අයවැය කල් යයි - 2025 මුල් මාස 4ට අතුරු සම්මත ගිණුමක්

ඒ අනුව වසර 2025 මුල් මාස හතර සඳහා පළමුව අතුරු සම්මත ගිණුමකුත් ඉන් අනතුරුව ජාතික අයවැය ලේඛනයකුත් ඉදිරිපත් කිරීමට නව රජයට කටයුතු කරනු  ඇත.  

නොවැම්බර් 14 වැනිදා පැවැත්වෙන මහා මැතිවරණයෙන් පසු බලයට පත්වන රජය, අමාත්‍යාංශ සහ ඊට අදාළ ආයතන ගැසට් කළ යුතුව තිබේ. ඉන් පසු ඒවාට ඉදිරි වසර සඳහා වියදම් සහ සංවර්ධන යෝජනා මෙන්ම ආදායම් ලබා ගැනීම් ඇස්තමේන්තු සකස් කළ යුතුව තිබේ. 

මෙම කරුණු ඉතා ඉක්මනින් සපුරාලීමට කාලයක් නොමැතිකම නිසා වසර 2025 මුල් මාස හතර සඳහා පළමුව අතුරු සම්මත ගිණුමක් ඉදිරිපත් කිරීමට රජය කටයුතු කරනු ඇත.

වසර 2025 මුල් මාස හතරේ රජය අත්‍යවශ්‍ය වියදම් සහ එදිනෙදා කටයුතු සඳහා අවශ්‍ය මුදල් සහ අයවැයට පාර්ලිමේන්තුවේ අනුමැතිය ලබා ගැනීම මෙම අතුරු සම්මත ගිණුම හරහා සිදුකරගනු ඇත. 

ඉන් අනතුරුව විද්‍යාත්මක පදනමක් මත දැනට පවතින අමාත්‍යාංශ සහ ඒවායේ සේවා වෙන්කර ගැනීම්, ඒවා ගැසට් කිරීම සිදුකිරීමට නියමිතය. එලෙස විධිමත් ආකාරයට අමාත්‍යාංශ හා විෂයන් වෙන්කර ගැනීමෙන් පසු වසර 2025 සඳහා සම්පූර්ණ අයවැයක් ඉදිරිපත් කිරීම සිදු කෙරේ. 

මෙම වසර 2025 සඳහා වූ සම්පූර්ණ අයවැය ඉතා කඩිනමින් ඉදිරිපත් කිරීමට රජය ක්‍රියාකරනු ඇතැයි දේශපාලන සහ මුදල් අමාත්‍යාංශ ආරංචි මාර්ග පෙන්වා දෙයි. 

(ජේ. මුණසිංහ)