'සූම් පංති' : ගුරුවරියන්ට ගෙදරදී සාරි ඔසරි පැළඳ සිටින්නට විධාන! - කුසල් පෙරේරා

 

අදාල කතාව වූයේ ඇතැම් ප්‍රධාන නගරවල ඇති ජනප්‍රිය පාසල් කිහිපයක විදුහල්පතිවරුන්/විදුහල්පතිනියන් තම පාසල්වල ගුරුවරියන්ට පාසල් එන ආකාරයට ඔසරිය හෝ සාරිය හැඳ පැළඳ අන්තර්ජාලයේ “සූම් පංති” පැවැත් විය යුතු බවත් ළමුන් පාසල් නිල ඇඳුම හැඳ එම දුරස්ථ පරිඝණක පංති සඳහා සහභාගි විය යුතු බවත් දන්වා ඇත යන්න ය.

 

  

මේ වෘත්තිමය වගකීම ඉටු කෙරෙන්නේ ගුරුවර ගුරුවරියන් තමන්ගේ අතේ වියදමින් අන්තර්ජාල විද්‍යුත් දත්ත මිලට ගෙන ඉගැන් වීමෙනි. එළෙස මිලට ගන්නා විද්‍යුත් දත්ත පාසල් යන තම දරුවන්ටද ලබා දිය යුතු වන්නේය. 

 

එනිසා ඔවුන් පෙළඹී ඇත්තේ මිල අඩු පාන්දර යාමයේ පංති කිරීමට ය. එය දරුවන්ට හා දෙමාපියන්ටද වාසිවන හෙයින් ඊට එතරම් විරෝධයක් නැත. 

 

සාමාන්‍යයෙන් පාසල් යාමට පෙර කළ ගේ දොර වැඩ කෙසේමුත් කළ යුතු හෙයින් පාන්දර පංති කිරීම අසීරු වූවත් මුදල් සාධකය මත ගුරුවර ගුරුවරියන්ද එයට කර ගසති.

 

  

 එහෙත් එසේ පෙනී සිටින්නේ පාසල් ළමුන් ඉදිරියේ වන හෙයින් සාමාන්‍ය ඇඳුමක් පැළඳ “සූම් පංති” කිරීමට ගුරුවර ගුරුවරියන්ට උපදෙස් දීම විදුහල්පතිවරුන්ගේ සහ කලාප අධ්‍යාපන අධිකාරියේ වගකීම මෙන්ම යුතුකමද වන්නකි.

 

එසේ නොකර, ගුරුවරියන්ට සාරි ඔසරි පළඳින්නට හා ළමුන්ට පාසල් නිල ඇඳුම පළඳින්නට විදුහල්පතිවරුන්/විදුහල්පතිනියන් නියෝග කිරීම, ඔවුන්ගේ වගකීමෙන් පරිබාහිර අලුත් බලයක් ආරෝපනය කර ගත්තකි. 

 

මේ බලහත්කාරය ගුරුවර ගුරුවරියන් මෙලෙසින් බාරගත හොත් ගුරු සේවය විදුහල්පතිවරුන්ගේ/විදුහල්පතිනියන්ගේ පෞද්ගලික යටත් සේවාවක් බවට පත් විය හැකි අතර, විදුහල්පති තනතුර පාසල් පරිපාලනය හා පාසල් විනය නියාමනය කිරීමට සීමා වූවක් බව සැමට අමතක වනු ඇත.

 

එනිසා මෙලෙස වර්ධනය වන තත්ත්වයන්ට මැදිහත් විය යුත්තේ ගුරු සංගම් ය. එහෙත් මේ ඉන්නා ගුරු සංගම් නායකයින් සිතා සිටින්නේ ඔවුන්ගේ ජනප්‍රියත්වය හා වගකීම ඇත්තේ වැටුප් වර්ධක, වැටුප් වැඩිවීම් හා විෂමතා වෙනුවෙන් පෙනී සිටීම මත පමණක් යැයි කියා ය.

 

ගුරු සංගම් ගැන විශ්වාසයක් තැබිය නොහැකි පසුබිමක තම ගුරු වෘත්තියෙහි වගකීම් හා ගරුත්වය රැක ගැනීමට සිදුවන්නේ ගුරුවර ගුරුවරියන්ටම ය.