ඒ, ඊශ්‍රායලය ඉරානය වෙත එල්ල කරමින් සිටි ප්‍රහාරවලට දායකවීමට අමෙරිකාව ද සූදානම් බවට වාර්තා වන පසුබිමකය.
පසුගිය සිකුරාදා ඊශ්‍රායලය ඉරානයට ප්‍රහාර එල්ලකරමින් ආරම්භ කළ යුද ගැටුම මේ වනවිට වඩාත් පුළුල් යුද්ධයක් කරා දික්ගැස්සෙමින් පවතී.
ඉරානය, කොන්දේසි විරහිතව යටත් විය යුතු බවට පසුගියදා අවධාරණය කළ අමෙරිකානු ජනාධිපති ඩොනල්ඩ් ට්‍රම්ප් ඊයේ පැවසුවේ, තමන් ඊශ්‍රායලය, ඉරානය වෙත එල්ල කරන ප්‍රහාරවලට සම්බන්ධවීමේ ඉඩකඩක් පවතින බවය.
අමෙරිකානු ජනාධිපතිවරයා මෙම අදහස් පළකළේ ඉරාන ජනතාව කිසිදු දිනෙක යටත් නොවන බවටත්, ඊශ්‍රායල ප්‍රහාරවලට අමෙරිකාව සම්බන්ධ වුවහොත් 'ආපසු හැරවිය නොහැකි හානියක්' විය හැකි බවටත් ඉරාන ආධ්‍යාත්මික නායක අයතුල්ලා අලි කමෙයිනි කළ ප්‍රකාශයට සමගාමීවය.
මේ අතර මෙම තීරණාත්මක මොහොතේ දී අමෙරිකාව ඊශ්‍රායල ප්‍රහාරවලට එක්වනවාද යන්න තීරණය කිරීමේ ඉහළ පෙළේ හමුවක් අමෙරිකාවේ ධවල මන්දිරයේදී පවත්වා තිබුණි.
එහිදී ඉරානය වෙත පහරදීමට අනුමැතිය පළවී ඇතැයි ඇතැම් මාධ්‍ය වාර්තා කර තිබූ නමුත්, අවසන් තීරණයක් ගෙන නොමැති බව බොහෝ මාධ්‍ය වාර්තා කර ඇත.
මෙහිදී අමෙරිකාවේ වැඩි අවධානය යොමුවී ඇත්තේ, ඉරානය අතිශය රහසිගතව පවත්වාගෙන යන ෆෝර්දෝ යුරේනියම් බලගැන්වීමේ කම්හල වෙතය.
මේ අතර ගෙවුණු දිනය පුරාම ඉරානය සහ ඊශ්‍රායලය එකිනෙකා වෙත ප්‍රහාර එල්ල කරගනිමින් සිටී.
ඊශ්‍රායලය ඊයේ එල්ල කළ ප්‍රහාරවල ඉලක්ක වී තිබුණේ මිසයිල නිපදවන කම්හල් සහ ටෙහෙරාන් පොලිස් මූලස්ථානය ඇතුළු ඉලක්කගත ස්ථාන කිහිපයකි. ඊට සමගාමීව ඊශ්‍රායලය වෙත මිසයිල ප්‍රහාර මාලාවක් එල්ලකිරීමට ඉරානය ද කටයුතු කළ අතර, එහිදී මෙතෙක් යුද ගැටුම්වලට භාවිත කර නොතිබුණු නව බැලැස්ටික් මිසයිල ගුවන්ගත කළ ආකාරය දැක්වෙන වීඩියෝ විදෙස් මාධ්‍ය වාර්තා කර තිබුණි.
ඇරෝ ත්‍රී මිසයිල ආරක්ෂණ පද්ධතිය යොදාගෙන එම මිසයිලය ගුවනේදීම වැනසීමට ඊශ්‍රායලය සමත්වී තිබුණි.
අමෙරිකාව, ඉරාන - ඊශ්‍රායල ගැටුමට සම්බන්ධවීමේ ඉහළ අවස්ථාවක් පවතින පසුබිමක අමෙරිකානු ප්‍රහාරක යානා රැසක් එම කලාපයට යොමුකිරීමේ පුවත් ඊයේ වාර්තා වුණි.
දැනටමත් මැදපෙරදිග කලාපීය රටවල් පහක අමෙරිකානු හමුදා කඳවුරු පිහිටුවා ඇති අතර, ඒවායේ රඳවා සිටි අමෙරිකානු සෙබළු ගණන 40,000කි.
එමෙන්ම ඕමාන බොක්කේ සහ පර්සියානු බොක්කේ රඳවා ඇති යුද නෞකා කිහිපයක්ම දැනටමත්, ඉරාන මිසයිල බිම හෙලීමට ඊශ්‍රායලයට සහාය වෙමින් සිටී.
දකුණු චීන මුහුදේ රඳවා තිබූ USS නිම්ස් යුද නෞකාව ඇතුළු මිසයිල නාශක යාත්‍රා කිහිපයක්ම මැදපෙරදිග කලාපය වෙත යොමුකර ඇත්තේ එවන් පසුබිමකය.
මේ අතර වටමේස සාකච්ඡාවකට එක්වූ රුසියානු ජනාධිපති ව්ලැද්මීර් පුටින් යුද ගැටුම සම්බන්ධව අදහස් පළකර තිබුණි.
එහිදී ඉරාන ආධ්‍යාත්මික නායකයා ඝාතනය කිරීමට ඇති අවස්ථාව සම්බන්ධව පුටින්ගෙන් ප්‍රශ්න කර තිබුණි.
රුසියානු ජනාධිපති ව්ලැද්මීර් පුටින් ඊට පිළිතුරු දෙමින් පවසා තිබුණේ, "මං එවන් අවස්ථාවක් ගැන කතා කරන්නවත් කැමැති නැහැ. මට ඒ වගේ කතා ඇහෙනවා. ඒත් මට ඒ ගැන කතා කරන්නවත් කැමති නැහැ." යනුවෙනි.
| adaderana
ඊශ්‍රායලය - ඉරානය යුධ ගැටුමට අදාල තවත් විස්තර :
ඉරාන මිසයිල ප්‍රහාරවලින් ඊශ්‍රායල රෝහලකට හානි: 30කට අධික පිරිසකට තුවාල