තේරීම් කමිටු පත්කිරීමට නව රෙගුලාසි පැනවීමට තීරණය කළ බව ක්‍රීඩා අමාත්‍ය රොෂාන් රණසිංහ පවසයි.
ඒ අනුව එක් එක් ක්‍රීඩාවට අදාළ ජාතික තේරීම් කමිටු සඳහා අදාළ රෙගුලාසි කඩිනමින් ප්‍රකාශයට පත්කරන බව අමාත්‍යවරයා පැවසීය.
අදාළ රෙගුලාසිවලට අනුව තේරීම් කමිටු සාමාජිකත්වය ලබා ගැනීම සඳහා ක්‍රීඩා අධ්‍යක්ෂ ජනරාල්වරයා වෙත අයදුම්පත් යොමුකළ යුතු අතර ඒවායේ පිටපත් ජාතික තේරීම් කමිටුව වෙත ඉදිරිපත් කළ යුතුය.
ඒ අනුව ජාතික තේරීම් කමිටුවේ නිරීක්ෂණ යටතේ එක් එක් ක්‍රීඩාවන්ට අදාළ තේරීම් කමිටු පත්කිරීමට පියවර ගන්නා බව ක්‍රීඩා අමාත්‍ය රොෂාන් රණසිංහ තවදුරටත් සඳහන් කළේය.
අමාත්‍යවරයා එබව කියා සිටියේ, ක්‍රීඩා ජාතික ක්‍රීඩා සභාවේ දී අද පෙරවරුවේ පැවති ජාතික ක්‍රීඩා සභාවේ සහ ජාතික තේරීම් කමිටුවේ පළමු රැස්වීමෙන් අනතුරුව මාධ්‍ය අමතමිනි.
''මට අවශ්‍ය පුද්ගලයො නෙමේ ක්‍රීඩාව දියුණු කරන්නයි'' - ක්‍රීඩා ඇමති
"මට මේ තනතුර එක්ක යාලුවෝවත් තරහකාරයෝවත් නෑ. මට අවශ්‍ය පුද්ගලයො නෙමේ ක්‍රීඩාව දියුණු කරන්න" යැයි ක්‍රීඩා අමාත්‍යවරයා එහිදී ප්‍රකාශ කළේය.
එහි දී ක්‍රීඩාවේ පවතින ගැටලු සහ තීරණ පිළිබඳ සාකච්ඡා කළ අතර ජෙනරල් ශවේන්ද්‍ර සිල්වා හා සනත් ජයසූරිය ක්‍රිකට් තේරීම් කමිටුව සම්බන්ධ ප්‍රශ්නයක් පවතින බව පෙන්වා දෙන ලදී.
එසේ ම කෙත්තාරාම ක්‍රීඩාංගනයේ පහසුකම් අඩු බවට සහ පිහිනුම් තටාකයක් සහ තවත් පහසුකම් කිහිපයක ඇති අවශ්‍යතාවය පිළිබඳ ක්‍රීඩකයින්ගෙන් ලැබී ඇති පැමිණිලි පිළිබඳ ව ද එහි දී සාකච්ඡා කරන ලදී.
ඉදිරියේ දී පැමිණීමට නියමිත ක්‍රිකට් ලෝක කුසලානයට පෙර මෙම ගැටලු නිරාකරණය කළ යුතු බැවින්, ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජෙනරාල් මාර්ගයෙන් පුවත්පත් දැන්වීමක් පළ කර ක්‍රිකට් තේරීම් කමිටුව සඳහා පැමිණීමට කැමති අය විනිවිද භාවයකින් යුක්තව තෝරා ගැනීමට තීරණය කරන ලදී.
මේ සඳහා ක්‍රීඩා සභාවේ සභාපති අර්ජුන රණතුංග, ජෙනරල් ශවේන්ද්‍ර සිල්වා, ත්‍රිවිධ හමුදාපතිවරු සහ සනත් ජයසූරිය ඇතුළු සාමාජිකයින් රැසක් සහභාගි වී සිටියේය.
