ඉකුත් සතියේ එරට පැවති න්‍යෂ්ටික අභ්‍යාසයකදී එම අත්හදා බැලීම සිදු කෙරිණි.
යුක්‍රේන යුද්ධය අවසන් කිරීමට එක්සත් ජනපදය ප්‍රමුඛ බටහිර රටවලින් නැගෙන දැඩි බලපෑම හමුවේ රුසියාව අවනත නැති බව නවතම න්‍යෂ්ටික අභ්‍යාසයෙන් ප්‍රත්‍යක්ෂ වන්නේ යැයි, ජාත්‍යන්තර විචාරකයෝ පවසති. යුක්‍රේන යුද්ධය අවසන් කිරීමට වහා සටන් විරාමයකට යන ලෙස එක්සත් ජනපදය, රුසියාවට බල කර සිටී.
මෙම මස 21 දා අත්හදා බැලුණු නවතම කෲස් මිසයිලය, ගුවනේ පැය 15ක කාලයක් රැඳී සිටිමින් කි. මී. 14,000 ක දුරක් ඇදී ගිය බව රුසියානු හමුදා පවසති. ලොව පවතින සුපිරි ගුවන් ආරක්ෂක පද්ධතීන්ට මුවා වී, පෙර නිර්ණය සැඟවූ ගුවන් මාවතක, අසීමිත දුරක් ඇදී යා හැකි පරිදි එය නිර්මාණය කර තිබේ. එවැනි, අවියක් මෙතෙක් ලොව කිසිදු රාජ්‍යයක් සතුව නැති බව, රුසියානු ජනපති කියයි.
අධි ආරක්‍ෂිත මිසයිල නාශක පද්ධතියක් ඉදි කිරීම පිණිස සහ නැටෝ (NATO) හමුදා සන්ධානය තවදුරටත් ශක්තිමත් කිරීමේ අරමුණින්, එක්සත් ජනපදය 2001 වසරේ ඒක-පාර්ශ්වීයව බැලස්ටික් මිසයිල නාශක ප්‍රඥප්තියෙන් ඉවත් විය. නව අවිය ඊට ප්‍රතිචාර ලෙස තැනූවක් බව රුසියාව කියා සිටී.
පැතූ ලෙස කඩිනමින් යුක්‍රේනය යටත් කර ගැනීමට අසමත් වූ රුසියාව, "කඩදහි කොටියෙකැයි" ජනපති ට්‍රම්ප් සරදමින් පවසයි. එම යුද්ධයේදී, එක්සත් ජනපදය විසින් යුක්‍රේනය වෙත රුසියාවේ දිගු දුර බලශක්ති යටිතල පහසුකම් පිලිබඳ බුද්ධි තොරතු සැපයූ බවට තොරතුරු පවතී. ඊට ප්‍රතිචාර ලෙස අවශ්‍ය ඕනෑම මොහොතක, අවශ්‍ය ඕනෑම ඉලක්කයක් වෙත ප්‍රහාර එල්ල කිරීමට දැන් තමන් සතුව අවියක් පවතින බවට රුසියාව උදම් අනයි.
මින් මතු, රුසියානු ඉලක්කයක් වෙත බටහිර සහායෙන් සතුරු ප්‍රහාරයක් එල්ල වුවහොත්, එහි ප්‍රතිඵල දරුණු හෝ අති මහත් වනු ඇතැයි, ජනපති පුටින් පවසයි.
(සටහන | Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
10/27/2025
මුලාශ්‍රය :
Russia tested new nuclear-powered Burevestnik cruise missile
