සිරියාවේ දකුණු දෙසට වන්නට පිහිටි ස්වෙයිදා හී ජීවත් වන ඩෲස් ජන කොටස් ආරක්ෂා කරගැනීමේ අරමුණින් මෙම ප්‍රහාර එල්ල කරන බව ඊශ්‍රායලය පැවැසීය.
අඛණ්ඩව දින තුනක් තිස්සේ මෙම ගැටුම් පවතින අතර ඊශ්‍රායලය සිරියාවේ ඩැමැස්කස් අගනුවරට සහ ස්වෙයිදා හි ඉලක්ක වෙත මෙලෙස ප්‍රහාර එල්ල කරයි.
ඩෲස් යනු සිරියාවේ සුළුතර ජන කොටසක් වන අතර ඔවුන්ගෙන් වැඩි දෙනා ජීවත් වෙන්නේ දකුණු දිග සිරියාවේ ස්වෙයිදාහී ය. ඩෲස් ජන කොටස් ආරක්ෂා කරන බවට ඊශ්‍රායලය ප්‍රතිඥා දී තිබේ.
“අපගේ ඩෲස් සහෝදරවරුන් ආරක්ෂා කරගැනීමට අපි ක්‍රියාමාර්ග ගන්නවා” යැයි ඊශ්‍රායල අග්‍රාමාත්‍ය බෙන්ජමින් නෙතන්යාහු පැවැසීය.
“ඊශ්‍රායලය මහ පරිමාණ අර්බුදයක් ඇති කරනවා” යැයි ඊශ්‍රායල අග්‍රාමාත්‍යවරයාගේ ප්‍රකාශයට ප්‍රතිචාර දක්වමින් සිරියාවේ අන්තර්වාර ජනාධිපති අහ්මද් අල්-ෂාරා චෝදනා කළේ ය.
ඊශ්‍රායලය බදාදා දිනයේ දී සිරියාවේ ඩැමැස්කස් අගනුවර පිහිටි සිරියානු ආරක්ෂක අමාත්‍යාංශ ගොඩනැගිලි සංකීර්ණයට ගුවන් ප්‍රහාර එල්ල කර තිබූ අතර මෙම ප්‍රහාරවලින් අගනුවර පහිටි ජනාධිපති මන්දිරයට ද අලාභ හානි සිදුව තිබිණි.
මෙම ගැටුම් සමථයකට පත් කිරීම සඳහා ඇමෙරිකා එක්සත් ජනපදය ද මැදිව සිටින බව වාර්තා වේ.
ඊශ්‍රායාලය ගුවන් ප්‍රහාර එල්ල කිරීමෙන් පසු ප්‍රාදේශීය නායකයන්ගේ මැදිහත් වීම ද ඇති ව සටන් විරාමයක් ප්‍රකාශයට පත් කෙරුණු බව වාර්තා වූ අතර සිරියානු රජයේ හමුදා මෙම ප්‍රදේශවලින් ඉවත් වූ බව ද වාර්තා විය. කෙසේ නමුත් ඊශ්‍රායල ආරක්ෂක අංශ ඊයේ රාත්‍රියේ නැවත වරක් සිරියානු අගනුවරට ගුවන් ප්‍රහාර එල්ල කර ඇත.
