හූති ප්‍රහාර හමුවේ ආසියානු කුසලාන පාපන්දුව මාස 11ක් ඈතට විසිවෙයි!

ලබන වසර මුල සෞදි අරාබියේ පැවැත්වීමට නියමිතව තිබූ ආසියානු කුසලාන පාපන්දු තරගාවලිය හූති කැරලිකරුවන්ගෙන් එරටට එල්ල වූ මාරක ප්‍රහාර මාලාවක් හේතුවෙන් මාස 11කට කල් දමා තිබෙනවා.

කණ්ඩායම් 24ක් සහභාගි වන 2027 තරගාවලිය ජනවාරි 7 සිට පෙබරවාරි 5 දක්වා පැවැත්වීමට නියමිතව තිබුණ ද, එය දැන් 2027 දෙසැම්බර් 23 සිට 2028 ජනවාරි 21 දක්වා පැවැත්වීමට සැලසුම් කර තිබෙනවා.

යේමනයේ හූති ව්‍යාපාරය විසින් ඔක්තෝබරයේ රියාද් අගනුවර ගුවන් තොටුපලට එල්ල කළ මිසයිල ප්‍රහාරයෙන් පුද්ගලයින් 13 දෙනෙකු මිය ගොස් 300කට වැඩි දෙනෙක් තුවාල ලැබුවා.

තරගාවලියේ අලුත් දින සටහන ජාත්‍යන්තර පාපන්දු සම්මේලනයේ (FIFA) අනුමැතිය සඳහා ඉදිරිපත් කරනු ඇතැයි ආසියානු පාපන්දු සම්මේලනය ප්‍රකාශ කරනවා.

අනෙකුත් ක්‍රීඩා තරඟත් කල්යයි

රියාද් නුවර පැවැත්වීමට සැලසුම් කර තිබූ Six Kings Slam ටෙනිස් ප්‍රදර්ශන ඉසව්ව ඇතුළු සෞදි අරාබියේ තරගාවලියන් ගණනාවක්ම මෑතකදී අහෝසි කර තිබෙනවා.

ආසියානු ගොල්ෆ් තරගමාලාව (Asian Tour) නොවැම්බර් 18 සිට 21 දක්වා පැවැත්වීමට නියම කරගෙන සිටි ඔවුන්ගේ තරග වාර-අවසාන තරගාවලිය ද දින නියමයක් නැතිව කල් දමා තිබෙනවා.

ආසියානු කුසලාන පාපන්දු තරගාවලිය පිට පිට කල් දැමුණු දෙවැනි අවස්ථාව මෙය වනවා. 2023 වසරේ චීනයේ පැවැත්වීමට නියමිතව තිබූ තරගාවලිය කොවිඩ් වසංගතය හේතුවෙන් 2024 වසරට කල් දමා එය කටාර් රාජ්‍යයට ගෙන ගියා.

ප්‍රිමිය ලීගයේ ක්‍රීඩකයින්ට අවස්ථාව

2027 ආසියානු කුසලාන තරගාවලිය කල් දැමීම නිසා ප්‍රිමිය ලීගයේ ක්‍රීඩකයින් ගණනාවකට වර්තමාන තරග වාරයේ ක්‍රීඩාව මඟ හැරෙන්නේ නැහැ.

තරගාවලිය සඳහා ජපානය වෙනුවෙන් රාජකාරියට කැඳවීමට අපේක්ෂිත සමහර ක්‍රීඩකයින් වූයේ ඇස්ටන් විලා සමාජයීය කණ්ඩායමට ක්‍රීඩා කරන සයොන් සුසුකි (Zion Suzuki), ලිවපූල් කණ්ඩායමේ වටාරු එන්ඩෝ (Wataru Endo) හා ඉප්ස්විච් ටවුන් කණ්ඩායමේ Daizen Maeda.

ලීඩ්ස් යුනයිටඩ් කණ්ඩායමේ Ao Tanaka, ක්‍රිස්ටල් පැලස් ක්‍රීඩක යුගලය වන Takehiro Tomiyasu හා Daichi Kamada සහ හල් සිටි කණ්ඩායමේ Hidemasa Morita ද ජපානය නියෝජනය කරනවා.

ආසියානු කුසලානයේ වඩාත්ම ප්‍රියතම කණ්ඩායම ජපානය වීමට ඉඩ තිබූ අතර එම රට තරගාවලියේ අවසාන තරගයට පිවිසියා නම් චැම්පියන්ස් ලීගයේ ක්‍රීඩා කරන ඇස්ටන් විලා කණ්ඩායමට සුසුකි නැතිව අවම වශයෙන් තරග හතකට ක්‍රීඩා කිරීමට සිදුවනවා.

ලිවපූල් ද චැම්පියන්ස් ලීගයේ සිටියත් එන්ඩෝ තවමත් එම කණ්ඩායම වෙනුවෙන් මේ ක්‍රීඩා වාරයේ තරගයකට ක්‍රීඩා කර නැහැ.

ආබාධයකට ලක්ව සිටින බ්‍රයිටන් කණ්ඩායමේ Kaoru Mitoma ද මේ වසර අග නැවත ක්‍රීඩාවට පිවිසෙනු ඇතැයි අපේක්ෂා කෙරෙන අතර ඔහු ද ජපානය විසින් කැඳවීමට ඉඩ තිබුණා.

මැන්චෙස්ටර් සිටි කණ්ඩායමේ උස්බෙකිස්තානු ආරක්ෂක පෙළ ක්‍රීඩක Abdukodir Khusanov සහ හල් සිටි කණ්ඩායමේ හා ඔස්ට්‍රේලියා ආරක්ෂක ක්‍රීඩක Lucas Herrington ද ආසියානු කුසලාන තරගාවලිය සඳහා ජාත්‍යන්තර කැඳවීම් ලැබීමට නියමිතව සිටියා.