බෞද්ධ භික්ෂුවකගේ උපසම්පදාව (මහණකම) අහිමි වීම සහ සිවුරු හැරවීම සම්බන්ධයෙන් භික්ෂු විනය තුළ මෙන්ම ශ්‍රී ලංකාවේ නීති පද්ධතිය තුළ ද ඇත්තේ පැහැදිලි ප්‍රතිපාදනයි. පූජ්‍ය ගලගොඩඅත්තේ ඥානසාර හිමියන් සිරගත වීමත් සමඟ, භික්ෂු විනය සහ රාජ්‍ය නීතිය අතර පවතින මෙම ගැටුම යළිත් කරළියට පැමිණියේය.
පාස්කු ප්‍රහාරයට පෙර අන්තවාදී ත්‍රස්තවාදය ගැන කල්තියා අනතුරු ඇඟවූ භික්ෂූන් මෙලෙස සිරගත කෙරෙන බවට ඇතැම් පාර්ශ්ව නඟන චෝදනා පසෙක තැබුවද, උන්වහන්සේගේ සිවුරු ඉවත් කිරීම පිටුපස ඇති නෛතික හා විනයානුකූල පසුබිම විමසා බැලීම වටී.
උපසම්පදාව අහෝසි වන පාරාජිකා සතර
ථේරවාද විනය පිටකයේ භික්ෂු ප්‍රාතිමෝක්ෂයට අනුව උපසම්පදාව අහිමි වන අවස්ථා පැහැදිලිව දක්වා ඇත. පාරාජිකාවකට පත්වීම යනු මුළුමනින්ම "පැරදීමකි". තල් ගසක කරටිය සිඳ දැමූ පසු එය යළි නොලියලන්නා සේ, පාරාජිකා වූවෙකුට මේ ජීවිතයේදී යළි කිසිදා උපසම්පදා භික්ෂුවක් විය නොහැකිය.
ස්වයංක්‍රීයව මහණකම අහෝසි වන ප්‍රධාන වැරදි හතර මෙසේය:
1- මෛථුන ධම්ම පාරාජිකාව: කවර හෝ ආකාරයක ලිංගික සංසර්ගයක යෙදීම.
2- අදින්නාදාන පාරාජිකාව: නීතියෙන් දඬුවම් ලැබිය හැකි මට්ටමේ (පස් මස්සකට වඩා වැඩි) වටිනාකමකින් යුත් යමක් සොරකම් කිරීම.
3- මනුස්ස විග්ගහ පාරාජිකාව: දැනුවත්ව මිනිසෙකු ඝාතනය කිරීම, ඊට අනුබල දීම හෝ සියදිවි නසාගැනීමට පෙළඹවීම.
4- උත්තරි මනුස්ස ධම්ම පාරාජිකාව: තමා තුළ නොමැති ධ්‍යාන, මාර්ග ඵල හෝ රහත්භාවය වැනි උත්තරීතර ගුණ ඇතැයි ගිහියන්ට බොරු කීම.
මීට අමතරව, භික්ෂුවකට ස්වකැමැත්තෙන් උපසම්පදාව අත්හැරිය හැකිය. එය හැඳින්වෙන්නේ "සික්ඛා පච්චක්ඛානය" හෙවත් ශික්ෂාව ප්‍රත්‍‍යාඛ්‍යානය කිරීම ලෙසයි. තමන්ට මහණදම් පිරීමට නොහැකි බව අනෙකෙකුට වැටහෙන බසින් ප්‍රකාශ කිරීමෙන් එය සිදුවේ.
වරදක් පිළිනොගන්නා භික්ෂුවකට සෙසු මහා සංඝයා එක්ව "උක්ඛේපනීය කම්මය" පනවා සංඝ සමාජයෙන් කොන් කිරීමේ බලයද විනය නීතිය සතුය. මෙම නීති විනය පිටකයේ පාරාජිකා පාළිය (මහාවිභංගය) සහ සමන්තපාසාදිකා අට්ඨකථාවෙහි පැහැදිලිව අන්තර්ගත වේ.
බන්ධනාගාර ආඥාපනතේ 62 වගන්තිය
ශාසනික විනය එසේ වුවද, රටේ අපරාධ නීතිය ක්‍රියාත්මක වන්නේ වෙනස්ම මාවතකය. බන්ධනාගාර ආඥාපනතේ 62 වැනි වගන්තියට අනුව, අපරාධකරුවන් ලෙස වරදකරු වන සියලුම සිරකරුවන් රජය නියම කළ සම්මත බන්ධනාගාර නිල ඇඳුම (ජම්පරය) ඇඳීම අනිවාර්ය වේ. පෞද්ගලික ඇඳුම් ඇඳීමේ අවසරය 59 වැනි වගන්තිය යටතේ හිමිවන්නේ සිවිල් සිරකරුවන්ට පමණි.
වරදකරුවෙකු වී බන්ධනාගාරගත වන ඕනෑම ආගමික පූජකවරයෙකුගේ සිවුරු හෝ පූජක ඇඳුම් ඉවත් කර සිරකරු ඇඳුම ලබා දීම බන්ධනාගාරයේ සාමාන්‍ය පරිපාලන පටිපාටියයි. එහෙත්, භික්ෂුවකගේ සිවුර ඉවත් කිරීම සම්පූර්ණයෙන්ම ශාසනික අධිකාරියට අයත් කරුණක් ලෙස බෞද්ධ සම්ප්‍රදාය සලකයි. ආයතනික නීතිය සහ ආගමික විශ්වාසය මුහුණට මුහුණ හමුවන්නේ මෙතැනදීය.
කෝට්ටේ සංඝ සභාවේ විරෝධය සහ වැලිකඩ තීන්දුව
ඥානසාර හිමියන් සිරගත කළ අවස්ථාවේදී කෝට්ටේ සංඝ සභාව බන්ධනාගාර බලධාරීන්ට ලිඛිත පෙත්සමක් ඉදිරිපත් කළේය. සිවිල් අධිකරණයකින් වරදකරුවෙකු වූ පමණින් භික්ෂුවකගේ සිවුර පිළිබඳ තීරණ ගැනීමේ ශාසනික බලය රජයට නොපැවරෙන බව උන්වහන්සේලා තර්ක කළහ.
ආගමික පාර්ශ්වවලින් විරෝධතා මතු වුවද, බන්ධනාගාර නිලධාරීන් ක්‍රියා කළේ තමන්ට නියමිත නීති රීතිවලට යටත්වය. වැලිකඩ බන්ධනාගාරයේදී ඥානසාර හිමියන් ලියාපදිංචි කෙරිණි. සිවුරු ඉවත් කර, ජම්පරය, පිඟාන සහ කෝප්පය උන්වහන්සේ අතට පත් විය. නීතිය හමුවේ පැවිද්දෙකුට වෙනම සැලකිල්ලක් නොදැක්විණි.
ෆාදර් මැතිව් පීරිස්ගේ ඓතිහාසික පූර්වාදර්ශය
පූජක ඇඳුම ඉවත් කර සිරකරු ඇඳුම ඇන්දවීම අතීතයේදීද සිදුවූවකි. මිනීමැරුම් චෝදනාවලට වරදකරු වූ සුප්‍රකට ඇංග්ලිකන් පූජක මැතිව් පීරිස්ගේ සිදුවීම ඊට කදිම නිදසුනකි.
නඩු විභාගය පැවති මුළු කාලය පුරාම ඔහු පෙනී සිටියේ සම්ප්‍රදායික පූජක ඇඳුමෙනි. එය විත්තිකරුට කිසියම් ගෞරවනීයත්වයක් ගෙන දුන් බව විනිසුරුවරුන් පවා සටහන් කර තිබිණි. එහෙත් වැලිකඩ තාප්පයෙන් ඇතුළට ගිය පසු ඔහුටද බන්ධනාගාර නීතිය පොදු විය. පූජක ඇඳුම ගැලවිණි; ජම්පරය හිමි විය.
1990 දශකයේදී චිත්‍රපට නිෂ්පාදක චන්ද්‍රන් රත්නම් වැලිකඩදී ඔහු මුණගැසෙන විට, මැතිව් පීරිස් සිටියේ ජම්පරය හැඳ, විශාල කුරුසයක් සහ බයිබලයක් අතැතිවය. 1997 දී ජනාධිපති සමාව ලැබී නිදහස් වන තුරුම ඔහු ගත කළේ සාමාන්‍ය සිරකරුවෙකු ලෙසය. නිදහස ලැබීමෙන් පසුව පමණක් ඔහු යළි පූජක ඇඳුම භාවිත කළේය.
ශාසනික විනය සහ රාජ්‍ය නීතියේ ගැටුම
භික්ෂුවකගේ ශ්‍රමණභාවය තීරණය වන්නේ ථේරවාද විනය පිටකයේ පනවා ඇති නීති පද්ධතිය මත පමණි. බන්ධනාගාරයකදී බලහත්කාරයෙන් සිවුරු ගැලවූ පමණින් භික්ෂුවකගේ මහණකම අහෝසි වන්නේ නැත.
රාජ්‍ය නීතිය දෙසින් බලන කල, බන්ධනාගාර ආඥාපනත කිසිදු ආගමික තරාතිරමක් නොසලකයි. නීතිය ඉදිරියේ සියලු සිරකරුවෝ සමානයහ. ආගමික නායකයෙකු අපරාධ චෝදනාවකට වරදකරු වන සෑම මොහොතකම, සාම්ප්‍රදායික ශාසනික ගෞරවය සහ රාජ්‍ය පරිපාලන නීතිය අතර මෙවැනි ගැටුම් මතුවීම වැළැක්විය නොහැක්කේ එබැවිනි.
උපුටා ගැනීම - Ajith Parakum ෆේස්බුක් පිටුවෙන්..
සබැඳි වාර්තාව :
ඥානසාර හිමිගේ සිවුර: කෝට්ටේ සංඝ සභාවෙන් බන්ධනාගාරයට නිල දැනුම්දීමක්
