දෙසැම්බර් මාසයේ ඉන්දියාවේ අගනුවර සිදුවිය හැකි දේශගුණික විපර්යාසයන් මෙන්ම අරුන් ජයිට්ලී ක්‍රීඩාංගණයේ සැලසුම් කර තිබෙන අලුත්වැඩියා කටයුතු හේතුවෙන් තරගය දිල්ලි සිට විසාඛාපට්නම් වෙත ගෙන යන ලෙසට දිල්ලි නගරය සහ එහි දිස්ත්‍රික් ක්‍රිකට් සංගමය විසින් ඉන්දියා ක්‍රිකට් පාලක මණ්ඩලයෙන් කරනු ලැබූ ඉල්ලීමකට අනුවයි මේ ස්ථාන මාරුව සිදුකර තිබෙන්නේ.
දෙසැම්බර් මාසයේ දිල්ලි නුවර වායුව අපවිත්‍ර වීම මීට පෙරත් ක්‍රීඩා ඉසව්වලට බලපා තිබෙනවා.
තරගය දිල්ලියේ පැවැත්වූවා නම් එය 2023 ලෝක කුසලාන තරගාවලියෙන් පසුව දිල්ලි නුවර ක්‍රීඩා කෙරෙන පළමු ජාත්‍යන්තර එක්දින ක්‍රිකට් තරගය වීමට ඉඩ තිබුණා.
මීට පෙර අවසන් වතාවට දෙසැම්බරයේදී ජාත්‍යන්තර ක්‍රිකට් තරගයකට දිල්ලිය සත්කාරකත්වය දැක්වූයේ 2017 වසරේ ඉන්දියාව ශ්‍රී ලංකාව ට එරෙහිව ටෙස්ට් තරගයක් ක්‍රීඩා කළ අවස්ථාවේ. එම තරගය අතරතුර හටගත් වායු දූෂණය හේතුවෙන් ශ්‍රී ලංකා ක්‍රීඩකයින් කිහිප දෙනෙකු පන්දු රැකීමට පිටියට පිවිසියේ මුහුණු ආවරණ පැලඳගෙන.
ළඟ එන ඉන්දීය සංචාරයේදී ශ්‍රී ලංකා කණ්ඩායම ජාත්‍යන්තර එක්දින තරග (ODI) තුනකට හා ජාත්‍යන්තර විස්සයි20 (T20I) තරග තුනකට සහභාගි වීමට නියමිතයි. දෙවැනි ODI තරගය බෙංගලූරු හිදී පැවැත්වෙන අතර තෙවැනි තරගය ක්‍රීඩා කෙරෙන්නේ අහමදාබාද් නගරයේ. T20I තරග රාජ්කොට්, කටක් සහ පූනේ නගරවල පැවැත්වෙනවා.
(සටහන - වර්නන් ගුණසේකර)
