ඒ සඳහා ජනතාව ඒකරාශී කරන ලෙස ඔහු සිය ආධාර කරුවන්ට දන්වා සිටියේය. ඛාන් නිදහස් කරන ලෙස ඉල්ලා ඔහුගේ දේශපාලන ආධාරකරුවෝ පසුගිය දා එරට ඉස්ලාමාබාද් නුවර මාරාන්තික උද්ඝෝෂණයක් පැවැත්වූහ.
ලබන 13 වනදා වයඹදිග පාකිස්ථානයේ පෙෂාවර් නුවරදී නව විරෝධතා අරඹන ලෙස, හිටපු අග්‍රාමාත්‍යවරයා විසින් එක්ස් (X ) පණිවුඩයක් මගින්, සිය ආධාරකරුවන්ට දන්වා තිබේ. එම නගරය අයත් ඛයිබර් පඛ්තුන්ක්වා (Khyber Pakhtunkhwa) ප්‍රාන්තය ඔහු නියෝජනය කරන පී.ටී.අයි.(PTI) පක්ෂයේ පාලනය යටතේ පවතී.
ඔහුගේ පාක්ෂිකයන් විසින් පසුගිය නොවැම්බර් 25 දා දියත් කළ මාරාන්තික උද්ඝෝෂණයේ දී හටගත් ගැටුම් වලින් 25 දෙනකු ජීවිතක්ෂයට පත් වූ අතර ඉකුත් වසරේ මැයි මස පැවති ජන අරගලයේදී 8 දෙනකු මරණයට පත්විය.
එම මරණ සම්බන්ධයෙන් වහා අධිකරණ ක්‍රියාමාර්ග ගන්නා ලෙස ඛාන්, රජයට බල කර සිටී. අත්අඩංගුවට පත් සියළු දේශපාලන ක්‍රියාකාරීන් වහා නිදහස් කරන ලෙසද රජයට බලපෑම් එල්ල වී තිබේ.
එහෙත්, නොවැම්බර් 25 දින උද්ඝෝෂණ හමුවේ කිසිවකු මිය ගොස් නැතැයි රජය ප්‍රකාශ කරයි. පසුගිය වසරේ මැයි මස පැවති ජන අරගලයේදී, ඊට සහභාගී වූවන්, හමුදා දේපල ඉලක්ක කර පහර දුන් බව ට රජය කියා සිටී. එම ප්‍රහාර මෙහෙයවීම සම්බන්ධයෙන් රජය ඛාන්ට චෝදනා එල්ල කළ අතර ඔහු එම චෝදනා ප්‍රතික්ෂේප කරයි.
72 හැවිරිදි ඉම්රාන් ඛාන්ට, පසුගිය වසරේ අධිකරණය සිර දඬුවම් පැනවීය.
මේ අතර, ඔහුගේ බිරිය වන 50 හැවිරිදි බුෂ්රා බිබී අත්අඩංගුවට ගැනීමට පාකිස්ථාන අධිකරණයක් ඊයේ (5) වරෙන්තු නිකුත් කළේය. 2018 සිට 2022 දක්වා සිය සැමියා එරට අග්‍රාමාත්‍ය ධුරයේ රැඳී සිටි කාලයේ රාජ්‍ය ත්‍යාග භාණ්ඩ නීති විරෝධීව අලෙවි කිරීමේ සිද්ධියක් සම්බන්ධයෙන් ඇය මීට පෙර මාස නවයක සිර දඬුවමට ලක් විය. පසුගිය ඔක්තෝබර මස ඇයව නිදහස් කෙරිණි.
(Reuters ඇසුරින් සටහන: හර්ෂ උදයකාන්ත විසිනි)