අකුණක් වැදීමෙන් 15 හැවිරිදි ගොල්ෆ් ක්‍රීඩිකාව මිය යයි!

තායිලන්තයේ ගොල්ෆ් තරගාවලියක ක්‍රීඩා කරමින් සිටියදී අකුණක් වැදීමෙන් 15 හැවිරිදි ක්‍රීඩිකාවක් මිය ගොස් තිබෙනවා.

මෙසේ අවාසනාවන්ත ලෙස මිය ගියේ තායිලන්තයේ අයියාවාරින් ප්‍රාඩප්යාට් (Aeyavarin Pradubyart) නමැති නව යොවුන් වියැත්තියක්.

අහස ඉරාගෙන පැමිණ තණනිල්ලේ පතිත වුණු අකුණු කිහිපයකින් එකක් මේ නැගී එන ක්‍රීඩිකාවගේ 31 හැවිරිදි ආවතේවකාරියටත් (කැඩී) වැදී තිබෙනවා.

බැංකොක් නගරයට නැගෙනහිර දිසාවෙන් පිහිටි චාචන්සාඔ් පළාතේ ලෝටස් වැලී ගොල්ෆ් නිවාඩු නිකේතනයේ පැවති තරගාවලියේ ඉරිදා සවස ක්‍රීඩාව අහෝසි කරමින් ක්‍රීඩක ක්‍රීඩිකාවන්ට වහාම සමාජ නිවහනට (ක්ලබ් හවුස්) නැවත පැමිණෙන ලෙසට නිලධාරීන් නියෝග කළේ අධික වර්ෂාව පතිත වීමත් සමගයි.

නමුත් අයියාවාරින් සහ ඇයගේ කැඩීවරිය වන සායිතාන් බූන්කර්ඩ් ක්ලබ් හවුසියට යළි පැමිණි පිරිසේ නොසිටි අතර පසුව ඒ දෙදෙන ගොල්ෆ් පිටියේ සිහිනැතිව ඇද වැටී සිටියදී සොයාගෙන තිබෙනවා.

බරපතල තත්ත්වයේ සිටි දෙදෙනා ට එතැනදී ම පණගැන්වීමේ ප්‍රතිකාර ලබා දී වහාම රෝහලට ගෙන ගියා.

ක්‍රීඩිකාවගේ හිසේ සිට අත් හා කකුල් දක්වා බරපතල ලෙස පිළිස්සී තිබුණු බව දේශීය වාර්තා සඳහන් කරනවා. වැඩි දුර ප්‍රතිකාර ලබා දීම පිණිස ඇය වෙනත් ප්‍රධාන රෝහලකට මාරු කර යැවුණ ද ඇගේ තත්ත්වය වේගයෙන් පිරිහෙමින් සඳුදා උදෑසන ඇය මිය ගියා.

කන් බිහිරි කරන අකුණු හඬක් සහ අධික වර්ෂාව විසින් අවසානයේදී තරග අහෝසි කරන තෙක් තරගාවලිය නතර කිරීමට අසමත් වූ නිලධාරීන් තරුණ ක්‍රීඩිකාවන්ට දිගටම ක්‍රීඩා කරන ලෙසට නියෝග කළ බව අයියාවාරින්ගේ මව කියා තිබෙනවා.

2026 කණිෂ්ඨ ආසියානු තරගමාලාවේ පළමු අදියරේ බාලිකා ‘බී’ පන්තියේ ඉසව්ව ඇතුළු තරගාවලියන් ගණනාවක සම්මාන දිනා ගෙන සිටි මේ ළාබාල ක්‍රීඩිකාව තායි ගොල්ෆ් ක්‍රීඩාවේ නැගී එන තාරකාවක් ලෙසින් පිළිගැනීමට ලක්ව සිටියා.

තුවාල ලැබූ ඇයගේ කැඩීවරිය දැඩි වෛද්‍ය අධීක්ෂණය යටතේ රෝහලේ රැඳී සිටින අතර ඇයගේ තුවාලවල තත්ත්වය පිළිබඳව තවමත් පැහැදිලි නැහැ.