1200 x 80 DMirror
 
 

වන්නි දිස්ත්‍රික්කයේ මහජාතිය දෙමළ ජනතාව බව පිළිගනිමින් ශ්‍රී ලංකා පොදුජන පෙරමුණේ අපේක්ෂකයෙක් ඔවුන්  මධ්‍යයේ මුස්ලිම් විරෝධය ඇවිලවීමට උත්සාහ දරා තිබේ.


බැසිල් රාජපක්ෂ හා මහින්ද රාජපක්ෂගේ ඉල්ලීම පරිදි මෙයට මාස දහයකට පෙර වන්නි දිස්ත්‍රික්කය භාරගත් බව පවසන පොහොට්ටුවේ අපේක්ෂකයා පවසා ඇත්තේ ප්‍රදේශයේ මහජාතිය වන දෙමළ ජනතාව මෙන්ම  සිංහලයන්ද දුක් විඳින්නේ මුස්ලිම් නායකයන් වන්නිය පාලනය කිරීම නිසා බවයි.

"වන්නි ජනගහනයෙන් 70% ක් දමිළ. ඉතිරි තිහ සිංහල, මුස්ලිම්. මම සළකන්නේ මේ වන්නියේ මහ ජාතිය හැටියට දමිළ ජනතාව. නමුත් වසර ගණනාවක ඉඳලා මේ වන්නිය පාලනය කරන්නේ මුස්ලිම් නායකයෙක්. මේ දමිළ ජනතාවත් සිංහල ජනතාවත් දුක් විඳින්න ප්‍රධාන හේතුව තමයි මේ මුස්ලිම් නායකයන් වන්නිය පාලනය කරන එක,” යැයි මුස්ලිම් දේශපාලනඥයන්ට දේශමාන්‍ය ජනක නන්ද කුමාර චෝදනා කළේ, මුලතිව් දිස්ත්‍රික්කයේ මාමුලෙයි හි පැවති මැතිවරණ ප්‍රචාරක රැළියක් අමතමිනි.

කාන්තාවන්ට සමච්චල්  

ඒ අතරම දෙමළ ජාතික සන්ධානයේ වන්නියෙන් තේරී පත් වූ මන්ත්‍රීවරුන්ගේ භාර්යාවන් දැක තිබේදැයි විමසූ අපේක්ෂක නන්ද කුමාර "මම නම් දැකලා තියෙනවා. මම ඉන්නේ කොළඹනේ. හරියට හින්දි නිළියෝ වගේ," යි මුළුමනින්ම පාහේ පිරිමි වාඩිගෙන සිටි සභාව හමුවේ සමච්චලයට ලක් කළේ  කණ, කර පළඳා ඇති අයුරු රඟ දක්වමිනි.

දෙමළ ජාතික සන්ධානයේ මන්ත්‍රීන් සුඛෝපභෝගී ජිවත ගෙවන බවට බැටදුන් බැසිල් රාජපක්ෂ ඇමැති සමයේ ඔහුගේ ලේකම්වරයකු වූ ජනක නන්ද කුමාර ද කොලඹින් විත් අංගාරක්ෂකයන් පිරිවරා අධි වන්නියට ගොඩ බැස්සේ සුඛෝපභෝගී වාහනයකි. 

පසුගිය 7 දා මුලතිව්හි පැවති ජන හමුවක් ඇමතූ පොහොට්ටු අපේක්ෂකයා මුස්ලිම් විරෝධය ජනිත කිරිමට සිය කාලයෙන් වැඩිපුර කාලයක් ප්‍රාදේශීය මුස්ලිම් ජනනායකයන්ගේ නම් ද  සඳහන් කරමිනි. චන්දය දිනා ගැනීමෙන් පසු මුස්ලිම් ජනනායකයන් සලකන්නේ සිය ජාතියට පමණක් යැයි දෝෂාරෝපණය කළ පොහොට්ටු අපේක්ෂක නන්ද කුමාර  "සෙරෙප්පු මහපු, පෙට්ටි කඩදාගෙන හිටිය  මුස්ලිම් ජනයා අද රාජ්‍ය සේවකයෝ වෙලා," යි මුස්ලිම් විරෝධය කුළු ගැන්වීය.

දෙමළ බහුතරයක් වාසය කරන ප්‍රදේශයක පැවති එම රැස්වීමේ වේදිකාව පසුපස බැනරයේ අපේක්ෂකයාගේ නම මුද්‍රණය කර තිබුනේ ද නිවේදකයන් විසින් ඔහු හඳුන්වා දෙනු ලැබුවේද “නන්දකුමාර්” යනුවෙන් දෙමළ ඌරුවටය.  

 

subscribeYT

subscribeYT

WhatsApp Image 2021 09 13 at 13.49.58