මධ්‍යම රාත්‍රියේ සිට එල්ල වූ අඛණ්ඩ ඊශ්‍රායල ප්‍රහාර හේතුවෙන් අනතුරට පත් පුද්ගල ජීවිත මුදා ගැනීමේ මෙහෙයුම් දුෂ්කරව ඇතැයි, ලෙබනන සෞඛ්‍ය බලධාරීහු පැවසූහ. පුද්ගලයින් 18ක් ජීවිතක්ෂයට පත්ව 33 දෙනකු තුවාල ලබා ඇතැයි එම මූලික විමර්ශනවලදී අනාවරණය ව තිබේ. එම සංඛ්‍යා තව දුරටත් ඉහළ යා හැකි බව, එරට සෞඛ්‍ය බලධාරීහු පවසති.
ලෙබනන නබටීයේ දිස්ත්‍රික්කය වෙත ඊයේ රාත්‍රී සිට අද අළුයම තෙක්, අඛණ්ඩ ගුවන් සහ ෂෙල් ප්‍රහාර එල්ල වූ බව එහි නේවාසික පිරිස් පැවසූහ. එය පසු ගිය සති කිහිපයෙන් අනතුරුව සිදු වූ බරපතලම ඊශ්‍රායල බෝම්බ හෙළීම බව ලෙබනන, NNA රාජ්‍ය ප්‍රවෘත්ති ඒජන්සිය නිවේදනය කළේය.
දකුණු ලෙබනනයේ හිස්බොල්ලා සන්නද්ධ මෙහෙයුම් මධ්‍යස්ථාන සහ ඉලක්ක රැසක් වෙත එම ප්‍රහාර එල්ල කළ බව, ඊශ්‍රායල හමුදා පැවසූහ. එම ප්‍රති ප්‍රහාර, ඉරාන සහාය හිමි සන්නද්ධ කල්ලිය විසින් පුන පුනා සිදු කළ සටන් විරාම උල්ලංඝනයට ප්‍රතිචාර වශයෙන් බව ද, ඊශ්‍රායල හමුදා ප්‍රකාශ කළහ.
දකුණු ලෙබනන කලාපයේ අලි අල්-ටහෙර් කඳු ප්‍රදේශය තරණය කර ලඟා වෙමින් සිටි ඊශ්‍රායල හමුදා වෙත ආක්‍රමණශීලී ප්‍රහාරයක් එල්ල කළ බව හිස්බොල්ලා සාමාජිකයෝ කීහ. එහිදී මිසයිල සහිත 'මෙර්කාවා' යුද ටැංකි තුනක් විනාශ කළ බව ද, රොකට් සහ කාලතුවක්කු රැගෙන එමින් සිටි ඊශ්‍රායල හමුදා සිය ඉලක්කය වූ බව ද හිස්බොල්ලා සටන්කරුවෝ කීහ.
ඊශ්‍රායලය විසින් දකුණු ලෙබනනයේ සිය නව සීමා ව්‍යාප්තිය දැක්වෙන සිතියමක් නිකුත් කර දිනක අවෑමෙන් මෙම නව ගැටුම් හට ගත්තේය.
ඊශ්‍රායල හමුදා, දකුණු ලෙබනනයේ කි.මී.10ක සීමාවේ තබන්නැයි, එක්සත් ජනපද ජනපති ඩොනල්ඩ් ට්‍රම්ප් විසින් සිදු කළ ඉල්ලීම පිලිබඳ ඔහු හා දැඩි සාකච්ඡාවේ පසුවන බව ඊශ්‍රායල නිලධාරියකු පැවසී යැයි, රොයිටර්ස් පුවත් සේවය සඳහන් කළේය. දකුණු ලෙබනනයේ සිය හමුදා ඉවත් කරගැනීම ඊශ්‍රායලය තරයේ ප්‍රතික්ෂේප කර සිටී. මෙම සතියේ ද, එම ඉලක්ක වෙත හිස්බොල්ලා කල්ලිය එල්ල කළ "මරාගෙන මැරෙන" ඩ්‍රෝන ප්‍රහාර හේතුවෙන් ඊශ්‍රායල භටයින් කිහිප දෙනෙක් ජීවිතක්ෂයට පත්ව, තවත් පිරිසක් තුවාල ලදහ.
(සටහන: හර්ෂ උදයකාන්ත පීරිස්)
6/19/2026
(harshaprs@yahoo.com)
මුලාශ්‍රය
Lebanon hostilities escalate, with Israeli leaders defiant in face of US-Iran deal
