ශ්‍රී ලංකාවේ මලල ක්‍රීඩාව අද වන විට ඉතිහාසයේ බරපතළම පාලන සහ ව්‍යුහාත්මක අර්බුදයකට මුහුණ දී සිටී. ක්‍රීඩකයන් ජාත්‍යන්තරය ජයග්‍රහණය කරද්දී, මෙරට ක්‍රීඩා පරිපාලනය නිලධාරීවාදය, අත්තනෝමතික තීරණ සහ වගකීම් විරහිතභාවය හේතුවෙන් දිනෙන් දින අගාධයට ඇද වැටෙමින් තිබේ. මේ, නිලධාරීන්ගේ තනතුරු ලෝභී සෙල්ලම නිසා මෙරට මලල ක්‍රීඩාවට සහ දක්ෂ ක්‍රීඩකයන්ට අත්ව ඇති ශෝචනීය ඉරණම සුළු පටු නැත.
පුටු රණ්ඩුව සහ බිඳ වැටුණු පරිපාලනය
ශ්‍රී ලංකා මලල ක්‍රීඩා සංගමයේ අභ්‍යන්තරය පුපුරා යමින් පවතින බව රහසක් නොවේ. කෑගල්ල, කුරුණෑගල, පුත්තලම ඇතුළු අනුබද්ධ දිස්ත්‍රික් මලල ක්‍රීඩා සංගම් සහ ක්‍රීඩා සමාජ 9ක් එකතු වී වත්මන් පාලක මණ්ඩලයට එරෙහිව ක්‍රීඩා අමාත්‍යාංශය වෙත දෝෂාභියෝගයක් ඉදිරිපත් කිරීම පරිපාලන අර්බුදයේ උච්චතම අවස්ථාවයි.
මෙම දේශපාලන සහ නිලධාරීවාදී බලපෑම්වල බරපතළකම කෙතරම්ද යත්, වත්මන් පාලන මණ්ඩලයේ ප්‍රධාන ලේකම් ධුරයට පත් වූ මාධව බණ්ඩාර සෙනරත් පත්වී මසක් ගතවීමටත් පෙර ඉල්ලා අස්විය. එපමණක් නොව, සංගමයේ අභිමානය වෙනුවෙන් අලුතින්ම හඳුන්වා දුන් ප්‍රධාන විධායක නිලධාරී (CEO) සුනිල් ජයවීර මෙන්ම, ජාතික මලල ක්‍රීඩා තේරීම් කමිටුවේ සාමාජිකයන් (ඩී.ඒ. දයාරත්න, කර්නල් එම්.කේ.පී. ජයසේකර, රවි විද්‍යාලංකාර) එකවරම සිය තනතුරුවලින් ඉල්ලා අස්වූයේ වත්මන් පාලනයේ පවතින අත්තනෝමතික ක්‍රියාකලාපයට විරෝධය පාමිනි. තේරීම් කමිටුවක් පවා නොමැති මලල ක්‍රීඩා සංගමයකින් ක්‍රීඩකයන්ට ඉටුවන සාධාරණය කුමක්ද?
ජාත්‍යන්තරය ජයගත් තරු නිලධාරීවාදයට බිලි
පරිපාලනයේ පවතින අදූරදර්ශී බවේ ඍජු ගොදුරු බවට පත්ව ඇත්තේ මෙරට ලේ දහඩිය හලන ක්‍රීඩක ක්‍රීඩිකාවන්ය.
* යුපුන් අබේකෝන්ගේ ශෝචනීය සමුගැනීම:
දකුණු ආසියාවේ වේගවත්ම මිනිසා මෙන්ම මීටර් 100 ඉසව්ව තත්පර 10කට අඩුවෙන් නිමා කළ ශ්‍රී ලංකාවේ බිහිවූ විශිෂ්ටතම කෙටි දුර ධාවකයා වන යුපුන් අබේකෝන්, ක්‍රීඩා බලධාරීන්ගේ *"වෘත්තීය මට්ටමේ නොවන ක්‍රියාකලාපය" හමුවේ ක්‍රීඩාවෙන් සමුගැනීමට තීරණය කළේය. ඉතාලියේ පුහුණුවීම් සඳහා පොරොන්දු වූ ඔලිම්පික් ශිෂ්‍යත්ව හෝ අනුග්‍රාහක මුදල් නියමිත වේලාවට ලබා නොදීම, ඔහු ඩොලර් ලක්ෂ ගණනින් මුදල් ඉල්ලූ බවට ක්‍රීඩා බලධාරීන් විසින්ම සිදුකළ අසත්‍ය මඩ ප්‍රචාර සහ සුගතදාස ක්‍රීඩාංගණයේ පවතින බාල ධාවන පථය වැනි මූලික පහසුකම්වත් සපුරාලීමට නොහැකි වීම නිසා මේ විශිෂ්ට ක්‍රීඩකයා රටට අහිමි විය.
*. රුමේෂ් තරංගගේ උපකරණ විනාශ වීම:
ලෝක ශ්‍රේණිගත කිරීම්වල ඉදිරියටම පැමිණි හෙල්ල විසි කිරීමේ ක්‍රීඩක රුමේෂ් තරංග ජාත්‍යන්තර තරගාවලියක් නිමා කර ලංකාවට පැමිණීමේදී, ඔහු සතු වූ රුපියල් ලක්ෂ 20කට වඩා වටිනා තරගකාරී හෙල්ල (Javelins) 5ම ගුවන් ගමන අතරතුර සම්පූර්ණයෙන්ම විනාශ විය. ක්‍රීඩකයෙකුගේ වටිනා උපකරණ ප්‍රවාහනය කිරීමේදී ක්‍රීඩා සංගමය මීට වඩා වගකීමෙන් ක්‍රියා කළ යුතුව තිබුණි.
* නිලධාරීන්ගේ ප්‍රමාදයෙන් අහිමි වූ රන් පදක්කම්:
ආසියානු යොවුන් මලල ක්‍රීඩා ශූරතාවලියේදී ලංකාවේ දක්ෂ යොවුන් ක්‍රීඩිකාවන් දෙදෙනෙකු වූ නිධුකි ප්‍රාර්ථනා සහ අයේෂා සෙව්වන්දි තරගයෙන් ඉවත් කිරීමට සිදු විය. ඒ, ඔවුන් දක්ෂතා දැක්වූ මීටර් 1500 ඉසව්වේ Check-in ස්ථානය වෙත නිලධාරීන් විසින් ඔවුන්ව විනාඩි 10ක් ප්‍රමාද කර රැගෙන යාම නිසාය. නිලධාරීන්ගේ බරපතළ නොසැලකිල්ල නිසා ලංකාවට ස්ථිරවම හිමිවීමට තිබූ ජාත්‍යන්තර පදක්කම් දෙකක් අහිමි වූයේ සමස්ත ජාතියම ලැජ්ජාවට පත් කරමිනි.
ජාත්‍යන්තර තහනමක අවදානම සහ අරමුදල් අත්හිටුවීම
පවතින පරිපාලන අවුල් සහගත තත්ත්වයන් හේතුවෙන් ලෝක මලල ක්‍රීඩා සංගමය (World Athletics) විසින් ශ්‍රී ලංකාවට ලබාදෙන ජාත්‍යන්තර අරමුදල් සහ සංවර්ධන ආධාර දැනටමත් තාවකාලිකව අත්හිටුවා ඇත. මීට පෙර පවතින දේශීය නීති ජාත්‍යන්තර ප්‍රමිතීන්ට අනුකූල නොවීම නිසා WADA (ලෝක උත්තේජක මර්දන නියෝජිතායතනය) විසින් පැනවූ තහනමෙන් නීති කෙටුම්පත් මඟින් ගැලවීමට ශ්‍රී ලංකාව සමත් වුවද, වත්මන් පරිපාලන අර්බුදය නිසා නැවත වරක් ලෝක මලල ක්‍රීඩා සංගමයේ ඍජු තහනමකට ලක්වීමේ බරපතළ අවදානමක් පවතී.
නිලධාරීන්ගේ මෙම අත්තනෝමතික ක්‍රියා නිසා චීනයේ පැවැති ලෝක තරගාවලියක් මීටර් 400 සහාය දිවීමේ කණ්ඩායමට අහිමි වූ අතර, ඉදිරි ආසියානු ක්‍රීඩා තරගාවලිය (Asian Games) ඇතුළු ජාත්‍යන්තර තරග රැසක් මෙරට දක්ෂ ක්‍රීඩකයන්ට අහිමි වීමේ අවදානමක් මතුව ඇත.
ක්‍රීඩා අමාත්‍යාංශයේ මැදිහත්වීම සහ විසඳුම්
වත්මන් ක්‍රීඩා අමාත්‍ය සුනිල් කුමාර ගමගේ ඇතුළු බලධාරීන් විසින් ක්‍රීඩා පරිපාලනය පිරිසිදු කිරීම වෙනුවෙන් නව පියවර කිහිපයක් ගෙන ඇත. මෑතකදී දූෂණ චෝදනා එල්ල වූ හෑන්ඩ්බෝල්, කැරම් සහ හොකී යන ජාතික ක්‍රීඩා සංගම්වල ලියාපදිංචිය තාවකාලිකව අත්හිටුවා, ඒ සඳහා "නිල බලධාරීන්" පත් කිරීමට ක්‍රීඩා අමාත්‍යාංශය කටයුතු කළේය. මලල ක්‍රීඩා සංගමයේ පවතින දෝෂාභියෝග අර්බුදය හමුවේ ද මෙවැනිම තීරණාත්මක පියවරක් ගැනීමට නියමිත බව වාර්තා වේ. එමෙන්ම රුමේෂ් තරංගගේ විනාශ වූ හෙල්ල වෙනුවෙන් රජයේ ඍජු වියදමින් නව උපකරණ ලබාදීමට සහ නව තේරීම් මණ්ඩලයක් පත් කිරීමට පියවර ගැනීම අගය කළ යුතුය.
ක්‍රීඩාව ක්‍රීඩකයන්ට ඉතිරි කරනු!
ක්‍රීඩාවේ සැබෑ හිමිකරුවන් වන්නේ නිලධාරීන් නොව, ලේ දහඩිය හලන ක්‍රීඩකයන් සහ පුහුණුකරුවෝය. ජාතික, සහ කනිෂ්ඨ පුහුණු සංචිත නිසි පරිදි ක්‍රියාත්මක නොවීම නිසා ඉදිරි ජාත්‍යන්තර තරග සඳහා ක්‍රීඩකයන් සූදානම් කිරීමේ බරපතළ බිඳවැටීමක් පවතී. මලල ක්‍රීඩා සංගමය වහාම නිලධාරීවාදයෙන් මුදාගෙන, විනිවිදභාවයකින් යුත්, වෘත්තීය මට්ටමේ පාලනයක් ස්ථාපිත නොකළහොත්, ශ්‍රී ලංකාවේ මලල ක්‍රීඩාව ඉතිහාසයේ කළුතම යුගයකින් කෙළවර වීම වැළැක්විය නොහැක.