ශ්‍රී ලංකාව හා භූතානය අතර තියුණු මුහුණුවරකින් අද පැවති සාෆ් කුසලාන පාපන්දු තරගය දෙපිලෙන් ම ගෝල දෙක බැගින් වාර්තා වෙමින් ජය පැරදුමින් තොරව අවසන් වුණා.
බංග්ලාදේශයේ ධකා අගනුවර ජාතික ක්‍රීඩාංගණයේ පැවති තරගයේ පළමු භාගය අවසන් වන විට ගෝල 2-1කින් ඉදිරියෙන් සිටියේ ශ්‍රී ලංකා කණ්ඩායමයි. ඔලිවර් ජේම්ස් කෙලාට් සහ අහමඩ් වසීම් රසීක් එම ගෝල ලබා ගෙන තිබුණා.
තරගයේ 34 වැනි මිනිත්තුවේදී ඩවා ෂෙරිං භූතානය වෙනුවෙන් පළමු ගෝලය සටහන් කළ ද ඊට මිනිත්තුවකට පසුව කෙලාට් ගෝලයක් ලබා ගනිමින් ශ්‍රී ලංකාව සම තත්ත්වයට ගෙන ආවා. 43 වැනි මිනිත්තුවේදී රසීක් ලබා ගත් ගෝලයෙන් ශ්‍රී ලංකාව තරගයේ විවේක කාලය එළඹෙන විට පෙරමුණ ගෙන සිටියා.
තරගය යළි ආරම්භ වීමෙන් පසුව දෙපිළ ම කරට කර තරග වැදුනු අතර 31 වැනි මිනිත්තුවේදී ගෝලයක් ලබා ගෙන 2-2 සම තත්ත්වයට පිවිසීමට භූතානය සමත් වුණා. සමස්ත තරගයේ 76 වැනි මිනිත්තුවේදී ඒ තීරණාත්මක ගෝලය ලබා ගත්තේ චෙන්කෝ ගියල් ෂෙන්.
මේ තරගයේදී භූතාන ක්‍රීඩකයින් දෙදෙනෙකුට කහ කාඩ්පත් පෙන්වනු ලැබුවා.
පාකිස්තානය 3 - මාල දිවයින් 0
මේ අතර අද පැවති පළමු තරගයේදී පාකිස්තානය ගෝල 3-0කින් මාල දිවයින් කණ්ඩායම පරාජය කළා. නජීබුල්ලා බෙටානි ගෝල දෙකක් ලබා ගැනීමට සමත් වුණා.
මේ තරගයේ පළමු භාගයේදී පමණක් ගෝල වාර්තා වීම විශේෂත්වයක්.
පාකිස්තානය ඔවුන්ගේ පළමු ගෝලය තරගයේ සිවු වැනි මිනිත්තුවේදී ලබා ගත්තේ මැක්කීල් අරූන් අබ්දුල්ලා නිවැරදිව එල්ල කළ පෙනල්ටිය මාර්ගයෙන්. අනතුරුව බෙටානි 9 හා 24 වැනි මිනිත්තුවලදී ගෝල ලබා ගත්තා.
ශ්‍රී ලංකාවේ මීළඟ තරගය බංග්ලාදේශය ට එරෙහිව නොවැම්බර් 11 වැනිදා පැවැත්වෙනවා.
-වර්නන් ගුණසේකර
ක්‍රීඩා සංස්කරක