සංචාරකයින්ගේ පහසුව පිණිස, නව රබර් ටයර් ට්‍රෑම් ප්‍රවාහන පද්ධතියක් හඳුන්වා දීමට එරට රජය සැරසේ.
එය, චීනයේ CRRC සමාගම විසින් නිෂ්පාදනය කර තිබේ. නව පද්ධතිය මගින් සංචාරකයින්, ගිනිකඳු නැරඹුම් කලාප වෙත ප්‍රවාහනය කෙරේ.
යෝජිත නව සැලැස්ම මගින්, මීට පෙර ගිනි කඳු පාමුල සිට එහි පස්වන අදියර නැරඹුම් මධ්‍යස්ථානයේ යොෂිදා මංපෙත (Yoshida Trail) දක්වා ඉදිකිරීමට නියමිත ව තිබූ, සැහැල්ලු දුම්රිය ව්‍යාපෘතිය අවලංගු කෙරේ. ගිනි කඳු මුදුන තෙක් ඉදි කිරීමට යෝජිතවූ එම සැහැල්ලු දුම්රිය ව්‍යාපෘතිය මගින් පරිසරයට එල්ල විය හැකි බලපෑම සහ අධික පිරිවැය පිලිබඳ අවධානය යොමුකර නව පියවර ගත් බව ජපන් බලධාරීහු පවසති.
මීටර 3,776ක උසින් යුත් ගිනි කඳු තරණයට සංචාරකයින් අනුදත් ජනප්‍රියම මාවත එරට යමනෂි පළාත ඔස්සේ වැටී තිබේ.
නව සංචාරක මගී ප්‍රවාහන පද්ධතියද ඒ ඔස්සේම ක්‍රියාත්මක කිරීමට සැලසුම් කර ඇත. එම පද්ධතිය හඳුන්වා දීමත් සමග, පෙර සැලසුම් කිරීමට අපේක්ෂිත සැහැල්ලු දුම්රිය ව්‍යාපෘතියට වැය වෙතැයි ගණන් බලා තිබූ, ජපන් යෙන් බිලියන 140 (ඩොලර් මිලියන 895ක) ක මූල්‍ය පිරිවැය, 40%කින් අඩු වෙතැයි අපේක්ෂා කෙරේ.
ඒ අනුව ස්ථාපිත කෙරෙන, චීනයේ නිෂ්පාදිත නව සීඝ්‍රගාමී ස්වයංක්‍රීය ට්‍රෑම් ප්‍රවාහන පද්ධතිය, මාර්ගය මත චුම්බක ක්ෂේත්‍ර ධාවන පථයක් ඔස්සේ රියදුරකු රහිතව ක්‍රියාත්මක කෙරෙන්නකි. එය හයිඩ්‍රජන් මගින් බල ගැන්වේ. ඊට අවශ්‍ය හයිඩ්‍රජන් දේශීය වශයෙන් නිෂ්පාදනය කෙරෙන බව ජපානය පවසයි.
නව ප්‍රවාහන පද්ධතිය ක්‍රියාත්මක කිරීමත් සමග ගිනි කන්ද වෙත සිදු කෙරෙන සියලු පෞද්ගලික මෝටර් රථ සහ බස් රථ ප්‍රවාහනය තහනම් කෙරේ. එහි නියමු පරීක්ෂණ ලබන වසරේ අප්‍රේල් මස සිදු කිරීමට නියමිතය.
යමනෂි සහ ෂිසුඕකා පළාත් මධ්‍යයේ පිහිටි ෆුජි යමහළ එරට පූජනීය සහ ජනප්‍රිය සංචාරක ගමනාන්තයකි. එය 2013 වසරේ, යුනෙස්කෝ ලෝක උරුමයක් ලෙස ද නම් කෙරිණි.
(Reuters ඇසුරින් සටහන; හ ර් ෂ උදයකාන්ත විසිනි)
මූලාශ්‍ර:
Japan's Mount Fuji eyes China-made tram to transport hikers, source says