පෘතුගාල ජාතික පාපන්දු කණ්ඩායම තුළ කැලඹිලිකාරි තත්ත්වයක් ඇති කරමින් පුහුණු කඳවුරෙන් පිටව ගිය ක්‍රිස්ටිආනෝ රොනාල්ඩෝට පෘතුගාල පාපන්දු සම්මේලනය (FPF) තාවකාලික තරග තහනමක් පනවා තිබෙනවා.
ජාත්‍යන්තර තරග සමයේදී පෘතුගාල කණ්ඩායමේ පුහුණුකරු හෝහේ ජීසස් සමග ඇති කරගත් ආරවුලකින් පසුව 41 හැවිරිදි රොනාල්ඩෝ කණ්ඩායම් සගයන් අතරමං කිරීම හේතුවෙන් FPF නීතිවලින් ඉබේ සිදුවන තහනමක් ක්‍රියාත්මකව තිබෙනවා.
මාසයක සිට මාස හයක් දක්වා තහනමක්
මාසයක් හා මාස හයක් අතර වන මේ තහනමට අනුව රොනාල්ඩෝට පමුණුවන දඬුවමේ කාලය කොපමණද යන්න තීරණය කිරීම පිණිස FPF විනය කවුන්සලය දැන් මුණගැසීමට නියමිතව තිබෙනවා.
මාසයකට වඩා දීර්ඝ වන ඕනෑම තහනමකින් රොනාල්ඩෝට ඩෙන්මාර්කය හා වේල්සය සමග නොවැම්බරයට යෙදී තිබෙන පෘතුගාල කණ්ඩායමේ නේෂන්ස් ලීග් තරග දෙක මඟ හැරෙනවා.
දඬුවම ලිහිල් වීමේ ඉඩකඩ
රොනාල්ඩෝ ක්‍රීඩා ලෝලීන්ගෙන් ප්‍රසිද්ධියේ සමාව ඉල්ලීමේ කාරණය ඇතුළු දඬුවම ලිහිල් කිරීම සඳහා තිබෙන සියලු අවස්ථාවන් කෙරෙහි විනය කවුන්සලයේ සාමාජිකයින් සැලකිල්ල යොමු කරනු ඇතැයි පැවසෙනවා.
පෘතුගාල පාපන්දු සැකැස්මේ රොනාල්ඩෝට තිබෙන තත්ත්වයට අනුව දීර්ඝ කාලීන තහනමක් සිදු නොවනු ඇතැයි වාර්තා වනවා.
ආරවුල ඇවිළුණු හැටි
ජීසස් හා රොනාල්ඩෝ අතර ආරවුල පුපුරා ගියේ සැප්තැම්බර් 27 වැනිදා නෝර්වේ සමග පැවති තරගයේදී රොනාල්ඩෝ පාවිච්චි නොකළ ආදේශ ක්‍රීඩකයෙකු බවට පත්වීමෙන් පසුවයි.
ජාත්‍යන්තර පාපන්දු ක්‍රීඩාව තමා තවමත් අවසන් කර නැතැයි ගෝල් දහසක් ඉලක්ක කරගෙන සිටින රොනාල්ඩෝ පවසනවා. ඔහු මේ වන විට ඔහුගේ ජාත්‍යන්තර හා සමාජ පාපන්දු දිවියේ ගෝල් 980ක් වාර්තා කර තිබෙනවා.
(සටහන | වර්නන් ගුණසේකර)
ක්‍රීඩා සංස්කාරක
සබැඳි ලිපියක් :
ක්‍රිස්ටිආනෝ රොනාල්ඩෝ පෘතුගාල කඳවුර හැර යයි: පුහුණුකරු සමග මතභේදයක්
