*මඩෝනාගේ ගීතයක AI කවරයක් ප්‍රස්ථාරවල පෙරමුණ ගැනීම මෙම දැඩි තීරණයට මුල් වී ඇත.
කෘත්‍රිම බුද්ධිය (AI) ආධාරයෙන් සම්පූර්ණයෙන්ම හෝ වැඩි වශයෙන් නිර්මාණය කරනු ලබන ගීත ඔස්ට්‍රේලියානු මියුසික් චාට් සඳහා ඇතුළත් කිරීම තහනම් කර තිබේ. ඔස්ට්‍රේලියානු පටිගත කර්මාන්ත සංගමය (ARIA) විසින් හඳුන්වා දී ඇති නව මාර්ගෝපදේශ යටතේ, ඕනෑම ගීතයක් මියුසික් චාට් එකකට ඇතුලත් වීම සඳහා "ප්‍රධාන වශයෙන්ම මිනිසෙකු විසින් නිර්මාණය කරන ලද්දක්" විය යුතුය යන කොන්දේසිය පැනවී ඇත.
මෙම නව නීති පද්ධතිය හරහා මානව කලාත්මක ස්වභාවය සහ නිර්මාණශීලිත්වය ප්‍රවර්ධනය කිරීම අපේක්ෂා කරන බව ARIA සංගමය පවසයි.
මැඩෝනාගේ ගීත ආවරණයේ ආන්දෝලනය
මෑතකදී ඔස්ට්‍රේලියානු ඩීජේ කලාකරුවෙකු වන ජොෂ් ෆවාස් (Josh Fawaz) විසින් ජනප්‍රිය ගායිකා මැඩෝනාගේ 'Like A Prayer' ගීතය කෘත්‍රිම බුද්ධිය භාවිතයෙන් ප්‍රතිනිර්මාණය කරනු ලැබීය. මෙම ගීතය ඔස්ට්‍රේලියානු ARIA Dance singles chart හි ප්‍රථම ස්ථානයට පත්වූ අතර, රටේ සමස්ත මියුසික් චාට්වල දෙවන ස්ථානයද හිමිකර ගත්තේය.
වාණිජ ගුවන් විදුලි නාලිකාවල නිරන්තරයෙන් ප්‍රචාරය වූ මෙම ගීතය Spotify වේදිකාව පමණක් මිලියන 48කට අධික වාර ගණනක් ශ්‍රවණය කර තිබේ. කෙසේ වෙතත්, දැඩි සමාජ මාධ්‍ය විරෝධතා මධ්‍යයේ ෆවාස් පසුව මෙම ගීතය සඳහා කෘත්‍රිම බුද්ධියේ දායකත්වය ඇති බවට වන බැරෑරුම් තොරතුරු හෙළි කළේය.
නව නීතිරීතිවල ස්වභාවය සහ ජාත්‍යන්තර ප්‍රවණතා
නව නීතිවලට අනුව, ගීත නිර්මාණය සඳහා කෘත්‍රිම බුද්ධියේ සහාය ලබාගැනීම සම්පූර්ණයෙන්ම තහනම් කර නැත. කෙසේ වෙතත්, ගීතයේ පද රචනය, ප්‍රධාන ගායනය සහ ප්‍රධාන වාද්‍ය භාණ්ඩ වාදනය කිරීම මිනිසුන් විසින් සිදු කර තිබිය යුතුය. මීට අමතරව, ගීතයක් මාස්ටර් කිරීම (mastering), ඩ්‍රම් මැෂින් සහ ඔටෝ-ටියුන් (auto-tune) වැනි තාක්ෂණික මෙවලම් භාවිතය තවදුරටත් අවසර ලබා දී ඇත.
මෙම වසරේ මුල් භාගයේදී ස්වීඩනයේ මියුසික් චාට්වලින්ද කෘත්‍රිම බුද්ධියෙන් නිර්මාණය කළ ගීතයක් ඉවත් කිරීමට පියවර ගනු ලැබීය. ජාත්‍යන්තර සංගීත පටිගත කිරීමේ කර්මාන්ත සම්මේලනය (IFPI) විසින් ජූලි මාසයේදී නිවේදනය කළේ, ලතින් ඇමරිකාව, මැදපෙරදිග, අප්‍රිකාව සහ අග්නිදිග ආසියාව යන කලාපවල නිල මියුසික් චාට් සඳහාද AI මාර්ගෝපදේශ ක්‍රියාත්මක කරන බවයි.
කලාකරුවන්ගේ ප්‍රතිචාර සහ ඉදිරි පියවර
ARIA ප්‍රධාන විධායක නිලධාරී ඇනබෙල් හර්ඩ් (Annabelle Herd) සඳහන් කළේ, කලාකරුවන් දැනටමත් තම වැඩකටයුතු සඳහා AI මෙවලම් භාවිත කරන නමුත්, කලාකරුවන්ගේ මුල් පටිගත කිරීම් පදනම් කරගනිමින් තොග වශයෙන් ජනනය වන සංගීතය ප්‍රවර්ධනය කිරීමට තමන් සූදානම් නැති බවයි.
නව නීති යටතේ, කලාකරුවන් මියුසික් චාට් සඳහා ගීත ඉදිරිපත් කිරීමේදී කෘත්‍රිම බුද්ධිය භාවිත කර ඇද්ද යන්න ප්‍රකාශ කළ යුතුය. යම් හෙයකින් පසුව අනාවරණය වුවහොත් මියුසික් චාට්වල ස්ථාන ආපස්සට හැරවීමට හෝ අංක එකේ ස්ථානය සඳහා ලබාදුන් සම්මාන ආපසු ඉල්ලා සිටීමට පියවර ගන්නා බව ARIA පවසා ඇත.
ඔස්ට්‍රේලියානු ඉලෙක්ට්‍රොනික සංගීත කණ්ඩායමක් වන 'පෙකින් ඩක්' (Peking Duk) ඇතුළු ප්‍රමුඛ පෙළේ කලාකරුවන් පිරිසක් මෙම තීරණයට සිය සහයෝගය පළ කර තිබේ. සංගීත කණ්ඩායමේ සාමාජික ඇඩම් හයිඩ් (Adam Hyde) ප්‍රකාශ කළේ කෘත්‍රිම බුද්ධියෙන් නිර්මාණය වන සංගීතය ජීවිතයෙන් මානව අත්දැකීම් ඉවත් කරමින් පවතින බවයි.
මීට අමතරව, ඔස්ට්‍රේලියානු අග්‍රාමාත්‍ය ඇන්තනි අල්බානීස් ද පසුගිය ජූලි මාසයේදී පොරොන්දු වූයේ කෘත්‍රිම බුද්ධි පුහුණු කිරීම් සඳහා කලාකරුවන්ගේ නිර්මාණ භාවිත කිරීමට එරෙහිව දැඩි ආරක්ෂණ විධිවිධාන හඳුන්වා දෙන බවයි.
වැඩිදුර කියවීම සඳහා:
BBC News - Songs created by AI banned from Australia's music charts
වැඩිදුර කියවීම සඳහා:
BBC News - Songs created by AI banned from Australia's music charts
