එසේ හරවා යවා ඇත්තේ, එරට පිහිටි විශාලතම ගල් අඟුරු අපනයන පර්යන්තය වෙත ලඟා වූ නෞකාවකි.
ඒ අනුව, නිව්කාසල් වරායේ (Port of Newcastle) පිවිසුම් ඇල මාර්ගය අවහිර කරමින් විරෝධතාවේ නියැලි 138 දෙනකු පොලිස් අත්අඩංගුවට ගෙන තිබේ.
ඔස්ට්‍රේලියාවේ, සිඩ්නි අගනුවරට කිලෝ මීටර 170ක් දුරින් පිහිටි එම වරාය, එරට නැගෙනහිර වෙරළේ පිහිටි විශාලතම, තොග අපනයන වරාය වේ.
මහජන විරෝධතා පැවතියද, වරාය ප්‍රමාදයන් අවම අවදානමක පවතින බව නිව්කාසල් වරාය පවසයි. ආපසු හරවා ගිය නෞකාව, ප්‍රති-කාලසටහන් ගත කර තිබේ. පොලිස් මැදිහත්වීම් මත වරාය ප්‍රවිෂ්ට ඇල මාර්ගය නිදහස් කර ගත හැකි වුවහොත්, වරාය මෙහෙයුම් ඉක්මනින් යළි යථා තත්ත්වයට පත් වනු ඇතැයි, වරාය පරිපාලනය පවසයි.
කාලගුණ විපර්යාසයට එරෙහි, 'නැගෙන රළ' (Rising Tide) නම් සමාජ ක්‍රියාකාරීන් පිරිසක්, එහි පැය 50 ක සිය විරෝධතාව පසුගිය සිකුරාදා (22) ආරම්භ කළහ. විරෝධතා හමුවේ අද හරවා යැවුණු නෞකාව, ගල් අඟුරු අපනයනය පිණිස පැමිණෙමින් තිබූ නෞකාවකි. කාලගුණ විපර්යාස, එරට ඉමහත් මත භේදාත්මක අභියෝගයක් බවට පත්ව ඇත.
ඔස්ට්‍රේලියාව ලොව විශාලතම තාප ගල් අඟුරු සහ අගය එකතු නොකළ ගල් අඟුරු අපනයනකරුවා ය.
පසු ගිය වසරේ නොවැම්බර් මස එම වරායේ පැවති මෙවැනිම මහජන උද්ඝෝෂණයක් හේතුවෙන්, වරාය වෙත පැමිණෙමින් තිබූ සියලු නෞකා ආපසු හරවා යැවීමට සහ වරාය මෙහෙයුම් තාවකාලිකව නවතා දැමීමට සිදු විය.
(Reuters ඇසුරින් සටහන : හර්ෂ උදයකාන්ත විසිනි)