ශ්‍රී ලංකාවේ ප්‍රධානතම සංචාරක ක්‍රීඩා ආයතනයක් වන ලංකා ස්පෝට්රයිසන් (LSR – Lanka Sportreizen) 20 වැනි වරටත් සංවිධානය කළ ‘එල්.එස්.ආර්. කොළඹ ජාත්‍යන්තර මැරතන්’ තරගයේ කොළඹ සිට පමුණුගම දක්වා කිලෝමීටර් 21ක දුරකින් යුක්ත වූ අර්ධ මැරතන් තරගය ජය ගැනීමට ශ්‍රී ලංකා යුද හමුදාව අද සමත් විය.
තරගකරුවන් 210 දෙනෙකුගේ සහභාගිත්වයෙන් පැවති අර්ධ මැරතන් තරගය ජයග්‍රහණය කළේ කේ.එච්.එම්. සරත් කුමාර ය. මහියංගණයේ උපත ලබා බොරලන්ද වැලිමඩ පුහුණුව ලබන 32 හැවිරිදි කුමාර අද ජය ගත්තේ ඔහු සහභාගි වූ මංගල එල්.එස්.ආර්. කොළඹ මැරතන් තරගය වීම විශේෂත්වයකි.
“තරගය ඉතා හොඳින් සංවිධානය කර තිබුණා,” යනුවෙන් ඔහු සතුටු කඳුළු මැදින් 'ද ලීඩර්' වෙත ප්‍රකාශ කළේය.
සරත් කුමාරගේ දස්කම් සහ පුහුණුකරුට ප්‍රණාමය
මෑතකදී කොළඹ පැවති ජාත්‍යන්තර මැරතන් තරගයට වඩා තරගකාරිත්වයෙන් වැඩි මෙම තරගයේදී සිය කාලය වර්ධනය කර ගැනීමට හැකිවීම පිළිබඳව තමා අතිශය සතුටට පත්වන බව වසර 15ක් තිස්සේ දුර දිවීමේ ඉසව්වල නිරත වන කුමාර සඳහන් කළේය.
මෙම වසරේ ජාතික මීටර් 3000 බාධක දිවීමේ තරගයේ තෙවැනි ස්ථානය ද, ජාතික රට හරහා දිවීමේ තරගයේ හය වැනි ස්ථානය ද හිමිකර ගත් කුමාර, තමා ලැබූ ජයග්‍රහණය වෙනුවෙන් සිය පුහුණුකරු ලුතිනන් කර්නල් හෙන්නායක මහතාට කෘතඥතාව පළ කිරීමට අමතක නොකළේය.
මෙම තරගයේදී යුද හමුදාවේම මදුරංග උපුල් කුමාර දෙවැනි ස්ථානය හිමිකර ගත් අතර, ආර්.එම්.එස්. පුෂ්පකුමාර තෙවැනි ස්ථානය දිනා ගැනීමට සමත් විය.
අර්ධ මැරතන් තරගයේ ජයග්‍රාහක කේ.එච්.එම්. සරත් කුමාර
කිලෝමීටර් 10 තරගයේ පෙරමුණ බරකා ක්‍රීඩා සමාජයට
කිලෝමීටර් 10 ජයග්‍රාහකයෝ
කොළඹ සිට වත්තල හේකිත්ත දක්වා මහත් උද්යෝගයෙන් පැවති කිලෝමීටර් 10 තරගයේ පළමු ස්ථාන දෙක හිමිකර ගත්තේ කොළඹ බරකා ක්‍රීඩා සමාජය නියෝජනය කළ ක්‍රීඩකයින් ය. මෙහි ජයග්‍රාහකයා වූ රුවන් විජේනායක සහභාගි වූ පළමු එල්.එස්.ආර්. මැරතන් තරගය ද මෙය විය.
එහිදී එරංග තෙන්නකෝන් දෙවැනි ස්ථානයට පත් වූ අතර, ශ්‍රී ලංකා පොලිසියේ ආර්.එම්.ආර්. බණ්ඩාර තෙවැනි ස්ථානය දිනා ගත්තේය.
(සටහන | වර්නන් ගුණසේකර)
'ද ලීඩර්' ක්‍රීඩා වාර්තාකරු
