තමන් 'අතිවිශිෂ්ට ජයග්‍රහණයක්' ලැබූ බව ඩොනල්ඩ් ට්‍රම්ප් ප්‍රකාශයට පත් කරයි

ෆ්ලොරිඩාවේ සිය ආධාරකරුවන් හමුවේ ඔහු පැවසුවේ, තමන් ඇමෙරිකාව යළිත් සුවපත් කිරීමට සහය වන බව ය.

එහිදී ඔහු අවධාරණය කළේ, ඇමෙරිකානු දේශසීමා යළි තහවුරු කරන බව ය.

මෙය ඇමෙරිකාවේ "රන් යුගයක්" ලෙස ඔහු හැඳින්වීය.

"මෙය ඇමරිකානු ජනතාවගේ විශිෂ්ට ජයග්‍රහණයක් වන අතර, එය ඇමරිකාව නැවතත් ශ්‍රේෂ්ඨත්වයට පත් කිරීමට අපට ඉඩ සලසයි," යනුවෙන් ඔහු සඳහන් කළේ ය.

"ඇමරිකාව අපට පෙර නොවූ විරූ සහ බලගතු වරමක් ලබා දී තිබෙනවා," ඔහු පැවසීය.

එහිදී සිය බිරිඳ මෙලානියාට ස්තූති කරමින් ට්‍රම්ප් ඇයව හැඳින්වූයේ, ජනාධිපති ආර්යාව ලෙස ය.

පසුව, ට්‍රම්ප් ඔහුගේ ව්‍යාපාරයේ ප්‍රධාන කොටස්කරුවෙකු බවට පත්වූ X හිමිකරු සහ ලොව ධනවත් ම පුද්ගලයා වන එලොන් මස්ක් රිපබ්ලිකන් පක්ෂයේ "නව තරුවක්" ලෙස විස්තර කළේ ය.

'ජීවිතය බේරුණේ හේතුවකට'

මැතිවරණ ප්‍රචාරක රැලියකදී ඔහු ඝාතනය කිරීමට තැත් කිරීම ගැන ට්‍රම්ප් කෙටියෙන් සඳහන් කළේ ය.

ඔහු පැවසුවේ, ඔහුගේ ජීවිතය "හේතුවක් වෙනුවෙන් බේරුණු" බව ය. එය ඔහුගේ ප්‍රචාරණ ව්‍යාපාරය පුරා කියන ලද්දකි.

ට්‍රම්ප් පවසන්නේ, ඇමෙරිකාවේ ජනාධිපති ධූරය "ලෝකයේ වැදගත් ම රැකියාව" බව ය.

අවසන් ප්‍රතිඵලය තවමත් නැහැ

ඩොනල්ඩ් ට්‍රම්ප් සිය ජයග්‍රහණය ප්‍රකාශයට පත් කළ ද, මෙතෙක් අවසන් ප්‍රතිඵලයක් නිකුත් කර නැත.

ඇමෙරිකානු ජනාධිපතිවරණයෙන් ජය ගැනීම සඳහා අවම වශයෙන් ගත යුතු ආසන් සංඛ්‍යාව 270කි.

මේ වන විට ආසන 266ක බලය තහවුරු කර ගැනීමට ඩොනල්ඩ් ට්‍රම්ප් සමත්ව සිටී.

ඇමෙරිකාවේ වයස්ගත ම ජනාධිපති

ඩොනල්ඩ් ට්‍රම්ප්ගේ ජයග්‍රහණයත් සමග ඇමෙරිකාවේ වයස්ගත ම ජනාධිපතිවරයා ලෙස ඔහු ඉතිහාසගත විය.

1946 ජූනි 14 වන දා උපත ලැබූ ඔහු, මේ වන විට 78 වන වියේ පසු වෙයි.

දෙවන ධූර කාලය අවසන් වන විට ඔහුගේ වයස 83ක් වනු ඇත.

හිටපු ජනාධිපති ජෝ බයිඩ්න් 2020 වසරේ ධූරයට තේරී පත් වන විට 77 වන වියේ පසු විය.

(BBC සිංහල සේවය)