සමලිංගිකත්වයට එරෙහි නීති ඉවත් කරන්න පොහොට්ටුවෙන් පනතක්

ලංකාවෙ සමලිංගිකත්වය අපරාධයක් කරමින් තවමත් නීතිපොතේ පවත්නා

යටත්විජිත නීති ඉවත් කිරීම පිණිස වූ පණතක් ඊයේ (අගෝස්තු 24 වෙනිදා) පාර්ලිමේන්තුවට ඉදිරිපත් කිරීමට නියමිතයි.

තමන් සමලිංගික බව විවෘතව පිළිගත් අපේ රටේ එකම දේශපාලකයා වන මංගල සමරවීරගේ නික්ම යාමෙන් වසරක් ගතවන දිනයේ මේ පනත කතානායකවරයාට බාරදීම විශේෂත්වයක්.

තවත් අමතක නොකළ යුතු සුවිශේෂ කාරණයක් වන්නේ මෙය පුද්ගලික පණතක් ලෙස ඉදිරිපත් කරන්නෙ පොහොට්ටුවේ පාර්ලිමේන්තු මන්ත්‍රී ප්‍රේමනාත් දොලේවත්ත වීමයි. සමලිංගික නිදහස ගැන කයිවාරු ගහන තවත් කොතෙක් ප්‍රගතිශීලීන් පාර්ලිමේන්තුවේ සිටියත් අවසානයේ පොහොට්ටුවේ මන්ත්‍රී කෙනෙක් අතින්ම මෙය ඉදිරිපත් වීම අයිරනියක්.

මේ පනත සකස් කිරීම සඳහා තමන්ට සහාය දීම වෙනුවෙන් සංජීව විමලගුණරත්න සහ අකලංක හෙට්ටිආරච්චිට දොලේවත්ත මන්ත්‍රීවරයා විසින් ස්තුතිය පළ කර තිබුණ.

පොහොට්ටුව යනු මීට වසර කීපයකට ඉහත සමලිංගිකත්වය සහ මිනිස් ලිංගික නිදහස දැඩිවම යටපත් කළ ඊනියා සදාචාරය දඩමීමා කරගත් පක්ෂයයි. නමුත් රනිල් වික්‍රමසිංහ ජනාධිපති වීමත් සමග පොහොට්ටුවෙන් සමලිංගික නිදහස ලබාගැනීම උදෙසා පණතක් ඉදිරිපත් වීම ලොකු සංස්කෘතික පෙරලියක ලකුණක්.

රනිල්, පොහොට්ටු පාක්ෂිකයන් ඒ අයගෙ උවමනා පිණිස යොදවනවාද නැත්නම්, රනිල් විසින් පොහොට්ටුවේ බලය තමන්ගේ උවමනා වෙනුවෙන් යොදාගන්නවාද යන්න නැවත විමසා බැලිය යුතු කාරණයක් වෙනවා.

ලංකාවෙ කළ යුතු ප්‍රගතිශීලී වෙනස්කම් කරනවා එය කළ හැක්කේ ජාතිවාදයේ ආගම්වාදයේ උරුමය දරන පොහොට්ටුව ඇතුලෙන්ම විතරයි.

මේ රට විශාල අගාධයක් කරා ගෙන යන්නට ලිංගිකත්වය යටපත් කිරීම හරහා දැවැන්ත මෙහෙවරක් ඉටු කළ පොහොට්ටුවේ ප්‍රගතිශීලී කොටස් මෙබඳු සංස්කෘතික වෙනස්කම් වෙනුවෙන් පෙරමුණ ගැනීම වැදගත් කාරණයක්. හුදු හොරකම් ඇල්ලීමේ උමතුවෙන් ලුහුබැඳීම පසෙක ලා සිදු කළ යුතු ප්‍රතිසංස්කරණ වෙනුවෙන් ලැබී ඇති අවස්ථාව පාවිච්චියට ගැනීමයි ප්‍රඥාවන්ත වෙන්නෙ.

පවතින දණ්ඩ නීති සංග්‍රහයේ 360 කොටස අනුව ඕනෑම පිරිමියෙක් ගැහැණියක් සහ සතෙක් සමග සොබාදහමට එරෙහි ලිංගික එක්වීමක් පැවැත්වීම දඩුවම් ලැබිය හැකි වරදක් වෙනවා.

මේ අනුව මුඛ සංසර්ගයක් වුවත් සිරගත වීමට හේතුවක් වෙන්න පුළුවන්. 365ඒ වගන්තිය අනුව පුද්ගලයන් දෙදෙනෙක් අතර අසභ්‍ය හැසිරීමක් දඩුවම් ලැබිය හැකි වරදක් වෙනවා. රාජ්‍යය විසින් පුද්ගලයන්ගේ නිදන කාමර තුලට එබී බලන මෙවන් විකාරසහගත නීති වෙනස් විය යුතු බව මේ සියවසේ ජීවත්වෙන ඕනම කෙනෙක් පිළිගන්න කාරණයක්. ප්‍රමාද වී හෝ ඒ සඳහා ක්‍රියාත්මක වීම අගය කළ යුතු කාරණයක්.

(චින්තන ධර්මදාස)
දේශපාලන හා සමාජ විශ්ලේෂක

අධ්‍යක්ෂ - facultyofsex
#truepatriotlk