උතුරු කොරියාව ප්‍රථම වරට ප්‍රහාරක ඩ්‍රෝන ශක්තිය පෙන්වයි

උතුරු කොරියාවේ, ආරක්ෂක විද්‍යා ඇකඩමියේ (North Korea's Academy of Defence Sciences) ඩ්‍රෝන අධ්‍යයනායතානයේදී, එම අත්හදා බැලීමේ අභ්‍යාසය පවත්වා තිබේ. අත්හදා බැලීම් සාර්ථක බව උතුරු කොරියාව පවසයි.

පූර්ව නිර්ණිත ගුවන් පථ ඔස්සේ, නිවැරදි ඉලක්ක හඳුනා පහර දීමට සමත් ඩ්‍රෝන යානා, මෙම අභ්‍යාස සඳහා යොදා ගෙන තිබේ. අවම වශයෙන් වර්ග 4 කට අයත් ප්‍රහාරක ඩ්‍රෝන යානා ඒ අතර වූ බව වාර්තා වේ. ඇතැම් ඩ්‍රෝන යානා ගුවන් ගත කිරීමට රොකට් තාක්ෂණයද යොදා ගෙන තිබේ. 

එරට පාබල සහ විශේෂ උපක්‍රමික හමුදා මෙහෙයුම් අංශ සඳහා, වැඩි වශයෙන් ප්‍රහාරක ඩ්‍රෝන යානා නිෂ්පාදනයට උතුරු කොරියානු නායකයා විසින් උපදෙස් දී ඇත. ගුවනේ පමණක් නොව, සාගර අභ්‍යන්තරයේ පවා ගමන් කළ හැකි, උපක්‍රමික ඩ්‍රෝන යානා නිෂ්පාදනය සඳහා මේ වන විට උතුරු කොරියාවේ අවධානය යොමු වී ඇත. 

 

රුසියාවේ සහ ඉරානයේ නිෂ්පාදිත ප්‍රහාරක ඩ්‍රෝන යානා, එමරටවලින් උතුරු කොරියාවට ත්‍යාග වශයෙන් ලැබී ඇති බවට දකුණු කොරියාව සැක පළ කරයි. ඒ අනුව, උතුරු කොරියාව විසින් එම ඩ්‍රෝන තාක්ෂණය වැඩි දියුණු කර තිබේ ද යන්න පිළිබඳව තව දුරටත් විමර්ශනය කෙරේ. න්‍යෂ්ටික ශක්තියෙන් සන්නද්ධ රාජ්‍යයක් වන උතුරු කොරියාව විසින් දීර්ඝ කාලයක සිට, රුසියාව සහ ඉරානය සමග සමීප හමුදා සහයෝගිතා පවත්වයි. උතුරු කොරියාව, එරට ප්‍රහාරක ඩ්‍රෝන තාක්ෂණය අනාවරණය කළ ප්‍රථම අවස්ථාව මෙය බව ද දකුණු කොරියාව පවසයි. 

මෑතකදී, උතුරු කොරියානු ඩ්‍රෝන යානා දකුණු කොරියානු ගුවන් කලාපය සහ ගුවන් පියාසැරි මුක්ත කලාපයක් ද ආක්‍රමණය කළේය. එවැනි ඉදිරි ඩ්‍රෝන ආක්‍රමණයකදී, සතුරු යානා විනාශ කිරීමට, ලේසර් අවි යොදා ගන්නා බවට දකුණු කොරියාව විසින් අනතුරු අඟවා තිබේ. යම් හෙයකින් ඒ සඳහා ලේසර් අවි භාවිතා කළ හොත්, දකුණු කොරියාව, හමුදා ක්‍රියාන්විත සඳහා ලේසර් තාක්ෂණය යොදා ගත් ලොව ප්‍රථම රට බවට පත්වනු ඇත.  

 

(Reuters ඇසුරින් සටහන:  හර්ෂ උදයකාන්ත) 

මූලාශ්‍ර:

North Korea's Kim Jong Un oversees tests of 'suicide drones'