මැදපෙරදිග කළාපයේ පවතින යුදමය තත්ත්වය ගෝලීය ඉන්ධන සැපයුමට එල්ල කර ඇති දැඩි බලපෑම මෙයට ප්‍රධාන හේතුව වී ඇත.
ගෝලීය වෙළෙඳපොළට බොරතෙල් බැරල් මිලියන 400 ක වාර්තාගත සංචිතයක් මුදාහැරීමට ජාත්‍යන්තර බලශක්ති ඒජන්සියේ (IEA) සාමාජික රටවල් එනම් G7 රටවල් ඊයේ ඒකමතිකව එකඟ වී තිබියදීත් මෙම මිල ඉහළ යාම සිදුව තිබේ.
බදාදා දින අවසානයේ ගෝලීය තෙල් මිල දර්ශකය වන බ්‍රෙන්ට් බොරතෙල් මිල 8.7% කින් ඉහළ ගොස් බැරලයක් ඩොලර් 100 සීමාවේ පැවතුණි.
එමෙන්ම අමෙරිකානු තෙල් මිල දර්ශකය වන WTI මිලද 8.7% කින් ඉහළ ගොස් ඩොලර් 94.8 ක් ලෙස වාර්තා විය.
බැරලයකට ඩොලර් 200 කට තෙල් සඳහා සූදානම් වන්නැයි ඉරානය පවසයි
මැදපෙරදිග කලාපයේ පවතින දරුණු යුධමය වාතාවරණය හමුවේ ලෝක වෙළඳපොළේ බොරතෙල් බැරලයක මිල ඇමරිකානු ඩොලර් 200 දක්වා ඉහළ යා හැකි බවට ඉරාන හමුදා බලධාරීන් අනතුරු අඟවා තිබේ.
ඊයේ (11) දිනයේදී හෝමූස් සමුද්‍ර සන්ධිය ආශ්‍රිතව තවත් නෞකා තුනක් ප්‍රහාරයට ලක්වීමත් සමඟ මෙම තත්ත්වය උද්ගත වී ඇතැයි රොයිටර්ස් පුවත් සේවය වාර්තා කර ඇත.
පෙන්ටගනය විසින් "වඩාත්ම තීව්‍ර අමෙරිකානු-ඊශ්‍රායල ප්‍රහාර" ලෙස හඳුන්වනු ලැබූ ප්‍රහාර මාලාවකට මුහුණ දෙමින් සිටියද, තමන්ට තවදුරටත් ප්‍රතිප්‍රහාර එල්ල කළ හැකි බවත් බලශක්ති සැපයුම අඩාල කළ හැකි බවත් ඉරානය ප්‍රදර්ශනය කර තිබේ.
ඒ අනුව ඊයේ (11) දිනයේදී ඉරානය විසින් ඊශ්‍රායලය ඇතුළු මැදපෙරදිග පුරා විහිදුණු ඉලක්ක වෙත ප්‍රහාර එල්ල කර තිබිණ.
ලෝක තෙල් සැපයුමෙන් පහෙන් එකක් (1/5) ගමන් කරන හෝමූස් සමුද්‍ර සන්ධිය මේ වන විට අවහිර වී ඇති අතර, මෙය 1970 දශකයේ ඇති වූ තෙල් අර්බුදයෙන් පසු ලොව මුහුණ දෙන දරුණුතම බලශක්ති සැපයුම් බාධාව ලෙස විදේශ වාර්තා පෙන්වා දෙයි.
ඉරාන හමුදා විධානයේ ප්‍රකාශක ඊබ්‍රාහිම් සොල්ෆකාරි (Ebrahim Zolfaqari) අමෙරිකාව අමතමින් ප්‍රකාශ කළේ, "තෙල් බැරලයක මිල ඩොලර් 200 දක්වා ඉහළ යාමට සූදානම් වන්න. මන්ද තෙල් මිල තීරණය වන්නේ ඔබ විසින් අස්ථාවර කර ඇති කලාපීය ආරක්ෂාව මතයි," යනුවෙනි.
ටෙහෙරාන් නුවර බැංකු කාර්යාලයකට එල්ල වූ ප්‍රහාරයකට ප්‍රතිචාර වශයෙන්, අමෙරිකාව හෝ ඊශ්‍රායලය සමඟ ගනුදෙනු කරන බැංකු වෙත ඉරානය ප්‍රහාර එල්ල කරන බවට ද ඔහු අනතුරු ඇඟවීය.
මේ හේතුවෙන් මැදපෙරදිග වෙසෙන ජනතාව එවැනි බැංකු පද්ධතිවලින් අවම වශයෙන් මීටර් 1,000ක් දුරින් සිටිය යුතු බවට ද ඉරාන හමුදා ප්‍රකාශකයා උපදෙස් දී තිබෙන බව වාර්තා වේ.
පවතින උණුසුම් තත්ත්වය හමුවේ වුවද, අමෙරිකානු ජනාධිපති ඩොනල්ඩ් ට්‍රම්ප් මෙම යුද්ධය අවසන් කිරීමට කඩිනම් විසඳුමක් සොයාගනු ඇතැයි යන බලාපොරොත්තුව මත කොටස් වෙළඳපොළ යම් ස්ථාවරත්වයක් පෙන්නුම් කරන බව ද රොයිටර් පුවත් සේවය වාර්තා කරයි.
මුලාශ්‍ර :
Get ready for $200 a barrel: Iran warns the world as oil on the boil
Prepare for oil at $200 a barrel, Iran says
