1981 සිට මේ දක්වා මාධ්‍යවේදීන් 117 ඝාතනය හෝ අතුරුදහන් කර ඇති බවත්, ඒ වාගේම අසීමිත සංඛාවක් විශාල පීඩන වලට ලක්ව තිබෙන බවත් 'සාධාරණ සමාජයක් සඳහා වූ ජාතික ව්‍යාපාරයේ' කැඳවුම්කරු කරු ජයසුරිය පවසයි.
හෙතෙම එබව කියා සිටියේ, 'සාධාරණ සමාජයක් සඳහා වූ මාධ්‍යවේදී සංගමය' ඊයේ (26) සංවිධානය කර තිබු උත්සවයක් අමතමිනි.
මාධ්‍ය නිදහස වෙනුවෙන් දිවි පිදූ මාධ්‍යවේදීන්ට උපහාර පිදීම සඳහා එම උත්සවය සංවිධානය කර තිබිණ.
''මෑත යුගයේ අපි දකින්නේ වෙනත් මාධ්‍ය සංස්කෘතියක්. අද පහර දෙනවා වෙනුවට නිවාස වලට පැන මාධ්‍යවේදීන් අත්අඩංගුවට ගෙන ඒ අයගේ පරිගණක රැගෙන ගොස් හිරිහැර කරනවා. බොරු ප්‍රකාශ ගන්න බල කරනවා. තමන් කැමති දේශපාලකයින් ජයග්‍රහණය කිරීම සදහා අමූලික බොරු ගොතනවා. චරිත ඝාතනය කරනවා. ජාති, ආගම් බේද ඇති කරනවා. ආගම වෙළද භාණ්ඩයක් කරගන්නවා. මේ නිසා අපි ඉතිහාසයේ නොවූ විරූ භයානක අභියෝගයකට රටක් වශයෙන් මුහුන දී සිටිනවා. මෙහි ආදීනව ගෙවන්න වන්නේ ඊළග පරපුරට. '' යයි කරු ජයසුරිය එහිදී පැවසිය.
කරු ජයසුරිය හිටපු කතානායකවරයා එහිදී මෙසේද සඳහන් කළේය.
''අද අපි කරන්නේ ජාතික යුතුකමක් ඉටුකිරීම. ඒ වෙනුවෙන් අද අප සිහිකරන කීර්තිමත් මාධ්‍යවේදීන් අප වෙනුවෙන් සිය ජීවිත පරිත්‍යාග කර තිබෙනවා. ''
අපට ලැබී ඇති වාර්තා අනුව 1981 සිට මාධ්‍යවේදීන් 117 ඝාතනය හෝ අතුරුදහන් වෙලා තිබෙනවා. ඒ වාගේම අසීමිත සංඛාවක් විශාල පීඩන වලට ලක්ව තිබෙනවා.
මේවා සිහිවන විට අපට විශාල මානසික වේදනාවක් ඇතිවෙනවා. ශීලාචාර රටක මෙවැනි කෲර, අමානුෂික ක්‍රියා ඇති විය හැකි ද?
අද ඔබත් මමත් මෙහි රැස්වෙලා තියෙන්නේ ඒ ශ්‍රේෂඨ පුද්ගලයන්ට උපහාරය, ගෞරවය පුද කරන්න. එහෙම නැත්නම් අපේ ණය ගෙවන්න.
මෙවැනි උපහාර උත්සවයක් අන්තිමට පැවැත් වූයේ 2015 වර්ෂයේ දී අවුරුදු 5කට පෙර. නිදහස් මාධ්‍ය ව්‍යාපාරය විසින් එහි එකල කැදවුම් කරු සුනිල් ජයසේකර අද මෙතැන සිටිනවා. එමෙන්ම (දිවංගත) සමන් වගආරච්චිත් මෙයට විශාල ශක්තියක් ලබා දුන්නා.
මෙම උත්සවය යෝජනා කර සංවිධානය කරන්න කැඳවුම්කරු ප්‍රියන්ත ශ්‍රීලාල් මැතිතුමා ඇතුළු කණ්ඩායම ඒ වෙනුවෙන් විශාල වෙහෙසක් දැරුවා. කැපවීම් කළා. මාධ්‍ය නිදහස රැකගැනීමට ඔබට අනාගතයේ විශාල අභියෝග ඇති වෙයි. ඒ ගමනෙදි ඔබත් සමඟ අපි දිගටම රැඳී සිටිනවා.
අපගේ මාධ්‍යවේදීන් විදි දුක් ගැහැට අපි හොදට දන්නවා, එදා මාධ්‍යවේදීන්ට වෙඩි තැබූ විට නිවාස, කාර්යාල වෙඩි තබා, බෝම්බ ගැසූ විට, පහර දුන් විට අපි ක්‍රියාත්මක වූ ආකාරය සිහිවනවා. මෙහි සිටින සමහර ජ්‍යෙෂ්ඨ මාධ්‍යවේදීන් එම ස්ථානයන් හිදී අපට හමු වී තිබෙනවා. එතුමන්ලා නැවතත් දැකීම අපට සතුටක්.
කුරුණෑගල කුඹුක්ගැටේ දී පහරදීමකට ලක් ව රෝහල් ගතවීමට සිදු වූ ධර්මසිරි බණ්ඩාරනායක ඇතුළු කණ්ඩායමේ කිහිප දෙනෙක් හා නිට්ටඹුවේ දී දරුණු පීඩනයට මුහුණදුන් කලාකරුවන් අද මෙහිදී හමුවුණා. ඒ අය ලේ හැලුවේ නිදහස් පිරිසිදු මාධ්‍යයක් වෙනුවෙන්.
මධ්‍යය යනු ගෞරවනීය සේවයක්, ජනතාවට සත්‍ය තොරතුරු ලබා දීම අපක්ෂපාත මාධ්‍යයවේදියකුගේ යුතුකම.
අද මාධ්‍යවේදීන්ට සමහර පුවත්පත් ප්‍රධානීන්ගේ විධාන වලටත් යටත්වෙන්න වෙනවා. බොරු මවන්න වෙනවා. ඇත්ත බොරු කරන්න වෙනවා. චරිත ඝාතන කරන්න වෙනවා. සමහර චරිත පුම්බන්න වෙනවා. මේකයි අපේ සමහර ආයතන වල මාධ්‍යය සංස්කෘතිය. ''
හෘදසාක්ෂියට එකගව සිය මාධ්‍යය මෙහෙවර ඉටු කරන වැදගත් මාධ්‍යවේදීන් අප රටේ සිටීම වාසනාවක්. අපගේ ආචාරය ඔවුනට පුද කරනවා.
මේ අපි කථාකරන්නේ කරුණු දැනගෙන. අපි ඒ කුහක සංස්කෘතිය වෙනස් කළ යුතුයි. එයට නායකත්වය දීම මෙහි පැමිණ සිටින ඔබ අපගේ යුතුකමක්.
ඇත්ත තොරතුරු දැන ගැනීම මූලික මිනිස් අයිතිවාසිකමක්. ඒවා අප ලබාගත්තේ ලෙහෙසියෙන් නොවෙයි.
20වැනි සංශෝධනය තුල එම අයිතිය කොතෙක් දුරට රැකේදැයි අපට හිතන්න බෑ. අපි ඒ වෙනුවෙන් පෙනී සිටිනවා.
''අපි යුක්තිය, සත්‍ය හා සාධාරණය වෙනුවෙන් ගෞරවනීය සෝභිත හිමිපාණන් නායකත්වය දුන් දර්ශනය අනුව ඉදිරියට යනවා. අපි ස්වාධීන අපක්ෂපාතී සිවිල් සංවිධානයක්. අපිට, රජුන්, ජනාධිපතිවරුන්, අගමැතිවරුන් බිහි කරන්න අවශ්‍යතාවයක් නැහැ. ''
නමුත් මේ රටේ ජනතාවගේ 20වැනි සංශෝධනයෙන් විනාශ කළ මූලික අයිතිවාසිකම් රැක දීමට අපට සිදුවනවා. එය එතරම් භයානකයි.
අපි බලධාරීන්ට කරුණාවෙන් කියන්නේ එම අයිතිවාසිකම් අහිමි කරන්නට නැති කරන්නට උත්සාහ කරන්නට එපා. දැනටමත් නරක සලකුණු අපට පෙනෙනවා.
ඒ අයිතිය ආරක්ෂා කිරීමට ඊළග පරපුරට රැක දීමට, අපි නැගී සිටිනවා. පූර්ණ වශයෙන් කැපවනවා.'' යයි ද කරු ජයසුරිය වැඩිදුරටත් කියා සිටියේය.
################
සර්, රේගුවට අයථා බලපෑම් කරන දේශපාලකයන්ට මොකද කරන්නෙ?
ගරානා මාෆියාව, රෝයල් ප්‍රින්සිපල් එලවයි ද ?
