ප්‍රහාරයට පෙරාතුව, උතුරු ඊශ්‍රායලයේ ආරක්ෂක සයිරන් නාද වූ බව ප්‍රදේශවාසීහු පවසති. දකුණු ලෙබනනයේ ඊයේ (08) සහ අද සටන් වලින් ඊශ්‍රායල හමුදා සෙබළුන් තිදෙනෙක් බරපතල තුවාළ ලබා ඇතැයි ඊශ්‍රායලය පවසයි.
හිස්බුල්ලා නායකයා ඝාතනය කිරීමෙන් අනතුරුව, සංවිධානයේ නායකත්වය භාරගත් ජ්‍යෙෂ්ඨ සාමාජිකයින් දෙදෙනෙක්, ඊශ්‍රායල ගුවන් ප්‍රහාර හමුවේ ඝාතනය වූ බව අග්‍රාමාත්‍ය බෙන්ජමින් නෙතන්යාහු පැවසීය. ඔහුගේ එම ප්‍රකාශය සහිත වීඩියෝ පටයක් එරට අග්‍රාමාත්‍ය කාර්යාලය විසින් ඊයේ මාධ්‍යයට නිකුත් කර තිබිණි.
ඊශ්‍රායල හමුදා, හිස්බුල්ලා සංවිධානය මුළුමනින්ම අඩපණ කර ඇතැයි අග්‍රාමාතය නෙතන්යාහු එහිදී ප්‍රකාශ කළේය. එම සංවිධානයේ නායකනස්රල්ලා ඝාතනය කිරීමෙන් පසු, එම තනතුරට පත් නායකයා ඝාතනය කළ අතර ඉන් පසු පැමිණි නායකයාද ඝාතනය කළ බව ඔහු සඳහන් කළේය. පසුව ඝාතනය කළ හිස්බුල්ලා නායකින් දෙදෙනා කවුරුන්දැයි අනාවරණය වී නැත.
සටන් විරාමයක් පිණිස සාකච්ඡා සඳහා තමන් සූදානම් බව හිස්බුල්ලා නියෝජ්‍ය නායක නයිම් කාසෙම් (Naim Qassem) විසින් ප්‍රකාශ කර තිබේ.
ඇමෙරිකානු ජනපති ජෝ බයිඩන්
ඉරානයට පෙරළා පහරදීමේ සැලසුම් කෙටුම්පත් කිරීමට ඇමෙරිකානු ජනපති ජෝ බයිඩන් සහ අග්‍රාමාත්‍ය බෙන්ජමින් නෙතන්යාහු අතර දුරකථන සංවාදයක් අද පැවැත්වීමට නියමිතය.
(Reuters ඇසුරින් සටහන : හර්ෂ උදයකාන්ත විසිනි)
මූලාශ්‍ර:
Hezbollah targets Israeli troops on Lebanese border, sirens in Beirut