අවබෝධ කර ගත්හ. කොටස් දෙකකින් යුක්ත මේ චිත්‍රපටය තුළින් හුදෙක් විනෝදයම පමණක් නොව ගෝලීය වේදිකාව මත චීන සංස්කෘතිය දිග හැරීම ද අරමුණු කොට තිබෙන බව පෙනේ. එපමණක් නොව ජාත්‍යන්තර මට්ටමේ සජීවීකරණ සිනමා නිර්මාණ බිහි කිරීමේ හැකියාව චීනයට ද පවතින බව පිළිබිඹු කිරීමක් ද මේ තුළින් ඉස්මතු වේ.
චිත්‍රපටයේ කතාව සැකෙවින්
මේ චිත්‍රපටයේ ප්‍රධාන චරිත දෙක වූ න ජා (Ne Zha – මෙය nuh jah ලෙස උච්චාරණය වේ) සහ අව් බිං ( Ao Bing – මෙය Ow Bing ලෙස උච්චාරණය වේ) යනු දිව්‍යමය ආත්මයක පුනරුත්පත්තියකි. ඔවුන් කලින් භවයේ දී ජීවිතය පරිත්‍යාග කරන ලද දෙදෙනෙකි. ඔවුන් නැවත උපත ලද විගසම න ජාගේ උපන් නගරය, සන් ගොං බව් නම් යක්ෂයාගේ සහ මකර කණ්ඩායමක ප්‍රහාරයට ලක් වෙයි. මේ චිත්‍රපටය කුළින් ඉස්මතු කරන්නට උත්සාහ දරන්නේ සතුන්ට දක්වන ආදරය, කරුණාව, ඔවුන් සමග සම්බන්ධකම් පවත්වන්නේ කෙසේද, මිත්‍රතත්වය, පාක්ෂිකත්වය සහ තමා තුළ වූ ශක්තිය සොයා යාම පිළිබඳවය. චීන ජන කතාවල සාරවත් බව මේ සියල්ලක්ම පසුපස පවතී.
Ne Zha 2 චිත්‍රපටය නිෂ්පාදනය කිරීම සඳහා ආසන්න වශයෙන් ඇමරිකානු ඩොලර් මිලියන 80ක් (රු. මිලියන 23,607ක් පමණ) වැය වූ අතර මේ වන විට සජීවීකරණ චිත්‍රපටයක් වෙනුවෙන් චීනය වැය කළ ඉහළතම මුදල් ප්‍රමාණය එය බව පැවසේ. ලොව පුරා මෙය ප්‍රදර්ශනය කිරීමෙන් පසු සියලු ආදායම් වාර්තා බිඳ හෙළමින් උපයා ගන්නට හැකි වූ ඇමරිකානු ඩොලර් බිලියන 2 (රු. බිලියන 591ක් පමණ) මගින් මේ වැය වූ මුදල ඉතා පහසුවෙන්ම පියවා ගන්නට හැකියාව ලැබිණි.
Ne Zha 2 චිත්‍රපටයේ නිෂ්පාදන කාර්යය ඉතා බැරෑරුම් කටයුත්තක් විය. මේ සඳහා සජීවීකරණ සමාගම් 138 ක පුද්ගලයින් 4,000 කටත් වැඩි පිරිසකගේ සහාය ලබාගැනීමට සිදු විය. එය මෙහි පළමු චිත්‍රපටය සඳහා දායක කර ගත් පිරිස මෙන් දෙගුණයකටක් වැඩි පිරිසක් විය. මේ චිත්‍රපටය තුළ දර්ශන 2,400 කටත් වඩා සංඛ්‍යාවක් පවතින අතර විශේෂ ප්‍රයෝග 1,900 කටත් වඩා අඩංගු වේ.
මෙහි නිෂ්පාදක ඩව් ස වෛද්‍ය විද්‍යා උපාධිධරයෙක් වන අතර සිනමා සජීවීකරණය තනිවම හැදෑරූ අයෙක් ලෙස ප්‍රකටය. ඔහු 2008 වසරේ දී සිය සජීවීකරණ වෘත්තිය ආරම්භ කළ අතර ඔහු විසින් නිර්මාණය කරන ලද See Through නම් කෙටි චිත්‍රපටයෙහි වූ අද්විතීය ලක්ෂණ සහ යුද විරෝධී බව නිසා මහත් අවධානයක් යොමු විය. චිත්‍රපට කර්මාන්තය තුළට සාම්ප්‍රදායික නොවන ආකාරයෙන් ප්‍රවිෂ්ට වීම Ne Zha චිත්‍රපට මාලාව නිර්මාණය කිරීම සඳහා නව ජීවයක් ලබා දුන්නේය.
මේ චිත්‍රපටයේ සාර්ථකත්වයත් සමග චීනයේ සංස්කෘතිය සහ දේශීය සහ ජාත්‍යන්තර වශයෙන් බලපෑමක් කළ හැකි නිර්මාණ ඒ සංස්කෘතිය තුළින් මතු කිරීමේ ඇති හැකියාව පිළිබඳ කතිකාවතක් ගොඩ නැගෙමින් පවතී. වින්දනාත්මක කර්මාන්තය තුළ චීනය ලබා ගෙන ඇති දියුණුව පිළිබිඹු කිරීමේ ජාතික අභිමානයේ සංකේතයක් බවට Ne Zha 2 පත්ව තිබේ.
කතාන්දර කීමේ සාම්ප්‍රදායික කලාව සහ තියුණු තාක්ෂණය මුසු කර ගනිමින් චීන සිනමාව පරිණාමයකට ලක් වෙමින් පවතින බව දැක්වීමට Ne Zha 2 චිත්‍රපටය කදිම සාධකයකි. වාර්තා බිඳ හෙළුෑ ආදායම් මට්ටම සහ විචාරක පැසසුම් මගින් පිළිබිඹු වන්නේ මෙහි ඇති උසස් ගුණත්වය සහ සජීවීකරණය තුළ ගැබ්වුණු සිනමාරූපීබවය. චිත්‍රපට කර්මාන්තය තුළ ඉදිරියට ගමන් කරන චීනයට කලාත්මක මෙන්ම වාණිජමය වශයෙන් ද සාර්ථක වන්නේ කෙසේද යන්න පිළිබඳ පෙරමඟ සලකුණක් ලෙස Ne Zha 2 චිත්‍රපටය නම් කළ හැකිය.
hnckcreations@gmail.com
උපුටා ගැනීම -vinivida.lk