රුවන්වැලි සෑ මළුවේ වඳුරන් කී කවි

මේ තුන් ලොවේ තතු නිවැරදි ලෙස දන්න
නොහදමු ඔබෙන් මේ කිසිවක් සඟවන්න
එනිසා හිමියනේ කැප අවසර දෙන්න
මේ ලොව දරුණුතම ගින්නය බඩගින්න


එදවස පාරිලෙයි වනයේ සිටින සඳ
අපගේ එකෙකු විත් බැතියෙන ඇඳිලි බැඳ
සම්බුදු පියාණෙනි ඔබ හට පුදන ලද
ඒ මී වදේ රස තවමත් දැනෙනවද?


හිමි සඳු පරිසරය වෙත පා ඇතත් නෙත
අද නැත එයට යොමු කරනා කෙනෙකු සිත
ඒ දෙස මිනිස් බවකින් නොහෙලුවොත් නෙත
වඳුරෙකුටවත් කන්නට හෙට යමක් නැත


අප හට ‛අනේ නොදකින්’ යැයි කියාගෙන
ඇවිදිති උවැසියෝ වෙනතක් බලාගෙන
මුත් මල් කන්න මොහොතින් පරවෙලා යන
අවසර දෙනු මැනවි හිමියනි දයාවෙන


සුමිහිරි රසය නෙළුමේ මැද නොකමු පෙති
මේවා තමයි හිමියනි අපෙ වඳුරු ගති
දඬුවම් නොදී අප කුසගිනි නිවන නිතී
“යළි බුදුවෙන්න ඔබ හට මේ පිනම ඇතී”

සැ.යු.
මේවා වඳුරන් විසින් කියන ලද කවි නිසා මෙහි ඇති අදහස්වල ධර්මානුකූලභාවය පිළිබඳ වගකීමට අප බැඳී නැති බව කරුණාවෙන් සළකන්න.

| වඳුරන් කියනු අසා පිටපත් කළේ තිලක් සේනාසිංහ
thilaksenasinghe@gmail.com