1200 x 80 DMirror
 
 

කොළඹ වරාය නගරය වෙනුවෙන් වත්මන් ආණ්ඩුව රටේ නීතිය බරපතල ලෙස නොසලකා හරින බවට
දිවයිනේ පුද්ගලික අංශයේ මුල් පෙලේ වෘත්තීය සමිතියක් චෝදනා කරයි.
 
 ජනපති සහ අගමැති රාජපක්ෂ සොහොයුරන් වෙත ලිපියක් යොමු කරමින් නිදහස් වෙළඳ කලාප සහ පොදු සේවා සේවක සංගමය දන්වා ඇත්තේ කොළඹ වරාය නගරය විශේෂ ආර්ථික කලාපය සඳහා නියාමන කළමනාකරණ කොමිෂන් සභාවක් පිහිටුවීමට අදාලව 2021 මාර්තු 19 දිනැති “කොළඹ වරාය නගරය ආර්ථික කොමිෂන් සභාව” යනුවෙන් ප්‍රකාශිත ගැසට් පත්‍රය සහ ඒ හා බැඳුනු කැබිනට් තීන්දුව පිළිබඳව වගකිවයුතු වෘත්තීය සමිතියක් ලෙස සිය සංගමය බරපතල කණස්සල්ලෙන් පසුවන බවයි.
 
 
ජනාධිපති ගෝඨාභය රාජපක්ෂගේ මූලිකත්වයෙන් වන මෙම ආණ්ඩුව නිතර පොරොන්දු වන “එක රටක් - එක නීතියක්” යන්න නොසලකා හරිමින් “රටේ නීතිය” බරපතල ලෙස අතහැර දමන සහ ඉන් නිදහස් කෙරෙන බව මෙයින් හෙළිවන බවත් එම ලිපියේ ඉහලින්ම සදහන් කර තිබේ.
 
Anton Maksනිදහස් වෙළඳ කලාප සහ පොදු සේවා සේවක සංගමයේ සම ලේකම් ජ්‍යෙෂ්ඨ වෘත්තිය සමිති නායක ඇන්ටන් මාකස්, සිය ලිපිය මගින් පෙන්වා දී ඇත්තේ කොළඹ වරාය නගරය ආර්ථික කොමිෂන් සභාව සඳහා ගැසට් කරන ලද පනත් කෙටුම්පත මඟින් එවන් කලාපයක් තුළ සිට සහ කලාපය සමඟ ව්‍යාපාර සහ වෙනත් කටයුතු කරගෙන යාම සඳහා ලියාපදිංචි කිරීම්, බලපත්‍ර, අවසර සහ වෙනත් අනුමැති ලබාදීමේ පූර්ණ බලය යෝජිත කොමිෂන් සභාවට පවරා ඇති බවයි.
 
වෘත්තිය සමිති නායකයා තව දුරටත් පෙන්වා දෙන්නේ  එමඟින් අලුතින් නිර්මාණය කරන ලද කොළඹ වරාය නගරයේ භූගෝලීය ප්‍රදේශය තුළ සුවිශේෂී බලයක් මෙම කොමිෂන් සභාවට ලබා දෙන අතරම, මෙම විශේෂ ආර්ථික කලාපයට නාගරික සංවර්ධන අධිකාරි පනත, මහ නගර සභා ආඥා පනත (252 වන පරිච්ඡේදය), ශ්‍රී ලංකා වාණිජ සමථකරණ මධ්‍යස්ථාන පනත, නගර සහ ග්‍රාම නිර්මාණ ආඥා පනත (269 වන පරිච්ඡේදය), ක්‍රමෝපායන සංවර්ධන ව්‍යාපෘති පනත, පොදු කොන්ත්‍රාත් ගිවිසුම් පනත සහ ශ්‍රී ලංකා ආයෝජන මණ්ඩලය යන නීති පනත් හත  බල නොපාන බවද ගැසට් පත්‍රයේ දක්වා ඇති බවයි.
 
 
 
ඩොලරයට මුල්තැන
 
 
 jpg විශේෂ ආර්ථික කලාපය තුළ ගනුදෙනු සඳහා අවසර දී ඇති ප්‍රධාන මුදල් ඒකකය සම්බන්ධයෙන්ද ජ්‍යෙෂ්ඨ වෘත්තිය සමිති නායකයා විමතිය පළ කර තිබේ.
 
 
 
 "විශේෂ ආර්ථික කලාපය තුළ ගනුදෙනු සඳහා අවසර දී ඇති ප්‍රධාන මුදල් ඒකකද විමතියට හේතුවන සාධකයකි. කෙටුම්පත් පනතේ දක්වා ඇති සියල්ලට අනුව එක්සත් ජනපද ඩොලරය ප්‍රධාන වූ සහ අනෙක් විදේශ මුදල් ඒකක මත ගනුදෙනු කෙරෙන්නේය. ඉතා දැඩි කොන්දේසි යටතේ ශ්‍රී ලංකාවේ රුපියල භාවිතා කිරීමට අවසර ලබාදී ඇති බවත් ඉන් පෙන්නුම් කරයි."
 
 ඇන්ටන් මාර්කස් පෙන්වා දෙන පරිදි ආදායම, අගය එකතු කිරීම, සුරාබදු, රේගු සහ හර බදු සහ වරාය, ගුවන්තොටුපල සහ අපනයන සංවර්ධන බදු වැනි දෙවන උපලේඛනයේ ලැයිස්තුගත කර ඇති පනත් දහහතරකින් (14) ව්‍යාපාර අර්ධ වශයෙන් හෝ පූර්ණ වශයෙන් නිදහස් කිරීමට මෙම කොමිෂන් සභාවට බලය පවති.
 
 
තවද, එහි දැක්වෙන ආකාරයට කොමිෂන් සභාවට අවශ්‍ය විටෙක කැසිනෝ ව්‍යාපාර (නියාමනය කිරීමේ) පනත මෙන්ම “1971 අංක 45 දරන කම්කරුවන්ගේ රක්ෂාව අවසන් කිරීමේ (විශේෂ විධිවිධාන) පනත” බලපාත්මක කිරීමෙන් නිදහස් කළ හැකිය.
  
“කලාපය තුළ” පමණක් යැයි තීරණය කරන ලද ව්‍යාපාර සඳහා වන සහන සහ වරප්‍රසාද කොමිෂන් සභාව නීත්‍යානුකූලව ස්ථාපිත කළ දින සිට වසර පහක කාලයක් ඇතුළත රටේ ඕනෑම ප්‍රදේශයකට අදාල කළ හැකි බව 64 (1) වගන්තියේ සඳහන් වන බවත් නිදහස් වෙළඳ කලාප සහ පොදු සේවා සේවක සංගමය ජනපති සහ අගමැති වෙත යොමු කළ ලිපිය මගින් පෙන්වා දී තිබේ.
 
 කොළඹ වරාය නගර කොමිෂන් සභාව පනතේ 64 (1) වගන්තියේ සඳහන් විශේෂ හිමිකම් සහ නිදහස නීතියක් ලෙස සම්මත වුවහොත්; එය මූලික අයිතිවාසිකම් සහතික කරන ආණ්ඩුක්‍රම ව්‍යවස්ථාවේ 14 (1) වගන්තියට පටහැනි විය හැකි අතර පෞද්ගලික අංශයේ සියලුම හෝ බොහෝ සේවකයන්ගේ තත්ත්වය, අයිතිවාසිකම් සහ වරප්‍රසාද කෙරෙහි එය අහිතකර ලෙස බලපැවැත්වීමට ඉඩ ඇති බවට නිදහස් වෙළඳ කලාප සහ පොදු සේවා සේවක සංගමය අනතුරු අගවයි.
 
තවද, කම්කරු නීති නිදහස් කිරීමට හෝ සංශෝධනය කිරීමට කොමිෂන් සභාවට ලබා දෙන බලය සමග මෙය බරපතල නීතිමය විධිවිධානයක් වන අතර, එය රට තුළ නීති කට්ටල් දෙකක් තහවුරුවීමට අනිවාර්යයෙන්ම හේතු විය හැකි බව ඇන්ටන් මාර්කස් ජනාධිපති ගෝඨාභය රාජපක්ෂට සහ අගමැති මහින්ද රාජපක්ෂට දැනුම් දී තිබේ.
 
 දශක හතරකට පමණ ඉහතදී මෙවැනිම උත්සාහයක් වෘත්තිය සමිති මැදිහත්වීමෙන් වලකාලු  ආකාරයත් ඇන්ටන් මාර්කස් වත්මන් පාලකයන්ට සිහිපත් කර දී තිබේ.
 
 "මීට වසර 40 ට පමණ පෙර මහා කොළඹ ආර්ථික කොමිෂන් සභා පනත යටතේ නිදහස් වෙළඳ කලාප පිහිටුවීමට නියමිතව තිබියදීද මෙවන් උත්සාහයක් තිබුණි. වෘත්තීය සමිති මැදිහත්වීම් තුළින්, එවකට පැවති ජනාධිපති ජයවර්ධන ආණ්ඩුව විසින් මහා කොළඹ ආර්ථික කොමිෂන් සභා පනතේ එවැනි කම්කරු විරෝධී විධිවිධාන පැනවීම වළක්වාලනු ලැබණේ රට තුළ වෙනස් නීති මාලාවක් තිබිය නොහැකි බව ශ්‍රේෂ්ඨාධිකරණය විසින් තීරණය කළ බැවින් ඒ අනුව මහ කොළඹ ආර්ථික කොමිෂන් සභා පනත සංශෝධනය කරන්නට සිදු වූයෙනි."
 
කොළඹ වරාය නගරය කොමිෂන් සභාව වෙත පවරා ඇති මෙවැනි සියලු බලතල ෆෙඩරල් රාජ්‍යයක් තුළ ෆෙඩරල් පාලන අධිකාරියකට වඩා බලවත් යැයි කෙනෙකුට කියැවිය හැකි බව ඇන්ටන් මාර්කස්ගේ අදහසයි.
  
එබැවින් ගැසට් පත්‍රයේ පළකළ කොළඹ වරාය නගරය ආර්ථික කොමිෂන් සභාව සඳහා වන පනත් කෙටුම්පත පාර්ලිමේන්තු න්‍යාය පත්‍රයට ඇතුලත් කිරීමද ඇතුළුව සියලු ඉදිරි පියවර තාවකාලිකව නවත්වන ලෙසත් වෘත්තීය සමිති, වෘත්තිකයන්ගේ සංවිධාන සහ සමාජ සංවිධානවලට අදාල කෙටුම්පත සවිස්තරාත්මකව සාකච්ඡා කිරීමට සහ නිසි නියෝජනයක් ආණ්ඩුවට ලබා දීමට අවම වශයෙන් මාස තුනක  කාලයක් ලබා දෙන ලෙස නිදහස් වෙළඳ කලාප සහ පොදු සේවා සේවක සංගමය   ආණ්ඩුවෙන් ඉල්ලා තිබේ.
 
 "අප විශ්වාස කරන අයුරු එය ජනතාව සතු අයිතියකි," යි ජනපති, අගමැති වෙත යොමු කළ ලිපියේ  ලිපියේ වැඩි දුරටත් සඳහන්ය.
 

 


 

 

THE LEADER TV

 

රට කෑ කැරොලයින් නාඩගමේ තිරයෙන් පිටුපස කතාව!

 

දොලවත්ත කියන්නේ වහ කන කතාවක්නේ 'ස'

 

subscribeYT

subscribeYT

WhatsApp Image 2021 09 13 at 13.49.58

නවතම පුවත්