ඊයේ (14) එය පාර්ලිමේන්තුවේ මුල්වර කියවීමෙන් සම්මත වීමත් සමග අද, දහස් ගණන් ජනතාව එරට, වෙලින්ටන් අගනුවර වෙත පාගමනින් සිදු කෙරෙන විරෝධතා පෙලපාලිවලට එක් වූහ. දින නවයක විරෝධතා පාගමනක් වන එය ලබන අඟහරුවාදා (19) අගනුවරට ලඟා වීමට නියමිතය.
නව පනත් කෙටුම්පතට එරෙහි ජනහමු ගණනාවක් ද රට පුරා නගර රැසක ආරම්භ කර තිබේ.
සාම්ප්‍රදායික ආදිවාසී ඇඳුමින් සැරසී පැමිණෙන විරෝධතාකරුවන්, වීදී දෙපස 'මව්රි' ධජ වනමින් ජයඝෝෂා නඟන නරඹන්නන් ගේ ඉමහත් පිළිගැනීමට ලක්වී ඇතැයි වාර්තා වේ.
වෙලින්ටන් අගනුවරට කිලෝමීටර 450ක් පමණ එපිට රොටොරුවා (Rotorua) සිට දහස් ගණන් ජනතාව පා ගමනින් අගනුවර වෙත ලඟා වෙමින් ඇතැයි, එරට පොලිසිය පවසයි. සාම්ප්‍රදායික ආදිවාසී ඇඳුමින් සැරසී පැමිණෙන විරෝධතාකරුවන්, වීදී දෙපස 'මව්රි' ධජ වනමින් ජයඝෝෂා නඟන නරඹන්නන් ගේ ඉමහත් පිළිගැනීමට ලක්වී ඇතැයි වාර්තා වේ.
ඊයේ, එරට ආදිවාසී මව්රි නායකයෝ, සාම්ප්‍රදායික 'හකා' නර්තනයේ යෙදෙමින් සිය විරෝධතාවය පළ කළහ. නවසීලන්තයේ ආදීවාසී 'හකා' නර්තනය, විරෝධතාකරුවන් අබියස, ඔවුන්ට අභියෝග පිණිස රඟ දැක්වෙන්නකි.
ඊයේ, එරට පාර්ලිමේන්තුවේදී පනත මුල්වර කියවීමෙන් සම්මත වීමෙන් පසු, විසි දෙහැවිරිදි නීතිවේදී, මව්රි ගෝත්‍රික පාර්ලිමේන්තු මන්ත්‍රිනී, හැනා-රව්හිටී මෙයිපී-ක්ලාර්ක් (Hana-Rawhiti Maipi-Clarke), එහි පිටපතක් ඉරා දමමින් 'හකා' නර්තනයේ යෙදුනාය. අනෙකුත් පාර්ලිමේන්තු මව්රි සභිකයින් සහ ගැලරියේ සිටි ඇතැම් නරඹන්නෝද ඇයට එක්වූහ.
1840 දී බ්‍රිතාන්‍ය අධිරාජ්‍යය සහ මව්රි නායකයින් 500කට අධික පිරිසක් අතර අත්සන් කෙරෙනු එම ඓතිහාසික ගිවිසුමින්, දෙපාර්ශ්වය විසින් රාජ්‍ය පාලනය කෙසේ අනුදැන කටයුතු කළයුතු දැයි විග්‍රහ කෙරේ. එහි, අන්තර්ගතය අදටත්, නවසීලන්ත රාජ්‍ය ව්‍යවස්ථාවේ සහ ප්‍රතිපත්ති සම්පාදනයේ ප්‍රධාන තැනක් ගනී.
එම පනතේ ඇතැම් වගන්ති මගින් රජය සහ මව්රි ජන කොටස් අතර අනවශ්‍ය බැඳීමක් නිර්මාණය කර ඇති බවත්, එමගින් එරට ආදී වාසී නොවන ජනකොටස් කෙරෙහි අනිසි බලපෑම් එල්ල කෙරෙන බවත්, ප්‍රකාශ කරමින් එරට මධ්‍ය-දක්ෂිණාංශික පාලක සන්ධානය විසින් නව පනත පාර්ලිමේන්තුවට ඉදිරිපත් කර තිබේ.
නව පනත මගින් මව්රි සහ වෙනත් ආදිවාසී ජනකොටස්වල අයිතීන් සුළුකොට, අවමානයට ලක් කර ඇතැයි මව්රි පාක්ෂිකයෝ පවසති.
නව පනතට සිය සහාය හිමි වන්නේ, එය පාර්ලිමේන්තුවේ පළමුවර කියවීමේදී පමණක් බවත්, එහි දෙවන සහ තෙවනවර කියවීම් වලදී පනත නීතිගත කිරීමට සහාය නොදක්වන බවත්, සන්ධාන රජයේ ජාතික පක්ෂය (National Party) සහ 'පළමුව නවසීලන්තය' (New Zealand First) පක්ෂය පවසයි.
ජාතික පක්ෂ සාමාජික, නවසීලන්ත අග්‍රාමාත්‍ය, ක්‍රිස්ටෆර් ලක්සන් (Christopher Luxon) ද, සිය පක්ෂය පනත දෙවන සහ තෙවනවර කියවීමේදී ඊට සහාය නොදක්වන බව තහවුරු කළේය.
ඒ අනුව, නව පනත නීතිගත කිරීම පිණිස සම්මත නොවනු ඇතැයි අපේක්ෂා කෙරේ.
නවසීලන්තයේ මිලියන 5.3 ක ජනගහනයෙන් 20%ක් ආදිවාසී ජනතාවගෙන් සමන්විත වේ.
(Reuters ඇසුරින් සටහන; හ ර් ෂ උදයකාන්ත විසිනි)
මූලාශ්‍ර:
Maori protesters march on New Zealand capital over contentious bill