අග්‍රාමාත්‍ය නෙතන්යාහුට සහ රජයට එරෙහිව 750,000ක ට අධික ඊශ්‍රායල ජනතාව වීදි බැස සිටී.
වහාම සටන් විරාමයකට යන ලෙස සහ ඉතිරි ප්‍රාණ ඇපකරුවන් ගලවා ගන්නා ලෙස අග්‍රාමාත්‍යවරයාට බල කරමින්, ඔහුට එරෙහි සටන් පාඨ කියමින්, ඔවුහු උද්ඝෝෂණයේ නියැලෙමින් සිටිති.
පලස්තීන හමාස් අත්අඩංගුවේ සිටියදී, නොබෝදා, ගාසා තීරයේදී ඝාතනය වූ, ඊශ්‍රායල ප්‍රාණ ඇප කරුවන් සය දෙනකුගේ සිරුරු ඊශ්‍රායල හමුදාව විසින් එරටට භාර දීමෙන් අනතුරුව දෛනික මහජන කැළඹීම් උග්‍ර විය.
මේ වන විට, ඊශ්‍රායල අගනුවර ටෙල් අවිව් හි පමණක් 500,000 කට අධික පිරිසක් විරෝධතාවන්ට එක්ව සිටිති. තදාසන්න සහ රට පුරා විවිධ පෙදෙස් හි තවත් 250,000 ක පිරිසක් ඊට සහාය දක්වමින් වීදි බැස සිටින බව අල්ජසීරා පුවත් සේවය පවසයි.
රජය මහජන මතයට ගරු කර සිය දරදඬු ප්‍රතිපත්ති වෙනස් කරගන්නා තෙක් අඛණ්ඩව උද්ඝෝෂණය කරන බව ඔවුහු පවසති.
ඝාතනය කරන ලද ඊශ්‍රායල ප්‍රාණ ඇපකරුවන්ගේ පවුල්වල ඥාතීන් ඉදිරියේ, ඔවුන් නිදහස් කරගැනීම ට නොහැකි වීම පිළිබඳව අග්‍රාමාත්‍ය නෙතන්යාහු පසුගිය දා ප්‍රසිද්ධියේ සමාව අයැද සිටියේය. එහෙත්, ඉන් උගත් පාඩමක් නොවේනම්, තව දුරටත් ඔහු අයදින්නේ කෙබඳු සමාවක් දැයි මහජනතාව ප්‍රශ්න කරති.
"අපෙන් ඔබට කිසිදු සමාවක් නැතැයි", ඔවුහු එක හඬින් කියා සිටිති.
ඉදිරියේ ඇති එකම විසඳුම අඛණ්ඩ සටන් විරාමයක් පමණක් බව උද්ඝෝෂකයෝ පවසති.
ඊශ්‍රායල ප්‍රාණ ඇපකරුවන් 100ක ට අධික සංඛ්‍යාවක් තව දුරටත් හමාස් අත්අඩංගුවේ පසුවන බව වාර්තා වේ. එහෙත්, ඔවුන් අතරෙන් තුනෙන් එකකවත් පිරිසක් මේ වන විටත් ඝාතනයට ලක්ව ඇතැයි අපේක්ෂා කරන බව ඊශ්‍රායල හමුදා පවසති.
මීට පෙර, පලස්තීන සිරකරුවන් 240ක් වෙනුවෙන්, ඊශ්‍රායල ප්‍රාණ ඇපකරුවන් 105 දෙනකු මුදා හැරීමට හමාස් සංවිධානය විසින් පියවර ගෙන තිබිණි.
(Aljazeera ඇසුරින් සටහන; හ ර් ෂ උදයකාන්ත)
මූලාශ්‍ර:
750,000 Israelis hit the streets over Netanyahu’s failed truce efforts