ප්‍රහාරයෙන් පසු Truth Social හී සටහනක් තබමින් ට්‍රම්ප් පවසා ඇත්තේ මෙම ප්‍රහාර "ඉතා සාර්ථක" බවයි.
"ෆෝර්ඩෝ, නටාන්ස් සහ ඉස්ෆහාන් ඇතුළු ඉරානයේ න්‍යෂ්ටික මධ්‍යස්ථාන තුනට එල්ල කළ අපගේ ඉතා සාර්ථක ප්‍රහාරය අපි අවසන් කර තිබෙනවා. දැන් සියලුම ගුවන් යානා ඉරාන ගුවන් සීමාවෙන් පිටත තියෙන්නේ," ඔහු Truth Social සමාජ මාධ්‍යයේ සටන් කරමින් අනාවරණය කර සිටියේය.
ෆෝඩෝ වෙත රැගෙන ගිය "සම්පූර්ණ බෝම්බ ප්‍රමාණය" හෙළන ලද බවත්, සියලුම ගුවන් යානා එක්සත් ජනපදයට ආපසු ළඟා වෙමින් ඇති බවත් ට්‍රම්ප් සඳහන් කරයි..
"මෙය ඇමෙරිකා එක්සත් ජනපදයට, ඊශ්‍රායලයට සහ ලෝකයට ඓතිහාසික මොහොතක්," ට්‍රම්ප් කියා සිටියි.
සියලුම ගුවන් යානා ආරක්ෂිතව නිවෙස් බලා යමින් තිබෙන බවත් දැන් සාමයට කාලය වන බවත් පවසන ඇමරිකානු ජනාධිපතිවරයා, "මෙම යුද්ධය අවසන් කරන්න ඉරානය දැන් එකඟ විය යුතුයි" යනුවෙන් තවදුරටත් අවධාරණය කර සිටියි.
මේ අතර ඉරානයට එල්ල කළ ප්‍රහාරයෙන් පසු ට්‍රම්ප් අද ජාතිය ඇමතීමට නියමිත බවද විදෙස් මාධ්‍ය වාර්තා හී සඳහන්ව තිබේ.
රොයිටර් පුවත් සේවයට අනුව ඉරානයට එල්ල කළ අමෙරිකානු ප්‍රහාරවලට B-2 බෝම්බ හෙලන යානා සම්බන්ධ වූ බවද වාර්තා වේ.
අමෙරිකානු B-2 රහසිගත බෝම්බ හෙලන යානා අමෙරිකානු දූපතක් වන ගුවාම් වෙත ගෙන ගොස් ඇති බවට ඊයේ (21) වාර්තා වූ අතර ඉරානයට එරෙහි එක්සත් ජනපද ප්‍රහාරයකට එය සම්බන්ධ විය හැකි බවටද අනුමාන මතු විය.
B-2 බෝම්බ ප්‍රහාරක යානා යනු අමෙරිකාවේ බංකර් බ්ලාස්ටර් බෝම්බ රැගෙන යා හැකි එකම ගුවන් යානා වන අතර ඉරාන ප්‍රහාරයට අමෙරිකාව භාවිත කර ඇත්තේද මෙම ගුවන් යානා බවද වාර්තා වේ.
න්‍යෂ්ටික අවියක් නිෂ්පාදනය කිරීමට ඉරානය ගන්නා වූ උත්සාය ව්‍යාර්ථ කිරීමේ අරමුණින් ඊශ්‍රායලය පසුගියදා ඉරානය වෙත ප්‍රහාර එල්ල කිරීම ආරම්භ කරන ලදි.
කෙසේ වෙතත් එල්ල වන චෝදනා හමුවේ ඉරානය පවසා ඇත්තේ න්‍යෂ්ටික අවි නිෂ්පාදනය කිරීමට ඉරානය සූදානම් නොමැති බවත් සිය න්‍යෂ්ටික වැඩසටහන සාමකාමී අරමුණු සඳහා පමණක් වන බවය.
එමෙන්ම මින් පෙර ඉරානය අනතුරු අඟවා තිබුණේ ඉරානයට පහර දීමට අමෙරිකාව සූදානම් වුවහොත් මැදපෙරදිග පිහිටි අමෙරිකානු කඳවුරුවලට ඉරානය විසින් පහර දෙන බවය.
කෙසේවුවද මේවනවිට ඊශ්‍රායලය සහ ඉරානය අතර ප්‍රහාර එල්ල කිරීම් අඛණ්ඩව සිදුවෙමින් පවතින අතර, ඊශ්‍රායල හමුදාව පවසන්නේ ටෙහෙරානයේ මිසයිල නිෂ්පාදන ස්ථාන ඇතුළු ඉලක්ක විශාල ගණනකට ප්‍රහාර එල්ල කළ බවයි.
ඉරානය නිල වශයෙන් ජීවිත හානි පිළිබඳ සංඛ්‍යාලේඛන නිකුත් කර නැති අතර මාධ්‍යවේදීන්ට රට තුළ සිට වාර්තා කිරීම සීමා කර ඇති බැවින් ඊශ්‍රායල ප්‍රහාරවලින් සිදු වූ හානිය තක්සේරු කිරීම දුෂ්කර වී ඇතැයි බීබීසී ය පවසයි.
මෙම පුවතට අදාල තවත් විස්තර
Trump announces that US completed ‘successful’ attack on three Iran nuclear sites
ඉරානයේ ෆෝර්ඩෝ සහ අනෙකුත් න්‍යෂ්ටික මධ්‍යස්ථානවලට එක්සත් ජනපදය බෝම්බ හෙලන ලද බව ට්‍රම්ප් කියයි