එහෙත්, දැනට අක්‍රියව පවතින එම ගිණුම ඔස්සේ, නීති විරෝධී ගනු දෙනු සිදු කළ බවට අවබෝධයක් නැතැයි ද ඔහු ප්‍රකාශ කළේය.
ඔහු අග්‍රාමාත්‍ය ධුරයේ රැඳී සිටි 2009 වසරේ, මැලේසියා සංවර්ධන, රාජ්‍ය ගිණුම (1MDB) ආරම්භ කෙරිණි. එහෙත්, ඔහුගේ ධුර කාලය අතර තුර, එම ගිණුම සම්බන්ධයෙන් අවම වශයෙන් රටවල් 6 ක දී වංචා විමර්ශන පැවැත්විණි. එහිදී, උසස් රාජ්‍ය නිලධාරීන් සහ ඔවුන්ගේ සහචරයින් විසින් එම ගිණුම අවභාවිතා කර ඇමෙරිකානු ඩොලර් බිලියන 4.5 කට ආසන්න මූල්‍ය වංචා සිදු කර ඇතැයි අනාවරණය විය.
ඒ පිලිබඳ නඩු විභාගයකින් අනතුරුව, 2022 වසරේ, මැලේසියාවේ ඉහළම අධිකරණය, දූෂණ සහ මුදල් විශුද්ධිකරණ චෝදනා සම්බන්ධයෙන් අග්‍රාමාත්‍යවරයා වැරදිකරු බවට තීන්දු කළේය. ඒ අනුව, රාජ්‍ය ගිණුම ඔස්සේ ඇමෙරිකානු ඩොලර් බිලියන 10 ක අයථා මුදල් ගනුදෙනු සම්බන්ධයෙන් ඔහු වසර 12 ක සිර දඬුවමක ට යටත් කෙරිණි. අනතුරුව, හිටපු මැලේසියා රජු මුලසුන හෙබවූ, විශේෂ, සමා ප්‍රදාන මණ්ඩලයක් එම දඬුවම් කාලය හරි අඩකින් අඩු කළේය.
71 හැවිරිදි එරට හිටපු අග්‍රාමාත්‍යවරයා, එල්ල වූ චෝදනා සම්බන්ධයෙන් තමා නිවැරදි කරු බවට දිගින් දිගටම කියා සිටියද, ඊයේ ලිඛිත නිවේදනයක් නිකුත් කරමින්, එම රාජ්‍ය ගිණුමේ අවභාවිතාව පිළිබඳ සමාව අයැද සිටින බව කියා සිටියේය.
ඔහුගේ පුත් මොහොමඩ් නිසාර් මොහද් නජිබ් (Mohamad Nizar Mohd Najib) සිය පියාගේ ලිපිය මාධ්‍ය සාකච්ඡාවක් හමුවේ ඉදිරිපත් කළේය.
තමා අග්‍රාමාත්‍ය ධුරයේ සහ මුදල් ආමාත්‍ය ලෙස කටයුතු කළ සමයේ, ඔහු යටතේ පැවති එම රාජ්‍ය ගිණුම අවභාවිතා වීම සම්බන්ධයෙන්, ඔහු මැලේසියානු ජනතාවගෙන් සමාව අයැද සිටින බව එහි සඳහන් විය. ගිණුම අවභාවිතා වන බවට වාර්තාවූ මුල් අවස්ථාවේදීම, වෙනස් ආකාරයකින් ක්‍රියා කළ යුතුව තිබිණැයි ඔහු සිය ලිපිය මගින් දන්වා තිබිණි.
කෙසේ වෙතත්, අග්‍රාමාත්‍යවරයාගේ ධුර කාලයේම ඇරඹි ඒ සම්බන්ධ විමර්ශන, අතරමග නැවතුණු බවත්, සාක්ෂිකරුවන් අතුරුදන්වීම් සහ ඔවුන්ට එරෙහි මරණ තර්ජන වාර්තාවූ බවත්, ඒ පිලිබඳ විමර්ශනය කළ නිලධාරීහු මීට පෙර ප්‍රකාශ කළහ.
සිය ඉතිරි දඬුවම් කාලය, නිවාස අඩස්සියේ ගෙවා දැමීමට ඉඩ ලබා දෙන ලෙස හිටපු අග්‍රාමාත්‍යවරයා විසින් ඉල්ලීමක් ද කර තිබේ.
(Reuters ඇසුරින් සටහන : හර්ෂ උදයකාන්ත විසිනි)