නව කොරෝනා වෛරසය ආසාදිතයෙකු බවට හඳුනාගෙන තිබු ඉන්දියාවේ සිට මෙරටට පැමිණි 47 හැවිරිදි කාන්තාවක් මියගොස් ඇති බව සෞඛ්‍ය අමාත්‍යාංශය පවසයි.
මෙම කාන්තාව අධික දියවැඩියාව රෝගයෙන් සහ පිළිකා රෝගයෙන් පෙළෙමින් සිටිය බවත්, හදවත් රෝග ලක්ෂණ ද පෙන්නුම් කළ අයෙකු බවත් සෞඛ්‍ය අමාත්‍යාංශය සඳහන් කරයි.
මියගොස් ඇත්තේ මාවතගම, වෑඋඩ ප්‍රදේශයේ පදිංචිව සිටි කාන්තාවකි.
ඇය ඉරණවිල ප්‍රතිකාර මධ්‍යස්ථානයේ ප්‍රතිකාර ලබමින් සිට ඇති අතර ඊයේ (22) රාත්‍රියේ වැඩිදුර ප්‍රතිකාර සඳහා කොළඹ අයි.ඩී.එච් රෝහලට රැගෙන ඒමෙන් පසු මියගොස් තිබේ.
ආසාදිතයින් සංඛ්‍යාව 2947 දෙනෙකු දක්වා ඉහළට :
මේ අතර මෙරට කොවිඩ් නයින්ටීන් ආසාදිතයින්ගේ සංඛ්‍යාව 2947 දෙනෙකු දක්වා ඉහළ ගොස් තිබේ.
ඊයේ (23) දිනයේ ආසාදිතයින් 06 දෙනෙකු හඳුනාගත් බව වසංගත රෝග විද්‍යා අංශය සඳහන් කළේය.
කුවේට් සිට පැමිණි දෙදෙනෙකු, චෙන්නාහි සිට පැමිණි දෙදෙනෙකු, අමෙරිකාවේ සිට පැමිණි එක් අයෙකු සහ එක්සත් අරාබි එමීර් රාජ්‍යයේ සිට පැමිණි අයෙකු එසේ ආසාදිතයින් ලෙස හඳුනාගෙන තිබුණි.