සෙනසුරාදා (24) උදෑසන බැන්ඩුන් බරාට් ප්‍රදේශයේ නේවාසික කලාපයක එම නාය යෑම සිදු විය. පෙර දින හටගත් ධාරාණිපාත වර්ෂාව ඊට හේතුවූ බව බලධාරීහු පැවසූහ. අයහපත් කාලගුණ තත්ත්වය තවත් සතියක කාලයක්වත් නොවෙනස්ව පවතිනු ඇති බවට ද අනාවැකි පළකර තිබේ.
නාය යෑම සිදුවූ පසීර් ලංගු ගම්මානය එරට ජකර්තා අගනුවරට කි.මී.100ක් පමණ ගිනිකොණ දෙසින් පිහිටියේය. නිවාස 30ක් පමණ නායට යට ව පවතී. අතුරුදන් පුද්ගල සංඛ්‍යාව 73 කි.
ඊයේ එම ප්‍රදේශයේම සිදුවූ අතුරු නාය යෑමක් හේතුවෙන් මුදා ගැනීම් මෙහෙයුම් අඩපණ විය. එම මෙහෙයුම් පිණිස ඩ්‍රෝන යානා සහ බර යන්ත්‍රෝපකරණ අවශ්‍යව පවතී.
ඉකුත් සතියේ ඉන්දුනීසියාවේ බටහිර ජාවා සහ ජකර්තා ඇතුළු ප්‍රදේශ රැසක ක්ෂණික ජල ගැලීම් හට ගත්තේය. ප්‍රදේශ වාසීන්ට නිවෙස් අතැර උස් බිම් කරා පලා යාමට සිදු විය.
සුමාත්‍රා දිවයින දරුණු වැසි සහිත සුළි කුණාටුවකින් හට ගත් ජල ගැල්මෙන් සහ නාය යෑමෙන් විපතට පත්ව දෙමසක ඇවෑමෙන් සෙනසුරාදා නාය යාම වාර්තා විය. සුමාත්‍රා විපතින් පුද්ගලයින් 1200ක් ජීවිතක්ෂයට පත් විය. නිවාස රැසක් මුළුමණින් විනාශයට පත් වූ අතර මිලියනයකට අධික ජනගහනයක් අවතැන් වූහ.
(සටහන |Reuters ඇසුරින්; හර්ෂ උදයකාන්ත පීරිස්)
1/26/2026
(harshaprs@yahoo.com)
මුලාශ්‍රය :
Death toll from landslide in Indonesia's West Java rises to 17
