ජනප්‍රිය, ප්‍රවීණ ගායක මිල්ටන් මල්ලවආරච්චි ගේ ජීවිත කතාව ඇසුරෙන් නිර්මාණය කළ ‘එදා රෑ’ චිත්‍රපටය මෙරට සිනමා ඉතිහාසයේ මෙ‌තෙක් වැඩිම ආදායමක් ඉපැයූ චිත්‍රපටය බවට පත්ව තිබේ.
ඒ, චිත්‍රපටය තිරගත වීම අරඹා දින 40ක් බඳු කෙටි කාලයක් තුළ ශ්‍රී ලංකා රුපියල් ලක්ෂ 8,093ක (රු. 809,300,000) දැවැන්ත ආදායමක් ඉපැයීමෙනි.
මීට පෙර රුපියල් ලක්ෂ 6,300ක ආදායමක් වාර්තා කළ චිත්‍රපටය ‘ධර්මයුද්ධය 2’ චිත්‍රපටය යි. වර්තමානය වන විට එම වාර්තාව අභිබවා යමින් ‘එදා රෑ’ නව සිනමා වාර්තාවක් පිහිටුවා ඇත.
පසුගිය සැප්තැම්බර් 18 වැනිදා සිට දිවයින පුරා සිනමාහල්වල තිරගත වීම ආරම්භ කළ ‘එදා රෑ’ චිත්‍රපටය මේ වන විටත් දිවයින පුරා සිනමා ශාලාවල අඛණ්ඩව තිරගත වෙමින් පවතී.
‘එදා රෑ’ චිත්‍රපටයේ අධ්‍යක්ෂණය අරුණ ජයවර්ධන වන අතර නිෂ්පාදනය One Line Production & Entertainment වෙතිනි.
මිල්ටන් මල්ලවාරච්චිගේ චරිතය ප්‍රධාන වශයෙන් නිරූපණය කරනු ලබන්නේ ප්‍රවීණ රංගන ශිල්පී රොෂාන් රවීන්ද්‍ර විසිනි.
ඊට අමතරව: නෙත්මි රොෂෙල් (ස්වර්ණා), සෙනාලි ෆොන්සේකා (ඇනට්), ශේෂාද්‍රි ප්‍රියසාද් (ශිරාණි), දිනෙත් ද සිල්වා සහ ධර්මප්‍රිය ඩයස් ඇතුළු පිරිසක් රංගනයෙන් දායක වෙති.