බ්‍රිතාන්‍ය සංක්‍රමණික නීති ඉහිල් කිරීමට සහ වර්ගවාදය පිටුදැකීමට එරෙහිව එම විරෝධතා පැවැත්විණි.
ගැටුම් ඇතිවීම වැලැක්වීමට, නගරය පුරා දැඩි පොලිස් ආරක්ෂාව යොදා තිබු බව රොයිටර්ස් පුවත් සේවය පැවසීය.
"රාජධානිය එක්සත් කරමු" යන තේමාව රැගත් එම විරෝධතාවට, බ්‍රිතාන්‍ය ජාතිකයෝ දහස් ගණනක් එක් වූහ. සංක්‍රමණික විරෝධී සහ මුස්ලිම් විරෝධී සමාජ ක්‍රියාකරුවකු වන ටොමී රොබින්සන් යන අන්වර්ථ නාමයෙන් හැඳින්වෙන ස්ටීවන් යක්ස්ලි-ලෙනන් (Stephen Yaxley-Lennon) විසින් එම විරෝධතා සංවිධානය කර තිබිණි. "රජය, බ්‍රිතාන්‍ය මහජනතාව වෙනුවෙන් පෙනී සිටින්නේ කවදාද?" යනුවෙන් දැක්වෙන බැනර ප්‍රදර්ශනය කරමින්, ඉංග්‍රීසි සහ බ්‍රිතාන්‍ය ධජ රැගත් පෙළපාලිකරුවෝ පාර්ලිමේන්තුව දෙසට පා ගමනින් ගියහ.
"සරණාගතයින් සාදරයෙන් පිළිගනිමු", සහ "දක්ෂිණාංශිකයින් පාගා දමනු" යන තේමා පාඨ රැගත්, බ්‍රිතාන්‍යය තුළ වර්ගවාදයට එරෙහි පිරිසක් සහ වෘත්තීය සමිති කිහිපයක්ද, අන්ත දක්ෂිණාංශිකයින්ට එරෙහි සිය විරෝධතා දැක්වීම පිණිස ඊයේ, ලන්ඩන් නුවර වීදි බටහ.
මේ අතර, "සරණාගතයින් සාදරයෙන් පිළිගනිමු", සහ "දක්ෂිණාංශිකයින් පාගා දමනු" යන තේමා පාඨ රැගත්, බ්‍රිතාන්‍යය තුළ වර්ගවාදයට එරෙහි පිරිසක් සහ වෘත්තීය සමිති කිහිපයක්ද, අන්ත දක්ෂිණාංශිකයින්ට එරෙහි සිය විරෝධතා දැක්වීම පිණිස ඊයේ, ලන්ඩන් නුවර වීදි බටහ.
නගරයේ මහජන සාමය පවත්වාගැනීම සම්බන්ධයෙන් සියලු ආරක්ෂක පියවර ගෙන ඇතැයි එහි නියෝජ්‍ය සහකාර කොමසාරිස් රැෂෙල් විලියම්ස් පැවසීය. ජන ජීවිතය කඩාකප්පල් කරන ආකාරයේ කිසිදු ක්‍රියාවකට ඉඩ නැතැයිද, ඕනෑම සිදුවීමකට මුහුණ දීමට සූදානමින් ආරක්ෂක අංශ ඔක්තොම්බර් 25 සිට සීරුවෙන් තබා ඇතැයි ද ඇය වැඩි දුරටත් සඳහන් කළාය.
බ්‍රිතාන්‍යයේ සවුත්පොර්ට් (Southport) හි නර්තන වැඩමුළුවකට සහභාගී වෙමින් සිටි ගැහැණු ළමුන් තිදෙනෙක් පසුගිය ජුලි මස සාහසිකයකු විසින් ඝාතනය කෙරිණි. ඝාතකයා මුස්ලිම් ජාතික සංක්‍රමණිකයකු බවට සමාජ මාධ්‍ය ඔස්සේ වැරදි පුවත් පළවීමත් සමග, රට පුරා දරුණු විරෝධතා රැල්ලක් පැන නැගිණි. ඊට මුලපිරූ අන්ත දක්ෂිණාංශික විරෝධතාකරුවන්, බ්‍රිතාන්‍ය අග්‍රාමාත්‍ය කෙයර් ස්ටාර්මර් (Keir Starmer) ගේ සෘජු දෝෂ දර්ශනයට ලක් විය.
විරෝධතාකරුවෝ, බ්‍රිතාන්‍යයේ, සරණාගතයින් රැඳී සිටි හෝටල සහ මුස්ලිම් පල්ලි ඉලක්ක කර ප්‍රහාර එල්ල කළහ. එය, බ්‍රිතාන්‍යයේ අන්ත දක්ෂිණාංශික වියරුව හා මැර බලය විදහා පෑමක් ලෙස, අග්‍රාමාත්‍යවරයාගේ දැඩි විවේචනයට ලක් විය. එම විරෝධතාවන්හිදී, 1500කට අධික පිරිසක් අත්අඩංගුවට ගැනිණි. ඉන් 1000 කට එරෙහිව මේ වන විට, අධිකරණ ක්‍රියාමාර්ග ගෙන තිබේ.
තමන් "දේශප්‍රේමීන්" ලෙස හඳුන්වා ගන්නා දක්ෂිණාංශික විරෝධතාකරුවෝ, බ්‍රිතාන්‍යය, සංක්‍රමණිකයින්ගෙන් හා ඉස්ලාම්කරණයෙන් තර්ජනයට ලක්ව ඇතැයි පවසති.
ඊයේ පැවති විරෝධතාව සංවිධානය කළ ලෙනන්, අධිකරණයට එරෙහි වීමක් සම්බන්ධයෙන් චෝදනා ලැබ පොලිස් අත්අඩංගුවේ පසුවීම හේතුකොට, ඊට සහභාගී වී නොසිටි බව, රොයිටර්ස් පුවත් සේවය පවසයි. ඔහු, ලබන සඳුදා (28) අධිකරණය ඉදිරියේ පෙනී සිටීමට නියමිතය.
පසුගිය ජුලි මස ඔහු බ්‍රිතාන්‍යයෙන් පිටවන අවස්ථාවේ සිය ජංගම දුරකථන පින් (PIN) අංකය ලබා නොදීමේ වරදට, ඊයේ ඔහුට එරෙහිව ත්‍රස්තවාදය වැලැක්වීමේ නීතිය යටතේ ද චෝදනා ගොනු කෙරිණි.
ස්ටීවන් යක්ස්ලි-ලෙනන්
"ඔබ කළු, දුඹුරු, සුදු, කොළ හෝ කිනම් වර්ණැති සමකට හිමිකම් කීවද අපට එය වැදගැම්මකට තරම් නොවේ. අපට වටින්නේ, බ්‍රිතාන්‍යය පුරා පවතින අපගේ සමාජ හරයන්, සංස්කෘතිය සහ අප ජාතියේ අනාගතය පමණි," යනුවෙන් ඔහුගේ එක්ස් (X) ගිණුමේ සඳහන් කර තිබූ බව රොයිටර්ස් ප්‍රකාශ කළේය.
යුරෝපයේ සිට කුඩා බෝට්ටු මතින් බ්‍රිතාන්‍යය බලා පැමිණෙන සංක්‍රමණිකයින් සංඛ්‍යාව පෙර කවරදාක ද නොවූ ලෙස, ඉහළ ගොස් ඇතැයි, ඊයේ නිල වශයෙන් ප්‍රකාශ වීමත් සමග, සංක්‍රමණිකයින්ට එරෙහි උද්ඝෝෂණ යළි වර්ධනය විය. වසර මුල සිට මේ දක්වා, බ්‍රිතාන්‍යය වෙත එසේ පැමිණි සංක්‍රමණිකයින් සංඛ්‍යාව 29,578කි. එය පසුගිය වසරේ පැමිණි සමස්ත සංක්‍රමණිකයින් සංඛ්‍යාවට වඩා බෙහෙවින් වැඩි අගයක් බව බ්‍රිතාන්‍යය පවසයි.
(Reuters ඇසුරින් සටහන : හර්ෂ උදයකාන්ත විසිනි)