මෙම සිනමාපටයේ විශේෂ මාධ්‍ය දර්ශනය පසුගිය 22 වනදා පස්වරුවේ ජාතික චිත්‍රපට සංස්ථාවේ තරංගනී සිනමා ශාලාවේදී උත්කර්ෂවත් අන්දමින් පැවැත්වුණි. එම අවස්ථාවට චිත්‍රපටයේ රංගන ශිල්පීන්, නිෂ්පාදක කණ්ඩායම මෙන්ම කලා ක්ෂේත්‍රයේ ප්‍රවීණයන් සහ මාධ්‍යවේදීන් රැසක් සහභාගී වී සිටියහ.
සත්‍ය සිදුවීම් පෙළක සිනමා රූපණය
1970 සිට 1990 දක්වා කාලසීමාව තුළ මෙරට සිදුවූ සුවිශේෂී සත්‍ය සිදුවීම් මාලාවක් පදනම් කරගනිමින් මෙම චිත්‍රපටය නිර්මාණය වී ඇත. දශක තුනක සමාජ, දේශපාලනික සහ පුද්ගල අත්දැකීම් ගොනු කරමින් නිර්මාණය වූ මෙම කතාව, ප්‍රේක්ෂකයාට අමුතුම අත්දැකීමක් වනු ඇති බවට විචාරකයෝ මත පළ කරති.
දැවැන්ත රංග වින්‍යාසය
මෙම නිර්මාණය තවත් සුවිශේෂී වන්නේ මෙරට සිනමාවේ සහ ටෙලි නාට්‍ය ක්ෂේත්‍රයේ දක්ෂතම ප්‍රවීණ රංගන ශිල්පීන් රැසක් එකම තිරයකදී දැකගත හැකි වීමයි.
සෞම්‍ය ලියනගේ, දිල්හානි අසෝකමාලා, ජගත් මනුවර්ණ, බිමල් ජයකොඩි. පූජන දන්දෙණිය, ශ්‍යාම් ප්‍රනාන්දු, සරත් කොතලාවල, චාන්දනී සෙනෙවිරත්න, සනත් විමලසිරි, සුරාජ් මාපා, සරත් කරුණාරත්න, අංජන ප්‍රේමරත්න සහ සේවියර් කණිෂ්ක ඇතුළු පිරිසක් මීට දායක වෙති.
EMIKA PRODUCTION වෙනුවෙන් ශාන්ත ගීතදේව විසින් නිෂ්පාදනය කරන ලද මෙම චිත්‍රපටයේ තිර රචනය චාමර කොඩිතුවක්කු ගෙනි. සත්‍ය සිදුවීම් පදනම් කරගත් කතා තේමාවකට ප්‍රබල සිනමාමය රූප රාමු එක් කිරීමට අධ්‍යක්ෂ චමින්ද ජයසූරිය ඇතුළු කණ්ඩායම කැප වී ඇත.
ලබන වසරේ මුලදීම සිනමා ශාලා වෙත පැමිණෙන මෙම සිනමා අත්දැකීම විඳගැනීමට දැන් ඔබටත් අවස්ථාව උදා වී ඇත.
