මධ්‍යම ගාසා තීරයේ දෙයිර් අල්-බලා හි නගර සභා ගොඩනැගිල්ලට එල්ල කළ ඊශ්‍රායල ගුවන් ප්‍රහාරයකින් 10 දෙනෙක් මිය ගියහ. අවතැන් පලස්තීනුවන් ආධාර රැගෙන යාමට එහි රැස්ව සිටි අවස්ථාවක එම ප්‍රහාර එල්ල කර තිබේ. දෑත් වාරුවෙන්, රික්ෂෝ සහ පෞද්ගලික මෝටර් රථ මගින් තුවාළ කරුවන් සහ මළ සිරුරු අසල පිහිටි රෝහල වෙත රැගෙන යාමට යුහුසුළුව පියවර ගැනිණි.
ප්‍රහාර හමුවේ, මධ්‍යම ගාසාවේ, හමාස් පරිපාලන කමිටුවේ ප්‍රධානියා වූ දියාබ් අලි අල්-ජාරු (Diab Ali al-Jaru) ඝාතනය විය. දෙයිර් අල්-බලා හි නගරාධිපති ලෙස ද කටයුතු කළ ඔහු, සිය ඝාතන ඉලක්කය වූ බව ඊශ්‍රායල හමුදා ප්‍රකාශ කළහ. ඔහු හමාස් සන්නද්ධ ත්‍රස්තයින්ට සහාය දැක්වූවකු බව එම හමුදා පැවසූහ. මධ්‍යම ගාසා තීරයේ තවත් ස්ථාන කිහිපයකට වෙන් වශයෙන් එල්ල කළ ඊශ්‍රායල ප්‍රහාරවලින් සිව් දෙනෙක් ඝාතනය වූහ.
එම සිදුවීමට පෙර, අත්‍යවශ්‍ය මානුෂීය ආධාර රැසක් කළ ගබඩාවක් ආසන්නයේද ද ඊශ්‍රායල ගුවන් ප්‍රහාර එල්ල විය. සඟවා තිබූ අවි සහ එහි සිටි හමාස් ත්‍රස්තවාදීන් ඉලක්ක කොට එම ප්‍රහාර එල්ල කළ බව ඊශ්‍රායල හමුදා පැවසූහ. ගසා තීරයේ සිට ඊශ්‍රායලය දෙසට ඊයේ සහ සිකුරාදා (13) ද හමාස් රොකට් ප්‍රහාර එල්ල කෙරිණි.
මීට පෙර, අවතැන් පලස්තීනුවන් රැඳී සිටි ගාසා නගරයේ පැරණි සරණාගත කඳවුරක් වෙත ද ඊශ්‍රායල ගුවන් ප්‍රහාර එල්ල විය. එහි රැස්ව සිටි හමස් ත්‍රස්තවාදීන් ඉලක්ක කර එම ප්‍රහාර එල්ල කළ බව ඊශ්‍රායල හමුදා ප්‍රකාශ කළහ. එම ප්‍රහාරයෙන්, මවක සහ ඇගේ කුඩා දරුවා ඇතුළු පුද්ගලයින් 7ක් මරුමුවට පත් වූ බව සෞඛ්‍ය අංශ ප්‍රකාශ කළේය.
ගාසා නගරයේ සිදු කළ තවත් ඊශ්‍රායල ප්‍රහාරයකින් ඩුබායි අල් මෂාද් (Dubai Al Mashhad) රූපවාහිනියේ සේවයේ කළ මොහොමෙඩ් බාලෞෂා (Mohammed Baalousha) නම්, ජනමාධ්‍යවේදියකු ද ජීවිතක්ෂයට පත්විය. ඉකුත් වසරක කාලය තුළ, ගාසා තීරයේ සටන් වලින් ජනමාධ්‍යවේදීන් සහ මාධ්‍ය කාර්යමණ්ඩල සේවකයින් 137ක් ඝාතනය වී ඇතැයි, "ජනමාධ්‍යවේදීන් ආරක්ෂා කිරීමේ කමිටුවේ" (The Committee to Protect Journalists) වාර්තාවක දැක්වේ.
ඊජිප්තුවේ සංචාරයක නිරත එක්සත් ජනපද රාජ්‍ය නිලධාරීන් සහ ඊජිප්තු ජනපති අබ්දෙල් ෆාටා අල්-සිසී (Abdel Fattah al-Sisi) අතර ගාසා සටන් විරාමයක් සහ ප්‍රාණ ඇපකරුවන් හුවමාරු කර ගැනීම පිලිබඳ සාකච්ඡාවක් ඊයේ පැවැත්විණි.
(Reuters ඇසුරින් සටහන : හර්ෂ උදයකාන්ත විසිනි)