විශේෂ පොලිස් ඒකකයක් ස්ථාපිත කිරීමට ජනාධිපති වික්‍රමසිංහ උපදෙස් දී ඇතැයි ඇතැම් මාධ්‍යවල පළ වී ඇති වාර්තා අසත්‍ය බව ජනාධිපති කාර්යාල ආරංචිමාර්ග පවසයි.
පසුගිය කාලය පුරාම මෙවැනි කණ්ඩායම් රටේ තැන් තැන් වලින් මතුවූ අතර ඔවුන්ගේ මෙම ක්‍රියා ආණ්ඩුව අපහසුතාවයට පත් කිරීම වෙනුවෙන් සංවිධානාත්මකව කරන ක්‍රියාවක් මිස අහඹු ක්‍රියා නොවේ යැයි ජනාධිපතිවරයා වෙත ලැබුණු බුද්ධි තොරතුරු වලට අනුව 'ආගමික සංහිදියාව රකින්න විශේෂ පොලිස් ඒකකයක්' කඩිනම් පිහිටුවන ලෙස ජනාධිපතිවරයා විසින් උපදෙස් දී ඇතැයි ද මාධ්‍ය වාර්තාවල සඳහන් වේ.
මෙම මාධ්‍ය වාර්තා සම්බන්ධයෙන් අප කළ විමසීමකදී ජනාධිපති කාර්යාලයේ ජ්‍යෙෂ්ඨ නිලධාරියකු පැවසුයේ 'ආගමික පොලිසියක්' පිහිටුවන ලෙස ජනාධිපතිවරයා කිසිවකුට හෝ උපදෙස් දී නොමැති බවයි.
ඉතිහාසයේ නොවූ විරූ අයුරින් රට දරුණු ආර්ථික අස්ථාවර තත්ත්වයකට මුහුණ දී තිබූ අවස්ථාවේ එම තත්ත්වය අසීරුවෙන් ස්ථායීකරණය කරමින් ඉදිරියට ගමන් කරවීම ඇරැඹුමේ දීම ආගමික සංහිදියාව බිද දමමින් ජන කොටස් අතර විරසකයක් ඇති කොට යළි රට කඩා වැට්ටවීමට උත්සායක් ක්‍රියාත්මක වන බවට ලැබුණු බුද්ධි තොරතුරවලට අනුව ඒ සම්බන්ධයෙන් විශේෂ අවධානයක් යොමුකරන ලෙස අදාල බලධාරීන්ට ජනාධිපතිවරයා විසින් උපදෙස්දී ඇතැයි ද එම නිලධාරියා කියා සිටියේය.
ඒ අනුව, ආගමික සංහිඳියාවට බාධා කරන කණ්ඩායම් පිළිබඳව සොයා බලා නීතිය අකුරටම ක්‍රියාත්මක කිරීමට අවශ්‍ය පියවර ගැනීමට මහජන ආරක්ෂක අමාත්‍යංශය තීරණය කර තිබේ.
