ප්‍රහාර වලින් ලාංකික කාන්තාවක ද සුළු තුවාල ලබා ඇතැයි ඊශ්‍රායලයේ ශ්‍රී ලංකා තානාපති නිමල් බණ්ඩාර සඳහන් කළේය.
ඊශ්‍රායලය ටෙහෙරානයට එල්ල කළ මිසයිල ප්‍රහාර වලින් පසු ඉරානය මෙම ප්‍රහාරය එල්ල කර ඇත.
ඉරාන රාජ්‍ය රූපවාහිනිය කියා සිටියේ ප්‍රධාන වශයෙන් ඊශ්‍රායලයේ ටෙල් අවිව් සහ හයිෆා නගර ඉලක්ක කර ගනිමින් මිසයිල 100ක් එල්ල කර ඇති බවයි.
ඉරාන ප්‍රහාර වලින් මධ්‍යම ටෙල් අවිව් මෙට්‍රොපොලිටන් ප්‍රදේශයක් වන බැට් යම් නගරයේ ගොඩනැගිලිවලට හානි සිදුව තිබේ.
මිසයිල ප්‍රහාරයෙන් බැට් යම් නගරයේ ගොඩනැගිල්ලකට සෘජුවම හානි සිදුවී ඇති ආකාරයත්, සුන්බුන් අතරින් තුවාල ලැබූවන් බේරා ගැනීමට සහන සේවා කණ්ඩායම් කටයුතු කරන ආකාරයත් වීඩියෝ දර්ශනවල දක්නට ලැබුණි.
මියගිය සිව්දෙනා අතර වයස අවුරුදු 60 ගණන්වල කාන්තාවක්, 80 ගණන්වල කාන්තාවක්, අවුරුදු 10 ක් පමණ වන පිරිමි ළමයෙකු සහ දැරියක් ද වේ.
ට්‍රම්ප්ගෙන් ඉරානයට දැඩි ප්‍රතිචාරයක්
ඉරානය සහ ඊශ්‍රායලය අතර අතර ඇතිව තිබෙන යුද ගැටුමට අමෙරිකා එක්සත් ජනපදය සම්බන්ධ නොවන බව ආමෙරිකානු ජනාධිපති ඩොනල්ඩ් ට්‍රම්ප් පවසයි.
Truth Social ගිණුමේ සටහනක් තබමින් අමෙරිකානු ජනාධිපතිවරයා සඳහන් කර ඇත්තේ ඊශ්‍රායලය විසින් ඉරානයට එල්ල කරන ලද නව ප්‍රහාර සම්බන්ධයෙන් එක්සත් ජනපදය කිසිදු සම්බන්ධයක් නොපවතින බවය.
කෙසේ වෙතත් ඉරානය විසින් ඊශ්‍රායලයට එල්ල කරන සිය පළි ගැනීමේ ප්‍රහාර නැවැත්වීමට උදව් නොකරන ලෙස ඉරානය විසින් අමෙරිකාව, ප්‍රංශය සහ එක්සත් රාජධානියට අනතුරු අඟවා තිබුණි.
එමගින් ඉරානය පෙන්වා දී තිබුණේ යම් හෙයකින් එසේ වුවහොත් ඉරානය විසින් කලාපයේ පිහිටි එම රටවල් තුනට අදාළ හමුදා කඳවුරු සහ නැව් ඉලක්ක කර ප්‍රහාර එල්ල කරන බවය.
මීට පිළිතුරු ලබා දෙමින් අමෙරිකානු ජනාධිපති ඩොනල්ඩ් ට්‍රම්ප් පවසා ඇත්තේ යම් ආකාරයකින් හෝ පහර දීමක් සිදුවුවහොත් එක්සත් ජනපද හමුදාවන්ගේ පූර්ණ ශක්තිය සහ බලය ඉරානයට දැක ගත හැකි වනු ඇති බවය.
"ඉරානය අපට කිසියම් ආකාරයකින්, ස්වරූපයෙන් හෝ ආකාරයකින් පහර දුන්නොත්, එක්සත් ජනපද සන්නද්ධ හමුදාවන්ගේ සම්පූර්ණ ශක්තිය සහ බලය පෙර කිසිදා නොදුටු මට්ටමකින් ඔබ මතට වැටෙනු ඇත," යනුවෙන් ට්‍රම්ප් සිය ගිණුමේ සටහන් කර තිබේ.
කෙසේ වෙතත් ඩොනල්ඩ් ට්‍රම්ප් පවසා ඇත්තේ ඉරානය සහ ඊශ්‍රායලය අතර ගිවිසුමක් ඇති කර ගත හැකි බවත් එමගින් මෙම ලේ හැලීම් අවසන් කළ හැකි බවය.