මේ තරග දෙක අතරින් තියුණු සටනක් අපේක්ෂා කළ හැක්කේ සත්කාරක බංග්ලාදේශය සහ පාකිස්තානය අතර රාත්‍රියේ ක්‍රීඩා කෙරෙන තරගයෙන්. ඊට පෙර භූතානය සහ මෙවර තරගාවලියේ වඩාත්ම ජනප්‍රිය කණ්ඩායම වන සාෆ් කුසලානය නව වරක් දිනා ගත් ඉන්දියාව අතර තරගය පැවැත්වෙනවා.
ඉන්දියාව සහ භූතානය අතර ගැටුම
මෙවර තරගාවලියේ මූලික වටයේදී ‘බී’ කොටසෙන් තරග කළ ඉන්දියාව එම තරග බිමේ ලකුණු හයක අණසක පැතිරවූයේ පාකිස්තානය ගෝල 3-2කින් පරදවමින් හා මාලදිවයිනට එරෙහිව ගෝල 1-0ක තීරණාත්මක ජයක් වාර්තා කරමින්.
බංග්ලාදේශයට ගෝල 4-0කින් ශ්‍රී ලංකාව පරාජය වීමෙන් පසුව ගෝල වෙනස මත ඔවුන් එක ලකුණකින් පසුපසට තල්ලු කරමින් භූතානය ‘ඒ’ කොටසේ අනුශූරයින් වී අවසන් පූර්ව වටයට සුදුසුකම් ලැබුවා. භූතානය හා ශ්‍රී ලංකාව අතර තරගය අවසන් වුණේ 2-2ක සම තත්ත්වයෙන්.
සමබර සංචිතයක් හා ශක්තිමත් මූලික වටයේ ක්‍රීඩාවක් ප්‍රදර්ශනය කිරීම හේතුවෙන් ඉන්දියාව හෙට ක්‍රීඩා කරන්නේ මේ තරගාවලියේ ජයග්‍රාහකයින් වනු ඇතැයි බොහෝ දෙනා අනුමාන කරන කණ්ඩායම ලෙසිනුයි. ආරක්ෂාකාරී ක්‍රීඩාවක් අනුගමනය කරමින් දැවැන්ත අනපේක්ෂිත තරගයකින් අවසාන තරගයට පිවිසීම භූතානයේ අරමුණ වී තිබෙනවා.
බංග්ලාදේශය සහ පාකිස්තානය මුහුණට මුහුණ
අලංකාර ශෛලියකින් ‘ඒ’ කොටස ජයග්‍රහණය කළ බංග්ලාදේශයේ කැපී පෙනුණු තරඟය වුණේ ශ්‍රී ලංකාව ගෝල 4-0කින් පරදවමින් පිට පිට දෙවැනි වතාවටත් සාෆ් කුසලානයේ අවසන් පූර්ව වටයට පිවිසීමයි.
පාකිස්තානය ලකුණු තුනක් ලබා ගෙන ‘බී’ කොටසේ දෙවැනි ස්ථානයට පත්වුණා. ඉන්දියාව හමුවේ තියුණු 2-3ක පරාජයක ආරම්භයකින් පසුව ඔවුන් යළි තරගාවලියට අවතීර්ණ වෙමින් 3-0කින් මාලදිවයින් කණ්ඩායම පරාජය කළා.
(සටහන - වර්නන් ගුණසේකර)
