කුරුණෑගල දී රුසියානු කෝවිඩ් එන්නත හදන්න යයි ?

කෝවිඩ් 19 මර්ධනය කිරීම සඳහා රුසියාව විසින් හඳුන්වා දී ඇති 'ස්පුත්නික් වී' එන්නත මෙරට තුලදී

නිෂ්පාදනය කිරීම සඳහා මේවනවිට පරීක්ෂණ ආරම්භවී ඇතැයි වාර්තාවේ.

 

 රුසියානු 'ස්පුට්නික් වී' එන්නත මෙරට හදිසි භාවිතය සඳහා ජාතික ඖෂධ නියාමන අධිකාරියේ අනුමැතිය ද හිමිව තිබේ.

 

 මෙරට තුළ භාවිතය සඳහා අනුමැතිය හිමිවූ දෙවන කොවිඩ් මර්දන එන්නත වන්නේ රුසියාවේ නිෂ්පාදිත “ස්පුට්නික් වී” එන්නතයි.

 

මීට පෙර ඔක්ස්ෆර්ඩ් ඇස්ට්‍රාසෙනිකා එන්නත මෙරට භාවිතය සඳහා ජාතික ඖෂධ නියාමන අධිකාරිය අනුමැතිය ලැබිණ. 

 

ඖෂධ නිෂ්පාදන, සැපයීම් හා නියාමන රාජ්‍ය අමාත්‍ය මහාචාර්ය චන්න ජයසුමන පසුගියදා කියා සිටියේ, රුසියානු “ස්පුට්නික් වී” එන්නත නිපදවීමට යොදාගෙන ඇත්තේ ඔක්ස්ෆර්ඩ් ඇස්ට්‍රාසෙනිකා එන්නත නිපදවීමට යොදාගත් ක්‍රමවේදයට සමාන ක්‍රමවේදයක් බවයි.

 

 

 

ස්ටුට්නික් එන්නතෙහි ඵලදායිතාවය පිළිබඳව රුසියාව සහතික කර තිබුණත් බටහිර රටවල් රැසක් තවමත් එය භාවිතය සඳහා අනුමත කර නොමැත.

 

එසේවුවද රුසියානු ස්පුට්නික් කොරෝනා එන්නත් මිලියන 7 ක් ආනයනය කිරීමට අනුමැතිය ලැබී ඇතැයි රාජ්‍ය අමාත්‍ය සුදර්ශනී ප්‍රනාන්දුපුල්ලේ පවසයි.

 

එම රුසියානු එන්නත් තොගයක් ළඟදීම ශ්‍රී ලංකාවට ගෙන ඒමට නියමිත අතර මෙරටට අවශ්‍ය ඉතිරි ප්‍රමාණය මෙරටදී නිෂ්පාදනය කිරීමට මේවනවිට සුදානම් වේ. 

 

 

 

 

 

'නවාරා කැපිටල්' නැමති සමාගමක් ඒ සඳහා ඉදිරිපත්ව ඇති  බව සෞඛ්‍ය අමාත්‍යංශ ආරංචිමාර්ග පවසයි.

 

එම ආරංචිමාර්ග වලට අනුව එම සමාගම ඒ සඳහා යොදාගෙන ඇත්තේ නිව්ජන් ලංකා (NewGen Lanka Healthcare Pvt Ltd) නැමැති සමාගමට අයිතිව තිබු කුරුණෑගල පන්නල පිහිටි ඖෂධ නිෂ්පාදනාගාරයකි.

 

මෙම ඖෂධ නිෂ්පාදනාගාරය මිට ඉහත දී පවත්වාගෙන ගියේ හිටපු සෞඛ්‍ය අමාත්‍ය වෛද්‍ය රාජිත සේනාරත්නගේ සමීපතම හිතවතකුවන PC ෆාමා නමැති සමාගමක හිමිකාර රිසාන් නමැත්තකු විසිනි. 

 

අධිකරණ විසින් ලබාදී තිබු වාරණයකින් පසුව එම සමාගම 'නිව්ජන් ලංකා' (NewGen Lanka Healthcare Pvt Ltd) නමින්ද ක්‍රියාත්මක වී ඇත. 

 

වෛද්‍ය රාජිත සේනාරත්න සෞඛ්‍ය අමාත්‍යවරයාව සිටියදී මෙම ඖෂධ නිෂ්පාදනාගාර තුල පිළිකා මර්ධන ඖෂධ නිෂ්පාදනය කිරීමට පියවර ගෙන තිබුන ද එහි ප්‍රමිතිය සම්බන්ධයෙන් ඖෂධ නියාමන අධිකාරියේ අනුමැතිය හිමි නොවිය. 

 

එම තත්වය යටතේ කලක් වසා දමා තිබුන මෙම ඖෂධ නිෂ්පාදනාගාරය, ආණ්ඩුවට සම්බන්ධය ප්‍රකට ව්‍යාපාරිකයකු විසින් රුසියානු ස්පුට්නික් කොරෝනා එන්නත නිෂ්පාදනය කිරීම සඳහා යළි නවීකරණය කර ඇතැයි 

වාර්තාවේ.