ඒ මේ වසරේ ඇමරිකානු තීරුබදු පැනවීම් අවස්ථා ගණනාවකදී ගෝලීය වෙළඳ පිළිවෙල කඩාකප්පල් කරමින් සිටින අවස්ථාවක බවයි චීන මාධ්‍ය පෙන්වා දෙන්නේ. එවැනි පසුබිමක් යට‍තේ, චීන ආර්ථිකය මෙවැනි වර්ධන අගයක් සාක්ෂාත් කර ගැනීම කිසිසේත්ම සුළුපටු නොවන බව විචාරකයන්ගේ ද මතයයි.
පළමු කාර්තුවේ දී චීනයේ ආර්ථික දත්ත දෙස අවධානය යොමු කිරීමේදී දැක ගත හැකි සුවිශේෂ ලක්ෂණයක් නම් එහි "ස්ථාවර" පදනමයි. එමෙන්ම පළමු කාර්තුවේ සිට ම, චීනයේ නිෂ්පාදන සහ ඉල්ලුම් දර්ශක ද ක්‍රමයෙන් වඩාත් සාධනීය ප්‍රවණතාවක් පෙන්නුම් කරනවා. සමස්ත කාර්මික එකතු කළ අගය පසුගිය කාලසීමාවට වඩා 6.3%කින් වැඩි වී තිබෙනවා. සේවා කර්මාන්තයේ එකතු කළ අගය ද පසුගිය කාලසීමාවට වඩා 5.3%කින් ඉහළ ගොස් ඇති අතර ස්ථාවර වත්කම් ආයෝජනයන්හි වාර්ෂික වර්ධනය 4.2%ක් ලෙස සනිටුහන් වී තිබීම විශේෂත්වයක් බවයි චීනය පවසන්නේ. මේ අතර මෑත වසරවලදී චීන ආර්ථිකය, ආයෝජන හා අපනයන මගින් මෙහෙයවනු ලබන තත්ත්වයේ සිට, දේශීය ඉල්ලුම හා නවෝත්පාදනයන් මගින් මෙහෙයවනු ලබන තත්ත්වය දක්වා විතැන් වී තිබෙනවා.
වසර ගණනාවක් තිස්සේ විවිධ පීඩනවලට මුහුණ දීමෙන් පසු, චීනය සාර්ව නියාමනය හා පාලනය පිළිබඳ අත්දැකීම් රාශියක් රැස් කර ගෙන ඇති අතර එයට අනුව සකස් කළ ප්‍රායෝගික ප්‍රතිපත්ති මාලාව, බාහිර කම්පන හා අභියෝගවලට ප්‍රතිචාර දැක්වීම සඳහා ශක්තිමත් සහතිකයක් සපයා ඇති බව චීන මාධ්‍ය සමූහය වාර්තා කළා.
ස්ථාවර හා බලවත් සංවර්ධනයකින් මෙන්ම ප්‍රායෝගික ප්‍රතිපත්ති මාලාවකින් යුත් චීනය, විවෘතභාවය හා සිය වෙළෙඳ මිතුරන්ගේ කවය අඛණ්ඩව පුළුල් කරමින් සිටිනවා. එය චීන ආර්ථික ආකර්ශනය දිනෙන් දිනම ශක්තිමත් කරමින් සිටින බවයි සිය නවතම ආර්ථික දත්ත නිකුත් කරමින් චීනය පවසන්නේ.
සටහන - දිනූෂි ධීරසිංහ
චීන මාධ්‍ය සමූහය